جامبىل وبلىسىندا كومەك كورسەتپەگەن پوليتسەيلەر جازاعا تارتىلدى

تاراز. 15 اقپان. سارىسۋ اۋدانىندا اپاتقا ۇشىراعان جاندارعا ەشقانداي كومەك كورسەتپەگەن ەكى پوليتسيا قىزمەتكەرى جازاعا تارتىلدى. بۇل تۋرالى en.kz ءتىلشىسى حابارلادى. 2015 جىلدىڭ جاز ايىندا ساۋداكەنت اۋىلى ماڭىندا ەكى ۋچاسكەلىك ينسپەكتور «لادا گرانتا» كولىگىن توقتاتقان. بىراق كولىك يەسى پوليتسيانىڭ تالابىنا باعىنباي, قاشا جونەلىپتى. جۇرگىزۋشىنىڭ قاسىندا ءبىر جولاۋشى بولعان. سونىڭ كەسىرىنەن پوليتسيادان قاشقان كولىك جۇرگىزۋشىسى رۋلگە يە بولا الماي, اۋدارىلىپ, اپاتقا ۇشىراعان. ال, پوليتسيا قىزمەتكەرلەرى ەشقانداي مەديتسينالىق كومەك كورسەتپەستەن زارداپ شەگۋشىلەردى وقيعا ورنىنا تاستاپ كەتىپتى. اپات سالدارىنان كولىكتەگى جولاۋشى ەسىن جيماستان سارىسۋ اۋداندىق ورتالىق اۋرۋحاناسىندا قايتىس بولدى. ال, كولىك جۇرگىزۋشىسىنىڭ ميى شايقالعان. سوت ەكى پوليتسيا قىزمەتكەرىن دە شەندەرىنەن ايىرىپ, پروباتسيالىق باقىلاۋ مەرزىمىمەن ەكى جىلعا باس بوستاندىعىنان ايىرۋعا جازا كەستى. ورالحان ءداۋىت. دەرەك, سۋرەت: egemen.kz