قازاق كۇرەسى ازيا ويىندارىنا قوسىلدى

جاقىندا تۇركيانىڭ ىستامبۇل قالاسىندا دۇنيەجۇزى كۇرەس تۇرلەرى قاۋىمداس­تىعىنىڭ (United World Wrestling) فورۋمى ءوتتى. وسى جيىندا قازاق كۇرەسى جابىق عيماراتتا وتەتىن ازيا ويىندارىنىڭ باعدارلاماسىنا كىردى. بۇل جارىس 2017 جىلى تۇرىكمەنستاننىڭ اشعاباد قا­لاسىندا وتەدى. ال بيىل 22-24 ماۋسىم كۇندەرى وسى قالادا ءتول كۇرەسىمىزدەن سىناق تۇرىندە بەلدەسۋلەر وتكىزىلەدى. ىستامبۇلدا وتكەن فورۋمعا قازاقستان اتىنان دۇنيەجۇزى قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى, ازيا فەدەراتسياسىنىڭ پرەزيدەنتى مارات ءشامشىنۇروۆ قاتىسىپ, ءتول كۇرەسىمىزدىڭ تاريحى, قازىرگى كەز­دەگى دامۋ دەڭگەيى تۋرالى بايان­­داما جاسادى. جيىندا قا­زاق­ستان وكىلىنىڭ بايان­داماسى كوپتىڭ كوڭى­لىنەن شىعىپ, ۇلتتىق كۇرەسىمىز ءبىراۋىزدان جابىق عيماراتتا وتەتىن ازيا ويىندارىنىڭ باعدار­لاماسىنا قوسىلدى. – فورۋمعا 100-دەن اس­تام ۇلتتىق كۇرەس تۇرلەرىنىڭ فە­دەراتسيالارىنىڭ وكىلدەرى قا­تىستى. ونىڭ ىشىندە الىش, تاتار كۇرەسىنىڭ, سىرىم كۇرە­سىنىڭ باسقا دا كوپتەگەن ۇلتتىق كۇرەس تۇرلەرىنىڭ وكىلدەرى بولدى. سىرىم – يران كۇرەسى. وسى جيىندا ءبىزدىڭ ەل تاعى ءبىر ماقساتىنا جەتتى. قازاق كۇ­رەسى جابىق عيماراتتا وتەتىن ازيادانىڭ باعدارلاماسىنا كىردى. ەندى بيىل جازدا اشعاباد قالاسىندا سىناق جارىستارى وتەدى. وندا ازيا وليمپيالىق كوميتەتىنىڭ پرەزيدەنتى ءال-ساباح پەن دۇنيەجۇزى كۇرەس تۇرلەرى قاۋىمداستىعىنىڭ پرەزيدەنتى نەناد لالوۆيچ باستاعان توپ قازاق كۇرەسىنىڭ بەلدەسۋلەرىنە باعا­لارىن بەرەدى, – دەدى م.ءشام­شىنۇروۆ. ونىڭ ايتىنشا, ەگەر قازاق كۇرەسى سىناق جارىستاردان ءسۇ­رىنبەي وتسە, وندا جازعى ازيا ويىندارىنىڭ باعدارلاماسىنا كىرەدى. بۇل جارىس 2018 جىلى يندونەزيانىڭ دجاكارتا قالا­سىندا وتەدى. داستان كەنجالين. «ەگەمەن قازاقستان».