جاسوسپىرىمدەر وليمپياداسى. قورجىنعا العاشقى مەدال ءتۇستى

استانا. 15 اقپان. نورۆەگيانىڭ ليللەحاممەر قالاسىندا ءوتىپ جاتقان جاسوسپىرىمدەر اراسىنداعى ءىى قىسقى وليمپيادا ويىندارىندا قازاقستان قورجىنىنا العاشقى مەدال ءتۇستى. ونى بياتلوننان ارينا پانتوۆا ەنشىلەدى. بۇل تۋرالى ۇلتتىق وليمپيادا كوميتەتىنىڭ رەسمي سايتى Olympic.kz-كە سىلتەمە جاساعان egemen.kz ءتىلشىسى حابارلادى. التى شاقىرىمدىق سپرينتتىك جارىستا سىنعا تۇسكەن ارينا نەمىس قىزى دجۋليانا فرۋەۆيرت پەن نورۆەگ مارتا كراكشتاد يوحانسەنگە ەسە جىبەردى. گەرمانيالىق سپورتشى مارەگە 18 مينۋت 23,5 سەكۋند ۋاقىتتا كەلسە, نورۆەگيالىق ودان 5,6 سەكۋندقا قالىپ قويدى. ال وتانداسىمىز مارەگە جەڭىمپازدان 17,1 سەكۋندقا كەشىگىپ جەتتى. وسى رەتتە, يوحانسەندە – ءبىر, ال پانتوۆادا ەكى ايىپ اينالىمى بولعانىن اتاپ وتكەن ءجون. وسى سايىستا باق سىناعان تاعى ءبىر قازاقستاندىق ەۆگەنيا كراسيكوۆا 15-ورىننان كورىندى. ال سپرينتتىك جارىستىڭ ەرلەر باسەكەسىندە جەرلەسىمىز يۆان دارين 26-ورىندى مىسە تۇتتى. ەلامان قوڭىر. دەرەك: olympic.kz. سۋرەت: lillehammer2016.com.