جەردى پايدالانۋداعى جەڭىلدىكتەر

ۇلتتىق ەكونوميكا مينيسترلىگى «100 ناقتى قادام» ۇلت جوسپارىنىڭ 35-قادامىن ىسكە اسىرۋ ماقساتىندا اۋىل شارۋاشىلىعى ماقساتىنداعى جەرلەردى جەكەمەنشىككە بەرۋدى ىنتالاندىرۋ ءۇشىن «قازاقستان رەسپۋبليكاسىنىڭ جەر كودەكسىنە وزگەرىستەر مەن  تولىقتىرۋلار ەنگىزۋ تۋرالى» زاڭ جوباسىن ازىرلەدى. 2015 جىلعى 2 قاراشاداعى «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ­مەن جەر كودەكسىنە تۇزەتۋلەر ەنگىزىلدى. جاڭا قۇقىقتىق نورمالار بويىنشا اوك-تە جۇمىس ىستەيتىن سۋبەكتىلەرگە ولار جالعا العان جەرلەردى كاداستر­لىق قۇنى­­نىڭ 50 % مولشەرىندە ايقىندالاتىن جەڭiلدiك باعامەن 10 جىلعا دەيىن ءبولىپ تولەۋ ارقىلى الۋعا بولادى. سونىمەن قاتار, شەتەلدىك ينۆەستورلارعا دا پرەفەرەنتسيالار بەلگىلەنگەن: شەتەلدىك كومپانيالار ءۇشىن جەردى جالعا بەرۋ مەرزىمى 10 جىلدان 25 جىلعا دەيىن ۇزارتىلعان. جەر كودەكسىنە ەنگىزىلگەن تۇزەتۋلەر مەملەكەت مەن­شىگىن­دەگى اۋىل شارۋاشىلىعى ماقساتىنداعى جەر ۋچاس­كە­لەرىن جەكەمەنشىككە اۋكتسيون ارقىلى بەرۋدى كوزدەيدى. جەر ۋچاسكەلەرى قر جەكە جانە زاڭدى تۇلعالارىنا جەكەمەن­شىك قۇقىعىمەن مىناداي رەتپەن اۋكتسيونداردا ساتۋ ارقىلى بە­رىلەدى: – جەر ۋچاسكەسىنىڭ كاداسترلىق (باعالاۋ) قۇنىن ارتتىرۋدى كوزدەيتىن اۋكتسيون ارقىلى; – ەگەر ەكى اۋكتسيوننىڭ قورىتىندىلارى بويىنشا ۋچاسكە ساتىلماسا, وندا ول ۋچاسكەنىڭ باعاسىن كاداسترلىق قۇ­نىنىڭ بەل­گى­ەنگەن ەڭ تومەنگى شەگىنە (كاداسترلىق قۇنىنىڭ 50 %) دەيىن تومەندەتۋدى كوزدەيتىن اۋكتسيونعا قويىلاتىن بولادى. جالعا بەرىلگەن جەر ۋچاسكەلەرىن ساتىپ الۋ بويىنشا جەڭىل­دىك شارتتارى. جەر پايدالانۋشىلارعا بۇرىن بەرىلگەن اۋىل شارۋا­شى­لىعى ماقساتىنداعى جەر ۋچاسكەلەرىن جالداۋ مەرزىمى اياق­تالعانعا دەيىن 10 جىلعا دەيىن ءبولىپ تولەۋ ارقىلى, ولار­دىڭ كاداسترلىق قۇنىنىڭ 50 % مولشەرىندە ايقىن­دالاتىن جەڭiلدiك باعامەن جەكەمەنشىككە ساتىپ الۋعا قۇقىق بەرەدى. جالعا الىنعان اۋىل شارۋاشىلىعى ماقساتىنداعى جەرلەردى پايدالانۋ بويىنشا شەكتەۋلەر الىپ تاستالادى. نورما جەردى پايدالانۋشىلارعا جالعا الۋ قۇقىعىمەن قۇ­قىقتىق مامىلەلەر جاساسۋعا, اتاپ ايتقاندا, بانككە كەپىلگە بەرۋگە, جالداۋ مەرزىمى ىشىندە يەلىكتەن شىعارۋعا (قوسالقى جالداۋعا تابىستاۋدان باسقا) مۇمكىندىك بەرەدى. زاڭمەن ەنگىزىلگەن وزگەرىستەر 2016 جىلعى 1 شىلدەدەن كۇشىنە ەنەدى. ۇلتتىق ەكونوميكا مينيسترلىگى ەكونوميكا ينفراقۇ­رى­­لىمىن دامىتۋ دەپارتامەنتى ديرەكتورىنىڭ ورىنباسارى گۋلجاحان بيمەندينا «زاڭنىڭ قابىلدانۋى اگرارلىق سەكتوردىڭ دامۋىنا, جۇمىس ورىندارىن قۇرۋعا, سونداي-اق, اۋىلشارۋاشىلىق وندىرىسىنە قوسىمشا ينۆەستيتسيالاردى تارتۋعا مۇمكىندىك تۋعىزادى», دەپ ءتۇسىندىردى. «ەگەمەن-اقپارات».