اقتوبەدە وتكەن جىلى سالىق تۇسىمدەرى اسىرا ورىندالدى

اقتوبە. 18 اقپان. اقتوبە وبلىسىندا وتكەن جىلدىڭ قورىتىندىسى بويىنشا بيۋدجەتكە 319 ميلليارد تەڭگەدەن استام قارجى ءتۇستى. بۇل تۋرالى egemen.kz ءتىلشىسى حابارلادى. جىل قورىتىندىسىنا ارنالعان جيىندا اقتوبە وبلىسى بويىنشا مەملەكەتتىك كىرىس دەپارتامەنتىنىڭ باسشىسى تالعات ماماەۆ مەملەكەتتىك جانە رەسپۋبليكالىق بيۋدجەتتەر كىرىستەرى بويىنشا جوسپار تيىسىنشە 11,7 پايىز جانە 16,9 پايىزعا اسىرا ورىندالعانىن ايتتى. جەرگىلىكتى بيۋدجەت جوسپارى 105,3 پايىزعا ورىندالدى, سونىڭ ناتيجەسىندە جەرگىلىكتى بيۋدجەتكە جوسپاردان تىس 4,3 ميلليارد تەڭگەدەن استام قارجى ءتۇستى. ال اقتوبە قالاسى بيۋدجەتىنە سالىق ءتۇسىمىنىڭ تومەندەۋى بايقالعانى اتاپ ءوتىلدى. جيىن بارىسىندا مەكەمە تاراپىنان كورسەتىلەتىن مەملەكەتتىك قىزمەتتەردىڭ ساپاسىن ارتتىرۋ ماسەلەلەرى دە قوزعالدى. دالىرەك ايتار بولساق, مەملەكەتتىك كىرىستەر جونىندەگى دەپارتامەنت ازاماتتارعا سالىق بويىنشا قارىزدارىنىڭ بار ەكەندىگى جونىندە حابارلاما جىبەرىپ تۇراتىن بىرىڭعاي ەسەپتەۋ ورتالىعىن اشۋدى ويلاستىرۋدا. «بۇگىنگى كۇنى سالىق تۋرالى حابارلامالار حالىققا قولمەن نەمەسە پوشتا ارقىلى تاراتىلادى. حابارلامالاردىڭ مەكەن جايلارعا جەتپەيتىن كەزدەرى دە كەزدەسەدى. كەي جاعدايلاردا ازاماتتار سالىق بويىنشا قارىزدارىنىڭ بار ەكەندىگىن سوتتا ەستىپ جاتادى. بۇل ماسەلەنى بىرىڭعاي ەسەپتەۋ ورتالىعىن اشۋ ارقىلى شەشۋدى جوسپارلاپ وتىرمىز», – دەيدى تالعات ماماەۆ. سونىمەن قاتار, ينتەرنەت-رەسۋرسىن قۇرۋ تۋرالى ۇسىنىس تا ايتىلدى. سالىق تولەۋشىلەر ول رەسۋرستان تولەۋى ءتيىس سالىعى, ونىڭ مولشەرى مەن ءوسىمى تۋرالى مالىمەتتەردى الا الادى. مۇنداي رەسۋرس ارقىلى كەز-كەلگەن ۋاقىتتا سالىق جونىندەگى قارىزدار تۋرالى مالىمەتتەردى الىپ قانا قويماي, ونلاين رەجىمى بويىنشا قارىزداردى تولەۋگە دە بولادى. ساتىبالدى ءساۋىرباي. دەرەك: egemen.kz. سۋرەت: strategy2050.kz.