اتقارىلعان ىستەر اۋقىمدى, اتقارىلاتىنى دا از ەمەس

سىرتقى ىستەر مينيسترلىگىنىڭ حالىقارالىق اقپارات­ كوميتەتىنىڭ توراعاسى رومان ۆاسيلەنكو ءبىزدىڭ ءوتىنىشىمىز بويىنشا بىلتىر وتكىزىلگەن ماڭىزدى سىرتقى ىستەرمەن قاتار, بيىلعى جىلدىڭ التى ايىندا اتقارىلاتىن جۇمىستار تۋرالى ايتىپ بەردى. اتقارىلعان ماڭىزدى ىستەردىڭ قاتارىندا قازاقستاننىڭ دسۇ-عا مۇشە بولعاندىعى ۇلكەن تابىس رەتىندە اتالدى. ارمەنيا مەن قىرعىزستاننىڭ ەۋرازيالىق ەكونوميكالىق وداققا كىرۋى تۋرالى كەلىسىمشارتتىڭ كۇشىنە ەنۋى دە ماڭىزدى قادام بولعان. سونداي-اق, الەمدىك جانە ءداستۇرلى دىندەر ليدەرلەرىنىڭ استانادا وتكەن V سەزى دە ما­ڭىزدى ىستەر قاتارىندا كولدەنەڭ تارتىلدى. قازاقستاننىڭ 20 شەتەل ازاماتتارىنان 2015 جىلدىڭ 16 شىلدەسىنەن باستاپ 2017 جىلدىڭ 31 جەلتوقسانىنا دەيىنگى مەرزىمگە قازاقستاندا 15 كۇن بولعان ۋا­قىت ارالىعىندا ەشقانداي ۆيزا تالاپ ەتىلمەيتىندىگى تۋرالى شە­شىم قابىلداۋى دا ماڭىزدى ىستەر­دىڭ قاتارىنا جاتقىزىلعان. بۇل ەلىمىزدىڭ حالىقارالىق ارە­ناداعى بەدەلىن وسىرە تۇسكەن ما­ڭىزدى قادام ەكەندىگى ايتىلدى. قازاقستان مەن ماگاتە ارا­سىندا بايىتىلماعان ۋران قال­دىقتارىنىڭ بانكىن ەلىمىزدە قۇرۋ تۋرالى كەلىسىمگە قول قويۋى دا وتكەن جىلدىڭ ماڭىزدى سىرتقى ىستەر جاڭالىعى بولىپ تابىلادى. ارينە, ەلباسى ن.نازار­باەۆتىڭ بۇۇ-نىڭ 70 جىلدىق مەرەيتويىنا ارنالعان 70-سەسسياسىنا قاتىسىپ, ءسوز سويلەگەنى مەن وندا الەمدىك پروبلەمالار بويىنشا بىرقاتار جاڭا باستامالار كوتەرگەنىن سىرتقى ىستەر مينيسترلىگى ەڭ ماڭىزدى ىستەردىڭ قاتارىنا قوستى. سونىمەن قاتار, بۇۇ باس اسسامبلەياسىنىڭ ءبىزدىڭ مەملەكەتتىڭ باسشىسى كوتەرگەن يادرولىق قارۋدان ازات بەيبىت ومىرگە قول جەتكىزۋ تۋرالى جالپىالەمدىك دەكلاراتسيانى قابىلداۋى دا ۆەدومستۆونىڭ بىلتىرعى جىلعى ۇلكەن تابى­سىنىڭ ءبىرى رەتىندە اتالدى. سونىمەن بىرگە, ەلباسى ن.نازار­باەۆتىڭ قىتاي, رەسەي, ۇلى­بريتانيا, فرانتسيا, يران جانە ت.ب. ەلدەرگە جاساعان رەسمي ساپارلارىن دايىنداۋ دا ماڭىزدى ىستەر قاتارىندا بولعانى ايتىلدى. سول ساپارلار بارىسىندا ەلىمىزگە 60 ملرد. دوللاردان ارتىق ينۆەستيتسيا تارتۋ تۋرالى كەلىسىمدەرگە قول قويىلدى, دەدى ر.ۆاسيلەنكو. جىل اياعىنا تامان قول جەتكىزىلگەن ۇلكەن تابىس – قازاقستاننىڭ ەۋرووداقپەن 29 سالا بويىنشا ارىپتەستىك پەن ىنتىماقتاستىقتى كەڭەيتۋ تۋرالى كەلىسىمگە قول قويعانى دا سىرتقى ساياسات ۆەدومستۆوسىنىڭ ۇلكەن تابىسى رەتىندە اتالدى. سونداي-اق, وتكەن جىلى قا­زاقستانعا تۇركيا, قىتاي, ءۇندىستان, اۋعانستان, جاپونيا, ۋكراينا, رەسەي باسشىلارىنىڭ رەسمي ساپارمەن كەلىپ, تابىستى كەلىسىمدەرگە قول جەتكىزىلگەنى دە ديپلوماتيالىق تابىستار ەكەندىگى رەتىندە اتالىپ ءوتتى. بيىلعى جىلدىڭ العاشقى جارتى جىلدىعىندا بولاتىن ماڭىزدى حالىقارالىق ىستەردىڭ قاتارىندا ەكسپو-2017 كورمە­سىنە قاتىسۋشىلاردىڭ 2-ءشى جي­نا­لىسىنىڭ اقپان ايىندا بولاتىنى جانە جوعارى دەڭگەيدەگى بىرقاتار ساپارلار جاسالاتىنى ايتىلدى. جاقسىباي سامرات, «ەگەمەن قازاقستان».