اقش بيلىگى Apple ارقىلى ءار iPhone سمارتفونىن بۇزۋعا مۇمكىندىك الماق

استانا. 18 اقپان. اقش Apple كومپانياسى ارقىلى بارلىق iPhone تۇرلەرىنە تولىق كىرۋگە قول جەتكىزبەك. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. اقش بيلىگى Apple-دىڭ تەك ءبىر عانا iPhone-ىن بۇزۋمەن شەكتەلىپ قالماق ەمەس, ولار كومپانيانىڭ وسىنداي قۇرىلعىلارىنىڭ بارلىعىنا تولىق كىرۋدى كوزدەپ وتىر. مۇنداي پىكىرىن اقش ارنايى قىزمەتىنىڭ بۇرىنعى قىزمەتكەرى ەدۆارد سنوۋدەن Twitter الەۋمەتتىك جەلىسىندەگى جەكە پاراقشاسىندا مالىمدەگەن. 16 اقپاندا جاريالانعان اقش سوتىنىڭ شەشىمىنە ول: «بۇل سوڭعى ونجىلدىقتاعى تەحنولوگياعا قاتىستى ماڭىزدى ىستەردىڭ ءبىرى», – دەپ تۇسىنىكتەمە بەرەدى. سوت شەشىمىنە سايكەس, Apple iPhone سمارتفونىن بۇزۋ ءۇشىن فەدەرالدىق تەرگەۋ بيۋروسىنا (فبر) كومەكتەسۋگە مىندەتتى. ال بۇل سمارتفون اقش-تىڭ كاليفورنيا شتاتىنداعى سان-بەرناردينو قالاسىندا مۇگەدەكتەر ورتالىعىنا شابۋىل جاساۋعا قاتىسىپ, كەيىن كوزى جويىلعان تەرروريست سايد فارۋككە تيەسىلى بولعان. ەستەرىڭىزدە بولسا, وتكەن جىلى 2 جەلتوقساندا بولعان تەراكت كەزىندە 14 ادام قازا بولىپ, 21-ءى اۋىر جاراقاتتانعان ەدى. سوت ارنايى قىزمەت ماماندارى سمارتفوندا ورناتىلعان قورعانىس قۇرىلعىسىنان اينالىپ ءوتۋ ءۇشىن Apple-ءدى فەدەرالدىق تەرگەۋ بيۋروسىن ءتيىستى باعدارلامامەن قامتاماسىز ەتۋدى مىندەتتەدى. ەرەجە بويىنشا كومپانيا Phone-داعى مالىمەتتەردى شيفرلاپ قويادى. وعان كىرۋ ءۇشىن قۇپياسوزدى ءبىلۋ شارت. سونداي-اق, قۇرىلعىدا ەگەر ونى تىم كوپ بۇزۋعا تالپىنسا, بارلىق اقپاراتتى جويىپ جىبەرەتىن قورعانىس فۋنكتسياسى ورناتىلعان. «تەرگەۋ بيۋروسى تالاپ ەتىپ وتىرعان تەحنولوگيالىق تۇرلەندىرۋ iPhone-نىڭ 5S نەمەسە ودان دا جوعارى مودەلدەرىن جارتى ساعاتتا بۇزۋعا مۇمكىندىك بەرەدى», – دەيدى بۇل جونىندە ەدۆارد سنوۋدەن. ونىڭ ويىنشا, «حالىق قۇقىقتارى ساقتالاتىنىن ءبىلىپ, Apple-عا سەنىم ارتادى. ال, فەدەرالدىق تەرگەۋ بيۋروسى ازاماتتاردىڭ وسى سەنىمىنە سەلكەۋ تۇسىرەتىن وزگە الەمدى جاساماقشى». Apple كومپانياسىنىڭ باسشىسى تيم كۋك فەدەرالدىق تەرگەۋ بيۋروسىنىڭ تالابىنا كەلىسپەيتىندىكتەرىن مالىمدەدى. كومپانيانى اقش-تاعى بەلدى قۇقىق قورعاۋ ۇيىمدارىنىڭ ءبىرى – امەريكالىق ازاماتتاردىڭ بوستاندىعىن قورعاۋ وداعى (ACLU) قولداپ وتىر. «ۇكىمەت تاراپىنان جاسالعان بۇل قادام – بۇرىن-سوڭدى بولماعان جايت, اقىلعا سىيمايدى ءارى زاڭسىز», – دەدى ءسوز بەن تەحنولوگيا بوستاندىقتارىنا قاتىستى ماسەلەلەرگە مامانداندىرىلعان وداق زاڭگەرىنىڭ ءبىرى الەكس ەبدو. ايتا كەتەيىك, اقش ۇلتتىق قاۋىپسىزدىك اگەنتتىگىنىڭ عالامدىق اڭدۋ باعدارلاماسى تۋرالى مالىمەتتەردى اشكەرەلەگەن ەدۆارد سنوۋدەن 2013 جىلى رەسەيدەن ۋاقىتشا باسپانا العان بولاتىن. ءوز ەلىندە وعان قۇپيا اقپاراتتاردى تاراتقانى ءۇشىن ايىپ تاعىلعان. وسىعان وراي سنوۋدەندى وتانىندا ۇزاق مەزىمدى تۇرمە جازاسى كۇتىپ تۇر. ەلامان قوڭىر. دەرەك: تاسس. سۋرەت: topinfopost.com.