استانا. 11 اقپان. مادەنيەت جانە سپورت مينيسترلىگىندە ريو-دە-جانەيرو قالاسىندا وتەتىن XXXI جازعى وليمپيا ويىندارىنا قاتىساتىن سپورتشىلاردىڭ سپورتتىق كيىمىنە ارنالعان كوميسسيانىڭ ەكىنشى وتىرىسى ءوتتى. بۇل تۋرالى egemen.kz ءتىلشىسى حابارلادى.
وتكەن وتىرىستا كوميسسيانىڭ شەشىمىمەن سپورتشىلاردىڭ كيىمىن تىگۋگە مەملەكەتتىك تاپسىرىستى وتاندىق كومپانيالارعا بەرۋ جونىندە شەشىم قابىلدانىپ, ەسكيزدەر, كيىم ۇلگىلەرى مەن وعان قويىلاتىن تالاپتار ۇسىنىلعان بولاتىن. بۇل جولى ءبىرىنشى وتىرىستاعى ۇسىنىستار ەسكەرىلىپ, سپورتشىلار فورماسىنىڭ ناقتى ديزاينى بەلگىلەندى.
كوميسسيا وتىرىسىنا مادەنيەت جانە سپورت مينيسترلىگى مەن ۇلتتىق وليمپيا كوميتەتىنىڭ وكىلدەرى, وليمپيادا چەمپيوندارى يۋري مەلنيچەنكو, ولگا شيشيگينا, سەرىك ساپيەۆ پەن ديزاينەرلەر قاتىستى.
داستان كەنجالين.
دەرەك, سۋرەت: egemen.kz
