حورەوگراف

گۇلسينا بايكەنوۆامەن جولىعۋ وڭاي ەمەس. ويتكەنى, ول ۇنەمى قاربالاس جۇرەدى. بىردە «بايكەنوۆتەر» بالەت ستۋدياسىنىڭ بيشىلەرىمەن ءتۇرلى حالىقارالىق كونكۋرستارعا قاتىسۋ ءۇشىن جولعا شىعىپ كەتەدى. ەندى بىردە مۇمكىندىگى شەكتەۋلى جانداردى ءدال سونداي سايىستارعا جەتەلەپ بارا جاتادى. ونىڭ ۇستىنە اتىراۋداعى «تاتۋلىك» تاتار-باشقۇرت ەتنومادەني بىرلەستىگىنە جەتەكشىلىك ەتەتىندىكتەن ءتۇرلى مادەني شارالاردىڭ بەل ورتاسىنان تابىلاتىن ءساتى دە كوپ. وسىلايشا ول ۇنەمى جول ۇستىندە, نە ءتۇرلى ءىس-شارانىڭ ورتاسىندا جۇرەدى. ونىڭ ءومىر جولى دا قىزىق. ماڭعىستاۋ وڭىرىندە كىندىك قانى تامىپتى. بەس جاس­قا تولعاندا اتا-اناسى جۇمىسىمەن قىر­عىزستانعا كوشىپتى. اتا-اناسى سول ەلدىڭ جالالاباد قالاسىنداعى ونەر مەكتەبىندە ءدارىس الۋعا بەرىپتى. وقۋعا زەرەك جاس كەيىن ونەرگە بەت بۇرىپ, بىشكەكتەگى حورەوگرافيالىق ۋچيليششەدە ءبىلىم العان. بىراق, ەڭبەك جولىن قازاقستاندا دا, قىرعىزستاندا دا ەمەس, رەسەيدىڭ چەليابى قالاسىندا باستاپتى. ال ەلىمىز تاۋەلسىزدىك العان تۇستا, ياعني 1992 جىلى قازاقستانعا قايتا ورالىپتى. «اكەم دە, شەشەم دە ونەرگە قاتىسى بولماسا دا, ءبىزدى بالا كۇنىمىزدەن ونەرگە باۋلىدى. ولار ۇنەمى «تۋعان جەردەي جەر بولماس» دەپ وتىرۋشى ەدى. ءبىز قازاقپەن تامىرلاس, تۋىسقان حالىقپىز. تۋعان ەلىڭدى, قازاق حالقىن سىيلاڭدار, ولاردىڭ سالت-ءداستۇرىن, مادەنيەتىن, تا­ريحىن, ءتىلىن, ونەرىن قۇرمەتتەڭدەر. قازاقستاننىڭ وركەندەۋىنە ۇلەستەرىڭدى قوسىڭدار, كومەكتەرىڭدى بەرىڭدەر», دەپ ءوسىردى ءبىزدى, دەيدى قازاقشا جەتىك سويلەيتىن حورەوگراف گۇلسينا بايكەنوۆا. قازاقستانعا ورالعان سوڭ 1992-1994 جىلدارى ك.بايسەيىتوۆا اتىنداعى مەم­لەكەتتىك اكادەميالىق وپەرا جانە بالەت تەاترىندا جانە بولات ايۋحانوۆتىڭ باسشىلىعىمەن ۇيىمداستىرىلعان مەم­لە­كەتتىك كلاسسيكالىق بي ءانسامبلىنىڭ قۇ­رامىندا جۇمىس ىستەدى. م.اۋەزوۆ اتىن­داعى وڭتۇستىك قازاقستان مەملەكەتتىك ۋنيۆەرسيتەتىندە بي ۇجىمىنىڭ جەتەكشىسى ماماندىعىن يگەرىپ, اتىراۋدا بالەت ستۋدياسىن اشتى. قازىر ءوزىنىڭ جەتەكشىلىگىندەگى «بايكەنوۆتەر» بالەت ستۋدياسىندا 5 پەن 9 جاس ارالىعىنداعى 68 تاربيەلەنۋشى بار. بيگە اڭسارى اۋعان بالدىرعانداردىڭ ۇلتىنا قارامايدى. ءبارىن باۋىرىنا تارتادى, ءتۇرلى ۇلتتاردىڭ ءبيىن ۇيرەتەدى. بۇل ستۋديانىڭ بالعىن بيشىلەرى تەك ەلىمىزگە عانا ەمەس, الىس-جاقىن شەت مەملەكەتتەرگە تانىمال بولدى. بۇلارعا قوسا مۇمكىندىگى شەكتەۋلى جانداردى دا بيگە باۋلي باستادى. – ءار ادامنىڭ تاعدىرى ارقالاي قا­لىپ­تاسقانىمەن, ءبارىنىڭ دە بويىندا ونەرگە دەگەن قۇلشىنىس بولادى. الايدا, كەيبىرەۋلەرى مۇمكىندىگىنىڭ شەكتەۋلى بول­عانى­نان قاتارىنان قالىپ جاتادى. ءتىپتى قوعامنان بولشەكتەنە باستايتىن ساتتەرى بار. مەنىڭ ويىمشا, مۇمكىندىگى شەكتەۋلى بولعانمەن, ولاردىڭ دا اراسىندا تالانتتى جاستار جەتەرلىك. تەك ولاردى قولداۋ قاجەت, –دەيدى مۇمكىندىگى شەكتەۋلى جانداردى دا بي ونەرىنە باۋلىپ جۇرگەن حورەوگراف. ءسويتىپ, ونىڭ ۇيىتقى بولۋىمەن مۇمكىندىگى شەكتەۋلى جاندار ءۇشىن «اداجيو» دۋەتى قۇرىلدى. وتكەن جىلى وسى دۋەتتىڭ قۇرامىنداعى اسىلاي اقبەرگەنوۆا مەن نۇرلان جالعاسباەۆ پولشادا وتكەن «مادەنيەت شەرۋى-2014» حالىقارالىق جوباسىنىڭ ارتىستىك جازى» كونكۋرس-فەستيۆالىنە قاتىستى. ولار الەمنىڭ ءار ەلىنەن جينالعان بيشىلەر دوداسىندا «مەدلەننىي ۆالس» بي قويىلىمى مەن «چاسى ۆرەمەني» سيۋجەتتى كومپوزيتسياسىن ۇسىنىپتى. سونداي-اق, بالەت ستۋدياسىنىڭ وقۋشىلارى مەن «اداجيو» دۋەتى «بي تەاترى جانە ۇلتتىق كوستيۋم» اتالىمىندا دا ونەر كورسەتتى. «بۇل قويىلىمدا قازاقتىڭ دارحان دالاسىنىڭ بار بايلىعىن كورسەتۋگە تىرىستىق. ساحناعا «التىن ادامدى» دا, ساق پاتشايىمى تۇماردى دا الىپ شىعىپ, «الاستاۋ» ىرىمى مەن «شاشۋ» ءداستۇرىن ۇسىندىق», دەيدى گۇلسينا بايكەنوۆا. وسىلايشا, ءبىر ءبيدى مۇمكىندىگى شەكتەۋلى بيشىلەرگە دە, ون ەكى مۇشەسى ساۋ بيشىلەرگە دە بيلەدى. ناتيجەسىندە اتىراۋلىق بيشىلەر حالىقارالىق كونكۋرس-فەستيۆالدىڭ «بي تەاترى جانە ۇلتتىق كوستيۋم» اتالىمىندا ءى ورىن مەن گران-پري سىيلىعىنا يە بولدى. ال حورەوگراف گۇلسينا بايكەنوۆاعا «ۇزدىك حورەوگراف» ارنايى سىيلىعى بەرىلدى. ول سونىمەن بىرگە, ەلىمىزدەگى ۇلتارالىق تاتۋلىقتىڭ نىعايۋىنا دا ءوزىنىڭ ۇلەسىن قوسىپ كەلەدى. «ءبىزدىڭ ەلىمىزدە 100-دەن استام ەتنوس بار. ولاردىڭ ءبارى دە مەملەكەتتىڭ قولداۋىمەن وزدەرىنىڭ ۇلتتىق قۇندىلىقتارىن جاڭ­عىرتۋعا مۇمكىندىك الدى. بۇعان ءوزىم دە اتسالىسىپ ءجۇرمىن. ماقساتىمىز – ەلدىڭ بىرلىگىن ساقتاۋ, وركەندەۋىنە ۇلەس قوسۋ», دەگەن حورەوگراف ءبىر توپ بالامەن بالەت ستۋديا­سىنا قاراي بەتتەپ بارا جاتتى. جولداسبەك شوپەعۇل, «ەگەمەن قازاقستان».  اتىراۋ. سۋرەتتى تۇسىرگەن راحىم قويلىباەۆ.