اڭگىمە وزەگى – ءادىل سايلاۋ

پرەزيدەنت جانىنداعى ورتالىق كوممۋنيكاتسيالار قىزمەتىنىڭ جەرگىلىكتى فيليالىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا وبلىستىق بولىمشەسىنىڭ مۇشەلەرى باق وكىلدەرىمەن بريفينگ وتكىزىپ, وندا سايلاۋدى ءادىل دە اشىق وتكىزۋ ماسەلەسى نەگىزگى تاقىرىپ ارقاۋىنا اينالدى. ول تۋرالى بولىمشەنىڭ جە­تەك­شىسى سەرگەي حۋدياكوۆ اڭگىمەلەپ بەردى. ونىڭ سوزىنە قاراعاندا, پارلامەنت ءماجىلىسى سايلاۋى مەن بارلىق دەڭگەيدەگى ءماسليحاتتار سايلاۋىن حالىقارالىق تالاپ­قا ساي ۇيىمداستىرۋدىڭ مۇمكىن­دىكتەرى قوعامدىق ۇيىمدار تاراپىنان دا ءجىتى قاراستىرىلىپ وتىر. ەڭ باستى مىندەت ساياسي ناۋقاندى زاڭعا ساي وتكىزۋ, ءتۇرلى بۇرمالاۋشىلىقتارعا جول بەرمەۋ بولىپ تابىلادى. پارتيالىق ءتىزىم بويىنشا ءوز ۇمىتكەرلەرىن ۇسىنعان ساياسي پارتيالارمەن جۇزدەسۋدىڭ كەستەسى جاسالعان. ول بويىنشا ايتىلعان ۇسىنىستار مەن وتىنىشتەر بارىنشا ەسكەرىلەتىن بولادى, دەي كەلىپ, سەرگەي گەرولدوۆيچ ودان ءارى وبلىس ورتالىعىندا قۇرىلعان قوعامدىق كوميسسيا قۇرامىنا تاجىريبەلى ادامداردىڭ تارتىلعانىن, مۇنداي قۇرىلىمدار اۋدانداردا دا ءوز جۇمىسىن باستاعانىن جەتكىزدى. كوميسسيا مۇشەسى اقلايلەك جاۋكينا ءوز سوزىندە ساياسي ناۋقان كەزىندە زاڭ بۇزۋشىلىقتاردىڭ ورىن الماۋىن باقىلاۋ جانە ونىڭ الدىن الۋ جۇمىستارىمەن اينالىسۋدىڭ ءتيىمدى جولدارى بەلگىلەنگەنىن, دەپۋتاتتىقتان ءۇمى­ت­كەرلەردىڭ سايلاۋالدى شارا­لارىنىڭ زاڭدىلىعىن, بۇقارالىق اقپارات قۇرالدارى ارقىلى ءجۇر­گىزىلەتىن ناسيحاتتاعى تەپە-تەڭدىكتى قاداعالاۋدىڭ ماڭىزىنا توقتالدى. كوميسسياعا ەرىكتىلەر بىرىكتىرىلە وتىرىپ, بۇگىندە ولاردىڭ سانى 700-دەن اسقان. ولاردىڭ ساياسي بىلىكتىلىگىن جەتىلدىرۋ ماقساتىمەن نۇسقاۋلىق كىتاپشالار تاراتىلىپ بەرىلگەن. قىسقا مەرزىمدى سەمينارلار, دوڭگەلەك ۇستەلدەر جەكە جاۋاپكەرشىلىكتەرى مەن بىلىمدەرىن كوتەرۋگە باعىتتالعان. بريفينگكە قاتىسقان سايلاۋدى باي­قاۋ جونىندەگى رەسپۋبليكالىق قوعام­دىق كوميسسيانىڭ جەرگىلىكتى وكىلدەرى سايلاۋ كەزىندە سايلاۋ ۋچاس­كەلەرى بويىنشا بايقاۋشىلار ءرولىن دە اتقاراتىندارىن ءمالىم­دەدى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.