بۇگىن قازاقستان قولا جۇلدە ءۇشىن سەربيامەن سىنعا تۇسەدى

استانا. 13 اقپان. بۇگىن سەربيانىڭ استاناسى – بەلگراد قالاسىندا ءوتىپ جاتقان فۋتزالدان ەۋروپا چەمپيوناتى مارەسىنە جەتەدى. تۋرنيرگە العاش رەت قاتىسىپ, جارتىلاي فينالعا دەيىن جەتكەن قازاقستان قۇراماسى قولا جۇلدە ءۇشىن تالاستا الاڭ يەسى سەربيامەن سىنعا تۇسەدى. بۇل تۋرالى egemen.kz ءتىلشىسى حابارلادى. ويىن استانا ۋاقىتى بويىنشا ساعات 23:30-دا باستالادى. «قازاقستان» ۇلتتىق تەلەارناسى ماتچتى تىكەلەي ەفيردە كورسەتەدى. ترانسلياتسيا 23:20-دا باستالادى دەپ كۇتىلۋدە. ال جارىستىڭ فينادىق ويىنى استانا ۋاقىتى بويىنشا ساعات تۇنگى 02:00-دە وينالادى. شەشۋشى سىندا رەسەي مەن يسپانيا قۇرامالارى كەزدەسەتىنىن اتاپ وتكەن ءجون. ايتا كەتەيىك, برازيليالىق مامان كاكاۋ جاتتىقتىراتىن قازاقستان قۇراماسى ەۋروپا چەمپيوناتىنىڭ فينالدىق كەزەڭىنە ءبىرىنشى رەت شىعىپ وتىر. توپتىق كەزەڭدەگى تۇساۋكەسەر ويىندا رەسەيدەن 1:2 ەسەبىمەن جەڭىلگەن وتانداستارىمىز, ەكىنشى كەزدەسۋدە حورۆاتيادان 4:2 ەسەبىمەن باسىم ءتۇستى. ال شيرەك فينالدا قازىرگى ەۋروپا چەمپيونى يتاليانى 5:2 ەسەبىمەن جەڭىپ, سەنساتسيا جاسادى. جارتىلاي فينالدا كارى قۇرلىقتىڭ 6 دۇركىن چەمپيونى يسپانياعا لايىقتى قارسىلىق كورسەتتى. الايدا, ساتتىلىك يسپاندار جاعىندا بولىپ, ءبىزدىڭ جىگىتتەر قارسىلاستارىنا 3:5 ەسەبىمەن جول بەردى. ەلامان قوڭىر. دەرەك: egemen.kz. سۋرەت: uefa.com.