وڭىرلىك ورتالىق جۇمىس ىستەي باستادى

قوستانايدا سايلاۋدى بايقاۋعا كومەك بەرۋ وڭىرلىك ورتالىعى قۇرىلىپ, جۇمىس ىستەي باستادى. بۇل سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ وڭىرلىك فيليالى بولىپ تابىلادى. ونىڭ جەتەكشىسى ءالىمجان بەكماعامبەتوۆ جۋرناليستەرگە الدا اتقارىلار جۇمىستار جونىندە ايتىپ بەردى. ول بريفينگتە قوعامدىق كوميس­سيانىڭ قىزمەتى سايلاۋدىڭ دەموكراتيا تالاپتارىنا ساي, سايلاۋ تۋرالى زاڭنىڭ مۇلتىكسىز ورىندالۋىنا ىقپال ەتۋ ەكەنىن باسا ايتتى. «ءبىز بۇگىن بەلسەندى ىسكە كىرىسىپ وتىرمىز. كوميسسيا ەلىمىزدەگى ماڭىزدى ساياسي ناۋقاننىڭ ءادىل, ءمولدىر, دەموكراتيالىق نەگىزدە ءوتۋىن قامتاماسىز ەتۋگە كۇش سالادى. سايلاۋدا بايقاۋشىلار بولاتىنى بەلگىلى. ءبىز دە سولاردىڭ قىزمەتىن اتقا­راتىن بولامىز. باي­قاۋ­شى­لار پارتيالىق, حالىقارالىق, قوعام­دىق, تاۋەلسىز بولسىن, ولاردىڭ اتقا­راتىن قىزمەتى ءبىر-اق تۇيىنگە تىرە­لەدى, ول – ءادىل, انىق, ءمولدىر سايلاۋ وتكىزۋ», – دەدى سايلاۋدى باي­قاۋعا كومەك بەرۋ وڭىرلىك ورتالى­عىنىڭ جەتەكشىسى ءالىمجان بەكما­عامبەتوۆ. ءالىمجان باۋىرجان ۇلىنىڭ ايتۋىنشا, قوعامدىق بايقاۋشىلار بارلىق سايلاۋ ۋچاسكەلەرىن قام­تيتىن بولادى. سايلاۋدىڭ بارلىق ساتىسىندا, ءتىپتى داۋىس بەرەتىن كۇنى دە مونيتورينگ وتكىزەتىن بولادى. وسىلايشا, قوعامدىق كوميسسيا سايلاۋدا وعان قاتىسىپ وتىرعان بارلىق ساياسي پارتيالار ءۇشىن جاعدايدىڭ بىردەي جاسالعانىن باقىلايدى. سايلاۋداعى بايقاۋعا كومەك بەرۋ وڭىرلىك ورتالىعىنىڭ جۇمىسى جۇرەك قالاۋىمەن كەلەتىن, قوعامدىق نەگىزدە جۇمىس ىستەيتىن ۆولونتەرلارعا وتە ۇقساس. سوندىقتان جۇمىستىڭ مۇنداي ءتۇرى ادامداردى دايىنداۋدى, ساياسي ناۋقان ەرەكشەلىگىن, ماقساتىن, ماڭىزىن جەتە تۇسىنەتىندەي, زاڭ نورمالارى مەن تالاپتارىن بىلەتىندەي ەتىپ وقىتۋدى تالاپ ەتەدى. ەڭ باستىسى, ادامدارعا اقپاراتتار جەتىمدى بولۋى كەرەك, سايلاۋ كوميسسياسىنىڭ قىزمەتىنىڭ جانە سايلاۋ ۇدەرىسىنىڭ ەرەجەلەرىن ادامدار تۇسىنسە, بىلسە ادىلەتتىككە نۇقسان كەلتىرەتىن دورەكى قاتەلەر دە كەتپەيدى. قوعامدىق بايقاۋشىلار دا وسىنى قامتاماسىز ەتۋگە تىرىسادى. «مەن بۇرىنعى سايلاۋلاردا بايقاۋشىلار قاتارىندا بولدىم. سوندا ءبىر وتباسى تۇگەل كەلىپ, كابيناعا بارلىعى كىرىپ, داۋىس بەرۋگە تىرىستى. بايقاۋشىلار مۇنىڭ ەرەجە بۇزۋ ەكەندىگىن ايتىپ, سايلاۋ كوميسسياسىنا حابارلادى. وسىنداي جاعدايلاردىڭ ءوزى ورىن الماۋى ءتيىس», – دەدى. سايلاۋدى بايقاۋ جونىندەگى رەسپۋبليكالىق قوعامدىق كوميس­سيانىڭ شتابىندا قوستانايلىقتار ءۇشىن سەنىم تەلەفونى جۇمىس ىستەيدى. ال سايلاۋ قورىتىندىسى بويىنشا كوميسسيا ەسەپ بەرەتىن بولادى. ءنازيرا جارىمبەتوۆا, «ەگەمەن قازاقستان». قوستاناي.