قىزىلوردالىق كاسىپكەر 58 ميلليون تەڭگەگە جۋىق قارىزىن قايتارىپ الادى

قىزىلوردا. 11 اقپان. قىزىلوردالىق كاسىپكەر 58 ميلليون تەڭگەگە جۋىق قارىزىن قايتارىپ الادى.بۇل تۋرالى كاسىپكەرلەر پالاتاسى ديرەكتورىنىڭ مىندەتىن اتقارۋشى دارحان مىرزاليەۆتىڭ ايتۋى بويىنشا egemen.kz ءتىلشىسى حابارلادى. وتكەن جىلى «اتامەكەن» ۇلتتىق كاسىپكەرلەر پالاتاسىنا قىزىلوردالىق «كونسترۋكتيۆ» جشس قۇقىعىن قورعاۋ جونىندە ءوتىنىش جازعان بولاتىن. وتىنىشتە كاسىپكەر 2014 جىلى «يگىلىك» كورپوراتيۆتىك قورىمەن قىزىلوردا قالاسىندا 3000 ورىندىق يپپودروم سالۋ جونىندە كەلىسىم شارتقا قول قويعاندىقتارىن ايتقان. شارتقا ساي كاسىپكەر 2015 جىلدىڭ 12 قازانىنا دەيىن بارلىق جۇمىستاردى اتقارىپ, مەملەكەتتىك كوميسسيامەن قابىلدانادى. الايدا كورپوراتيۆتىك قور تاپسىرىستى ورىنداۋشىنىڭ الدىندا مىندەتتەمەسىن ورىنداماي, «كونسترۋكتيۆ» جشس-نە 57 965 987 تەڭگە قارىز بولىپ قالادى. كاسىپكەردى الاڭداتقان ماسەلە قارجىنىڭ قاي ۋاقىتتا تولەنەتىندىگىنە قاتىستى تاپسىرىس بەرۋشىنىڭ ناقتى جاۋاپ بەرمەۋى. وسى رەتتە, كاسىپكەرلەر پالاتاسىنان كومەك سۇراعان سەرىكتەستىك باسشىسىنا زاڭگەرلەر كومەك كورسەتىپ, «يگىلىك» كورپوراتيۆتىك قورىمەن كەلىسسوز جۇرگىزدى. ناتيجەسىندە قوس تاراپ كەلىسىمگە كەلىپ, قور جاقىن كۇندەرى قارىزىن وتەيتىن بولىپ كەلىستى. ەرجان بايتىلەس. دەرەك, سۋرەت: egemen.kz