ورلەگەن ءوندىرىس

ايماقتا ۇدەمەلى يندۋس­تريالىق-يننوۆا­تسيا­لىق دامۋ مەملەكەتتىك باع­دار­لاماسى اياسىندا جۇزەگە اسقان جوبانىڭ ءبىرى – كەراميكالىق كۇيدىرىلگەن كىرپىش شىعارۋ زاۋىتى. «ماكسيما لوگيستيكس قازاق­ستان» سەرىكتەستىگى قولعا العان كە­را­ميكالىق كىرپىش شىعاراتىن زاۋىت ءساۋىر ايىنان باستاپ ىسكە قوسىلدى. جالپى قۇنى 300 ميلليون تەڭگەنى قۇرايتىن ءوندىرىس ورنى ۋكراينالىق «كراسنىي وكتيابر» كومپانياسىنىڭ تەحنولوگياسىمەن جابدىقتالعان. بۇگىندە مۇندا ەكى ءتۇرلى پىشىندەگى م125 ماركالى كەراميكالىق كىرپىش شىعارىلادى. وتاندىق ءونىم ءوندىرۋدى قولعا العان زاۋىت كۇنىنە شامامەن 28 مىڭنان استام كەراميكالىق كىرپىش شىعارادى. قازىر مۇندا قىرىققا جۋىق ادام تۇراقتى جۇمىسپەن قامتىلعان. زاۋىتتاعى قىزۋ تىرلىك تۇنگى 11-دە باستالىپ, تاڭعى 7-دە اياقتالادى. سەبەبى, بۇل ۋاقىتتا توق كوزىن پايدالانۋ ءتيىمدى دەيدى ماماندار. «بۇل كاسىپورىننىڭ قالىپتاسۋ كەزەڭىندەگى قاتاڭ ەكونوميكالىق ساياساتىنىڭ ءبىرى دەۋگە بولادى. ەلەكتر ەنەرگياسىنىڭ سارالانعان تاريفتەرىن قولدانۋ شىعىندى ەداۋىر ازايتۋعا كومەكتەسەدى. ءبىز­دىڭ زاۋىت وسىنداي جوعارى سا­پا­دا كەراميكالىق كىرپىش ءوندى­رە­تىن قىزىلورداداعى جالعىز كاسىپورىن», دەيدى زاۋىت ديرەكتورى سەرىك باپالاقوۆ. «ماكسيما لوگيستيكس قازاق­ستان» جشس زاۋىتى تولىعىمەن اۆتوماتتاندىرىلعان. ادام كۇشىن اسا قاجەت ەتپەيدى. جىلىنا 15 ميلليون دانا كىرپىش وندىرۋگە قاۋقارلى كاسىپورىندا بۇگىندە قارقىندى جۇمىس ءجۇرىپ جاتىر. شيكىزات ارنايى كارەردەن الىنىپ, زاۋىتقا جەتكىزىلەدى. سودان كەيىن توپىراق ۇساقتالىپ, ىلعالداندىرىلادى. ارنايى اپپارات ارقىلى قالىپقا قۇيىلىپ, كىرپىش بولىپ شىعادى. ىلعال كىر­پىشتى ارنايى تەحنيكانىڭ كو­مە­گىمەن پەشكە سالىپ, 870 گرا­دۋستا قىزدىرادى. ىستىققا ابدەن كۇيدىرىلگەن كەراميكالىق كىر­پىشتىڭ ساپاسى جوعارى, ەڭ باس­تىسى, سۋىققا ءتوزىمدى. باعاسى دا كوپشىلىككە قولجەتىمدى. كۇن ساناپ كوركەيىپ, قۇرىلىسى قارقىن العان ايماقتا اتالعان ونىمگە دەگەن سۇرانىس جوعارى. كا­سىپ يەسى الداعى ۋاقىتتا ءوز ءونىم­دەرىن پايدالانىپ, ءزاۋلىم نىساندار تۇرعىزباق نيەتتە. نۇربەك داۋرەنبەكوۆ, جۋرناليست. قىزىلوردا وبلىسى.