مەديتسينالىق قوندىرعىلارمەن قامتاماسىز ەتتى

بۇگىندە جارما اۋدانىنداعى اۋەزوۆ اۋىلى تۇرعىندارىنىڭ دەنساۋلى­عىن ساقتاۋعا قولايلى جاعداي جاسالعان. ەلدى مەكەننىڭ تۇرعىندارىنا ەندى ورتا­لىققا قاراي, ياعني وسكەمەن مەن سەمەي قالالارىنداعى مەديتسينالىق مەكەمەلەرگە نەمەسە اۋداندىق اۋرۋحاناعا جۇگىنۋدىڭ اسا قاجەتى جوق. اۋەزوۆتىكتەر ۋاقىت پەن قاراجات شىعىنداماي-اق, تۋعان اۋىلدارىندا دارىگەرلىك تەكسەرۋدەن وتە الادى. قازىرگى كەزدە اۋىل امبۋلاتورياسىندا قۇنى 3 ميلليون تەڭگە تۇراتىن قان قۇرامىن تەكسەرۋگە ارنالعان قۇ­رال-جابدىقتار مەن كوز تونومەترى بار. جۋىردا اتالعان مەديتسينالىق اپپاراتتار جارما اۋدانى اكىمدىگى مەن «باقىرشىق تاۋ-كەن ءوندىرۋ كاسىپورنى» جشس اراسىندا بەكىتىلگەن الەۋمەتتىك-ەكونوميكالىق مەموراندۋم شەڭبەرىندە امبۋلاتورياعا سىيعا تارتىلدى. سونىڭ ارقاسىندا اۋەزوۆ تۇرعىندارى وزگە ەلدى مەكەندەردە كەزدەسە بەرمەيتىن MicroCC-20 Plus گەماتولوگيالىق اۆتوماتتى اناليزاتور اپپاراتى مەن سوە-مەتر پر-3 قۇرالى ارقىلى قان قۇرامىن تەكسەرۋگە ارنالعان جانە يگد-02 «پرا» ماركالى كوز ىشىندەگى قىسىمدى تىركەيتىن كوز تونومەترىنە يە بولدى. قۇندى سىيلىقتاردى دارىگەرلىك مەديتسينالىق كومپانيا جەتەكشىلەرى سالتاناتتى تۇردە تابىس ەتتى. – «پوليمەتالل» كومپانياسى كاسىپورىن قىزمەتكەرلەرى مەن اۋىل تۇرعىندارى جايلى تۇرمىس كەشۋى ءۇشىن قولدان كەلگەن كومەكتى ايانىپ قالمايدى. ايتالىق, 2014 جىلى دارىگەرلىك امبۋلاتورياعا ناۋقاستاردى جەدەل اۋرۋحاناعا جەتكىزۋگە جانە باستاپقى مەديتسينالىق كومەك كور­سەتۋگە ارنالعان جەدەل جاردەم كولىگىن تار­تۋ ەتكەن ەدىك. ال 2015 جىلى كومپانيا جەتەكشىلىگى امبۋلاتوريانىڭ سىرتقى قاسبەتىن جوندەۋدەن وتكىزۋ جانە زاماناۋي قاجەتتى قۇرال-جابدىقتار ساتىپ الۋ جونىندە شەشىم شىعاردى, – دەدى باقىرشىق تاۋ-كەن ءوندىرۋ كاسىپورنىنىڭ باس ديرەكتورى يۋري وۆچيننيكوۆ. جارما اۋدانىنىڭ اكىمى نۇرلان سى­دى­قوۆ «پوليمەتالل» كومپانياسىنىڭ قاراپايىم اۋىل تۇرعىندارىنا جاساعان كومەگىن جوعارى باعالاپ, ءوڭىردىڭ الەۋمەتتىك جانە ەكونوميكالىق دامۋىنا ۇلەس قوسا بەرۋلەرىنە تىلەكتەستىگىن ءبىلدىردى. دۋمان اناش, «ەگەمەن قازاقستان». شىعىس قازاقستان وبلىسى, جارما اۋدانى.