قازاقتىڭ ۇيلەنۋ تويلارىنا ارنالعان, بۇگىندە ۇمىتىلىپ بارا جاتقان بايىرعى سالت-داستۇرلەرى جونىندە جاڭا ءبىر دەرەكتەر شىقتى. وسىنداي ءۇش سالت كورسەتىلگەن كونە سۋرەتتەردى الەۋمەتتىك جەلىنى پايدالانۋشى مارات رايىمحانوۆ جاقىندا ءوزىنىڭ Facebook-تەگى پاراقشاسىندا جاريالادى. ايتۋىنشا, مۇنداي سيرەك كەزدەسەتىن ەرەكشە راسىمدەردى ول اقش كونگرەسىنىڭ كىتاپحاناسى ارحيۆىنەن الىپتى.
«دالا حالىقتارىندا ەجەلدەن قالىڭدىق قاراۋ, ياعني قىز كورۋ دەگەن ءداستۇر بولعان, – دەپ جازادى مارات رايىمحانوۆ وسى ورايدا. – سونىڭ ءبىر نۇسقاسى قازاقتاردا جاقسى ساقتالعان. وسىدان كەلىپ, «قىمىزدى كىم ىشپەيدى, قىزدى كىم ايتتىرمايدى» دەگەن ءسوز قالعان».
سۋرەتكە قاراعاندا, قىز كورۋگە كەلگەن بولاشاق كۇيەۋ جىگىتتىڭ سىنى مەن سيپاتىنا دا قاتتى ءمان بەرىلگەن. ونىڭ وسىنشالىقتى ءيىلۋىنىڭ ءوزى كەلەشەك قايىن جۇرتى مەن قالىڭدىعى الدىنا قول قۋسىرىپ كەلىپ تۇرعانىن بايقاتادى.
تويعا قاتىستى كەلەسى ءداستۇر ىقتيمال كۇيەۋ جىگىتتىڭ ىقتيمال قالىڭدىعىنىڭ شاشىنان سيپاۋى ارقىلى كورىنىس بەرەدى. وسى ارقىلى ونىڭ بولاشاق جۇبايىن قانشالىقتى قۇرمەت تۇتىپ, سىيلايتىنى اڭعارىلعان.
بۇل سالت قىز تەك ءوز جۇرەگىنەن ورىن العان ادامعا عانا شاشىنان سيپاۋعا رۇقسات ەتەدى, دەگەندى بىلدىرسە كەرەك.
سۋرەتتەردىڭ سوڭعىسىندا «كەمپىر ءولدى» دەگەن ريتۋال بەينەلەنگەن. مۇنىڭ جاڭعىرىعى وسى كۇنگە دەيىن كەلىپ جەتتى. كۇيەۋ جىگىت قالىڭدىعىن الىپ قايتۋعا كەلگەن كەزدە ونىڭ الدىنان ءبىر كەمپىردىڭ قۇلاي كەتۋى وسىلاي اتالادى. جولدى بوگەپ جاتىپ العان ول تەك وزىنە ارنايى سىيلىق بەرىلگەن كەزدە عانا «ءتىرىلىپ», ورنىنان تۇرىپ كەتەدى.
بۇگىندە جادىگەرگە اينالىپ, وتكەن كۇننىڭ ورەشەگىندە كەتىپ بارا جاتقان بۇل كورىنىستەر حالقىمىزدىڭ كەشەگىسىنەن ءبىرشاما ماعلۇمات بەرە الاتىندىعىمەن قۇندى بولىپ وتىر.
رۋسلان يگىلىك.
