«بارىس» سوڭعى ويىندا «اۆانگاردتى» جەڭگەنىمەن, پلەي-وففقا وتە المادى

استانا. 18 اقپان. بۇگىن قۇرلىقتىق حوككەي ليگاسىنىڭ تۇراقتى چەمپيوناتى شەڭبەرىندە استانانىڭ «بارىسى» بيىلعى ماۋسىمداعى سوڭعى كەزدەسۋىن وتكىزدى. ومبىدا شىعىس كونفەرەنتسياسىنىڭ كوشباسشىسى, جەرگىلىكتى «اۆانگاردپەن» سىنعا تۇسكەن ەلوردالىقتار ويىن سوڭىنداعى بۋلليت ارقىلى جەڭىسكە جەتتى. بۇل تۋرالى egemen.kz ءتىلشىسى حابارلادى. نەگىزگى ۋاقىت 2:2 ەسەبىمەن تەڭ اياقتالىپ, بۋلليتتەر سەرياسىندا ءبىزدىڭ كوماندا باسىمدىق تانىتتى. الايدا, بۇل باسىمدىق «بارىستىڭ» ءتۋرنيردىڭ پلەي-وفف ساتىسىنا جولداما الۋىنا جەتكىلىكسىز بولدى. وسىلايشا, استانالىقتار قۇرلىقتىق حوككەي ليگاسىنا قاتىسقالى بەرى العاش رەت پلەي-وففقا وتە المادى. سەبەبى, وسى جەڭىستەن كەيىن اندرەي نازاروۆتىڭ كومانداسى قورجىنىنداعى ۇپايىن 85-كە جەتكىزگەنىمەن, باستى باسەكەلەسى – نيجنەكامسكىنىڭ «نەفتەحيميگىن» باسىپ وزا المادى. «اۆانگاردپەن» بولعان ويىندا ايدىن يەلەرى ەسەپ اشتى. اتاپ ايتقاندا, 9-مينۋتتا الەكسەي گلۋحوۆ مەرگەندىگىمەن كوزگە تۇسسە, 14-مينۋتتا ارتۋر لاۋتا ەسەپتى ەسەلەدى. ۇزىلىسكە 3 مينۋت قالعاندا «بارىس» ساپىنان رومان ستارچەنكو گول سوعىپ, قوناقتار ءبىر گولدىڭ قارىمتاسىن قايتاردى. ال ەكىنشى كەزەڭدە, ناقتى ايتساق, 32-مينۋتتا برەندون بوچەنسكي قاقپانى ءدال كوزدەپ, تارازى باسىن تەڭەستىردى. وۆەرتايمدا ءبىرىن-ءبىرى الا الماعان قارسىلاستار بۋلليتتەر سەرياسىنا جۇگىندى. بۇل سىندا «بارىستىڭ» جولى بولدى. استانالىقتار ماۋسىمدى شىعىس كونفەرەنتسياسىنىڭ تۋرنير كەستەسىندە 9-ورىنمەن اياقتاعانىن اتاپ وتكەن ءجون. ەلامان قوڭىر. دەرەك: egemen.kz. سۋرەت: hawk.ru.