قىزىلوردا. 13 اقپان. قىزىلوردا قالاسىنىڭ اكىمى نۇرلىبەك نالىباەۆ حالىق الدىندا ەسەپ بەردى. جىلدى قورىتىندىلاۋ جيىنىنا ايماق باسشىسى قىرىمبەك كوشەرباەۆ قاتىستى. بۇل تۋرالى egemen.kz ءتىلشىسى حابارلادى.
الدىمەن قالالىق جەرگىلىكتى پوليتسياسى قىزمەتىنىڭ باسشىسى, پودپولكوۆنيك قۋانىش شۇكىروۆ ەسەپ بەردى. ونىڭ ايتۋىنشا, جاڭا جىلدان ءوز جۇمىسىن باستاعان جەرگىلىكتى پوليتسيا تيىمدىلىگىن كورسەتىپ وتىر.
ال شاھار باسشىسى وبلىس ورتالىعىندا جىل بويى اتقارىلعان جۇمىستاردى سارالاپ, الداعى جوسپارلارىمەن ءبولىستى. بىلتىر جاڭا ءوندىرىس ورىندارى اشىلىپ, جۇمىسسىزدىق دەڭگەيى ازايدى. مەملەكەتتىك باعدارلامالار ورىندالۋى, الەۋمەتتىك-ەكونوميكالىق قولداۋدىڭ ارتقاندىعىن سالىستىرمالى كورسەتكىشتەن انىق اڭعارىلادى.
ماسەلەن, قالانىڭ تايقازانى 90,3 پايىزعا ارتقان. نەگىزگى كاپيتالعا سالىنعان قارجى كولەمى 127 ملرد. 341 ملن. تەڭگە بولىپ, وبلىسقا سالىنعان بارلىق ينۆەستيتسيانىڭ 54 پايىزىن قۇرادى. ەكونوميكالىق قيىندىقتارعا قاراماستان قىزىلوردادا ينفراقۇرىلىمدى جاڭعىرتۋ, تازا اۋىز سۋعا كوشۋ, سول جاعالاۋمەن بايلانىستىراتىن كوپىردىڭ قۇرىلىسى سەكىلدى اۋقىمدى ينۆەستيتسيالىق جوبالار جۇزەگە اسۋدا.
«سوڭعى ءۇش جىلدا وبلىس ورتالىعىن دامىتۋعا 180 ملرد. تەڭگە قارجى ءبولىندى. ونداعان ينۆەستيتسيالىق جوبالار جاساقتالىپ, جۇزەگە اسىرىلۋدا. وسى ارالىقتا سول جاعالاۋدىڭ باس جوسپارى جاساقتالىپ, شىنى زاۋىتى قۇرىلىسى جۇرگىزىلۋدە. ءۇش جىل بۇرىن جۇمىسىمىزدى باستاعاندا قالانىڭ ينجەنەرلىك-كوممۋنيكاتسيالار جەلىلەرىنىڭ 75 پايىزى توزىعى جەتكەن ەدى. قازىر ارىپتەستىك اياسىندا ەۋروپالىق قايتا قۇرۋ جانە دامۋ بانكىمەن ولاردى قايتا جاڭعىرتتىق. جاقىندا ەل ۇكىمەتى قىزىلوردا قالاسىندا قۋاتتىلىعى 450 مۆت بۋ-گاز ەلەكتر ستانتسياسىن سالۋ جونىندە شەشىم قابىلداندى. وبلىسىمىز دامۋ ديناميكاسى بويىنشا ۇزدىك 3-4 ورىنداردى تۇراقتى تۇردە يەلەنۋدە. جۇمىسىمىز وسى قارقىنمەن ءارى قاراي جالعاسادى», دەدى وبلىس اكىمى قىرىمبەك كوشەرباەۆ.
ەرجان بايتىلەس.
دەرەك, سۋرەت: egemen.kz
