كوپباەۆتار كوپ بولسا!

  بۇقارالىق سپورت دەگەندە قالالىقتاردىڭ قاعاناعى قارق, ساعاناعى سارق. ۇيدەن اتتاپ شىقساڭ بولدى – تاڭداعان سپورتىڭنىڭ جالىنا قول سالاسىڭ... وسىعان قاراپ وتىرىپ اۋىلدىقتاردى ايايسىڭ. جازدى قويشى, توپىراقتى شاڭداتساڭ دا دوپ تەۋىپ, فۋتبول وينايسىڭ. ال قىس بالاسى شە؟ كەشكە قاراي جۇمىسىنان كەلىپ, مالىن جايعاپ بولعان سوڭ ءبىر ۋاق دەنەنىڭ قۇرىس-تىرىسىن جازايىن دەسە جۇرتتىڭ بارار جەرى جوق. مەكتەپتىڭ اياداي عانا سپورت زالىنا سوقتالداي-سوقتالداي جىگىتتەر قايدان سىيا قويسىن جانە دە قالاي دەگەنمەن دە, وقۋشى بالالارعا ارنالعان مەملەكەتتىك مەكەمە عوي ول. تۇنەۋگۇنگە دەيىن جاڭاارقا اۋدانىن­داعى تۇگىسكەن دەگەن اۋىلداعى احۋال دا تۋرا وسىنداي بولىپ كەلگەن ەدى. ال قازىرگى جاعدايى ادام تانىماستاي وزگەرگەن. ايا­داي عانا اۋىلدا جەرگىلىكتى شارۋا قوجا­لىعىنىڭ باسشىسى قايرات كوپباەۆ دەگەن مىرزا قالتاسىنان 110 ميلليون تەڭگە شىعارىپ, سپورت كەشەنىن سالىپ بەردى. البەتتە, تۇكپىردەگى تۇگىسكەنگە وسىنداي تارتۋ جاساعان فەرمەردىڭ بۇل تىرلىگىن «بيز­نەستىڭ الەۋمەتتىك جاۋاپكەرشىلىگى» دەپ تە جالاۋلاتۋعا بولادى. پرەزيدەنتىمىزدىڭ كاسىپكەرلەردى ەلدىڭ مۇقتاجىنا قاراي­لاسۋعا شاقىرعان ۇندەۋىنە مۇباراك ىسپەن جاۋاپ بەرگەن ىرىلىك دەپ باعالاعانعا دا سىيادى مۇنىڭىز. قالاي دەگەنمەن دە, قايرات كوپباەۆ دەگەن اتىمتاي-جومارت ازاماتتىڭ تۋعان جەرگە دەگەن پەرزەنتتىك ما­حابباتى مەن ۇلكەن ادامگەرشى­لىگىن اۋىزعا الدىمەن العان ءجون شىعار. قايرەكەڭنىڭ ءوزى كوپبالالى وتباسىنان شىققان. ەڭبەكپەن كوزىن تىرناپ اشقان جان. وسى كۇنىنە ءوز ماڭداي تەرىمەن جەتكەن ەر ەكەن. بۇگىندە ەڭبەگى جانىپ, تاسى ورگە دومالاعان. وزىنەن ارتىلعانمەن اعايىنعا قارايلاسىپ, ەندى, مىنە, تۋعان اۋىلىنا دا شاراپاتىن تيگىزىپ وتىر. كوسەگەڭ كوگەرگىر كوپباەۆتىڭ «ماقسات» دەپ اتالاتىن شارۋا قوجالىعى قازاقتىڭ اقباس تۇقىمدى سيىرىن وسىرۋمەن اينالى­سادى. بۇگىنگى كۇندە اتالعان شارۋا قوجا­لىعىندا 30-عا تارتا ادام ەڭبەك ەتىپ, بالا-شاعاسىن اسىراپ جاتىر. كاسىپكەردىڭ بولاشاققا دەگەن جوسپارى دا كوڭىل سۇيسىنتەدى. الداعى ۋاقىتتا ول سپورت كەشەنىنە جاپسارلاستىرىپ باسسەين سالماقشى. ودان كەيىن كىشىگىرىم قو­ناقۇي دە بوي كوتەرمەك. بۇل دەگەنىڭىز, تۇگىس­كەن­گە تۇكپىر-تۇكپىردەن سپورتشىلار كەلىپ, سپورت­تىڭ نەشەمە تۇرىنەن تۋرنيرلەر وتەدى دەگەن ءسوز. سودان كەيىن كاسىپكەر ەكى «گازەل» اۆتو­كولىگىن ساتىپ الماقشى. ءبىرىن مەكتەپكە, ەكىنشىسىن سپورتشىلارعا تارتۋ ەتپەك. اۋىلدىڭ ازاماتى وسىنداي يگى ىستەردى تىندىرىپ تاستاعاندا اۋدان, وبلىس باسشىلارى دا سىرتتان باعىپ قانا تۇرمادى. اۋدان اكىمى عابدراحمان وماروۆ ءوزى قاداعالاپ, كاسىپكەرگە قۇرىلىسقا دەپ جەر بەردى, سۋ, ەلەكتر جانە جىلۋمەن قامتاماسىز ەتتىردى. ال وبلىستىڭ اكىمى جاڭا سپورت كەشەنىنە دەپ كۇرەس كىلەمىن سىيعا تارتتى. بۇل كىلەم سول كۇنى ۇزىندىعى 36 مەتر بولاتىن سپورت زالىنا توسەلدى. زالدىڭ بوس قالعان ەكىنشى جارتىسىنا ۆولەيبول, باسكەتبول جانە ميني-فۋتبول ويناۋعا ابدەن بولادى. جالپى, بۇل جەردە سپورتشى قاۋىمعا بارلىق جاعداي جاسالعان. شەشىنەتىن جەر, جۋىناتىن بولمەلەر, جاتتىعۋ زالى بار. قالانىكىنەن ءبىر دە كەم ەمەس. جاڭا سپورت كەشەنى بىلىكتى مامان – جات­تىقتىرۋشىسىز جەتىمسىرەپ تۇرار ەدى. ال بۇل جاعىنان تۇگىسكەندىكتەردىڭ جولى بولدى دەپ نىق سەنىممەن ايتۋعا بولادى. ويتكەنى, اۋىلدا كۇرەستىڭ جىلىگىن شاعىپ, مايىن ءىش­كەن ماماندار بارشىلىق. سولاردىڭ ءبىرى – تۇگىسكەن ورتا مەكتەبىندە دەنە تاربيەسى ءپانىنىڭ مۇعالىمى بولىپ جۇمىس ىستەيتىن حاليل ابەنوۆ. ءحاليلدىڭ ءوزى كەزىندە كۇ­رەس­كەن, كسرو سپورت شە­بەرى, قازىر دزيۋدو جانە قازاق كۇرەسىنەن جاتتىقتىرۋشى. ونىڭ شاكىرتتەرى دە ءبىراز بەلەستەردى باعىن­دىرىپتى. بۇگىنگى كۇندە سپورت كەشەنى 80 پايىزعا كەرەك-جاراقپەن جابدىقتالعان. جەتىسپەگەن سپورتتىق قۇرالدارعا تاپسىرىس بەرىلىپتى, قالادان انە-مىنە اكەلىنۋى ءتيىس دەپ كۇتىپ وتىرعان جايلارى بار. جاڭا سپورت كەشەنىنىڭ سالتاناتتى جاع­دايدا وتكەن اشىلۋ راسىمىندە اۋىل اق­ساقالى قوجانتاي وماروۆتىڭ اق باتاسىنان كەيىن, جاڭاارقانىڭ جام­پوزى, سامبو كۇرەسىنەن الەم كۋ­بو­گى­نىڭ يەگەرى, قازاقستاننىڭ ەڭبەك ءسىڭىر­گەن جات­تىق­تى­رۋشىسى, بۇگىنگى كۇن­دە وليم­پيادا رە­زەرۆ­تەرىن دايارلاۋ ورتا­لىعىنىڭ ديرەكتورى بولىپ قىزمەت ەتەتىن جانات بايشولاقوۆ قۇتتىقتاۋ ءسوز سويلەدى. مەملەكەت باسشىسى ءوزىنىڭ كەزەكتى ءبىر جولداۋىندا 2020 جىلعا دەيىن قا­زاق­تاندىقتاردىڭ 30 پايىزى بۇقارالىق سپورتپەن شۇعىلدانۋى كەرەك دەگەن مىندەت قويدى. قۋ تاقىرعا ءشوپ شىقپايتىنى سەكىلدى, سپورتتىق ينفراقۇرىلىم بولماسا, ماقساتى ايقىن بۇل مەجەگە قولجەتكىزە قويۋدىڭ ءوزى قيامەت-قايىم ءىس قوي. ال بۇل باعىتتا تۇگىسكەننىڭ ۇپايى تۇگەل. ويتكەنى, بۇل اۋىلعا سپورتقا دەگەن جاناشىرلىقتىڭ ءدانى سىڭگەن. قايرات ءابىلدينوۆ, «ەگەمەن قازاقستان». نۇرلان ءابىلدين, جۋرناليست. قاراعاندى وبلىسى, جاڭاارقا اۋدانى.