الماتى. 15 اقپان. كەڭەس اسكەرلەرىنىڭ اۋعانستان جەرىندەگى مايداننان شىعارىلعانىنا 27 جىل تولۋىنا وراي, 28 پانفيلوۆشىلار اتىنداعى ساياباقتا ماڭگىلىك الاۋ مەن ينتەرناتسيوناليست-جاۋىنگەرلەرگە ارنالعان ەسكەرتكىشكە گۇل شوقتارى قويىلدى. بۇل تۋرالى egemen.kz ءتىلشىسى حابارلادى.
سالتاناتتى شاراعا ۇلى وتان سوعىسى مەن اۋعان سوعىسىنىڭ ارداگەرلەرى, الماتى قالالىق ارداگەرلەر كەڭەسىنىڭ وكىلدەرى, الماتى گارنيزونى اسكەري بولىمشەلەرىنىڭ باسشىلىعى مەن جاۋىنگەرلەرى جانە قالا تۇرعىندارى قاتىستى.
ەسكە الۋ جيىنىندا الدىمەن ءسوز العان اۋعان سوعىسىنىڭ داڭقتى باتىرى, «قارا مايور» بوريس كەرىمباەۆ جينالعان قاۋىمدى تاريحي كۇنمەن قۇتتىقتادى, ينتەرناتسيوناليست جاۋىنگەرلەردىڭ ەرلىكتەرى مەن قۇرباندارىنىڭ ەسىمى ەشقاشان دا ۇمىتىلمايتىندىعىن ەسكە سالدى.
بۇدان كەيىن ءسوز سويلەگەن اۋعان سوعىسىنىڭ ارداگەرلەرى مەن جۇرتشىلىق وكىلدەرى 1989 جىلى 15-ءشى اقپان كۇنى كەڭەس اسكەرلەرى اۋعانستان اۋماعىنان ءبىرجولا شىعارىلعانىن, بەيبىت ادامداردىڭ ءومىرىن جويعان قاسىرەتتى سوعىستىڭ 1979 جىلدىڭ جەلتوقسان ايىنان 1989 جىلدىڭ 15-ءشى اقپانىنا دەيىن سوزىلعانىن كۇڭىرەنىپ ايتتى. قازاقستان تاريحىنىڭ بەتتەرىندە بۇل سوعىسقا 22 269 قازاقستاندىق جاۋىنگەردىڭ قاتىسقانى, ونىڭ 924-ءى قازا تاۋىپ, 1015 جاۋىنگەر ەلگە مۇگەدەك بولىپ ورالعانى, 19 جاۋىنگەردىڭ ءىز-ءتۇسسىز جوعالىپ كەتكەنى جازىلدى.
جيىن سوڭىندا الماتى گارنيزونىنىڭ جاۋىنگەرلەرى مەن اسكەري جوعارى وقۋ ورىندارىنىڭ كۋرسانتتارى ارداگەرلەرگە قۇرمەت كورسەتىپ, سالتاناتپەن ساپ تۇزەپ, ادىمداپ ءجۇرىپ ءوتتى.
تالعات ءسۇيىنباي.
دەرەك, سۋرەت: egemen.kz.
