قوستاناي قالاسىنىڭ كۋبوگى ءۇشىن وتكەن جارىس ەلىمىز تاۋەلسىزدىگىنىڭ 25 جىلدىعىنا ارنالدى.

قوستاناي قالاسى كۋبوگى ءۇشىن شاڭعىشىلار جارىسى ءتاۋ­ەلسىزدىكتىڭ 25 جىلدىعىنا ار­­نالدى. شاڭعىشىلار قاردىڭ اۋىر­لىعىنا قاراماستان جارىس قىزىعىنا ءتۇستى. «2030 جىلدارى حالقىمىزدىڭ 30 پايىزى سپورتپەن, دەنەشىنىقتىرۋمەن اينالىسادى» دەگەن ەلباسى تاپسىرماسى ۇدەسىنەن وسىنداي يگى ىستەر شىعارسا كەرەك-ءتى. جارىستىڭ سالتاناتتى اشىلۋىندا سپورت پەن دەنەشىنىقتىرۋ ماڭگىلىك ەل يدەياسىن مۇرات تۇتقان ەلىمىز جاستارىنىڭ سەرىگى ەكەنى ايتىلدى. – تاريح تۇعىرىنان قاراساق ەلىمىز تاۋەلسىزدىگىن العان 25 جىل كوپ ۋاقىت ەمەس. الايدا, وسى از عانا جىلدا قازاقستاندا قانشاما ۇلكەن ىستەر جۇزەگە استى. ءبىزدىڭ وبلىسىمىزدىڭ وزىندە قانشاما سپورت كەشەندەرى مەن الاڭدارى جاسالدى. اۋداندار مەن قالالاردىڭ بارلىعىندا سپورت بولىمدەرى بەلسەندى جۇمىس ىستەيدى, بالالار مەن جاسوسپىرىمدەر سپورت مەكتەپتەرى قالپىنا كەلتىرىلدى. ولاردان ەلىمىزدىڭ نامىسىن قور­عاعان, اتىن ايداي الەمگە ايگىلى ەتكەن سپورتشىلار, وليمپيادا جۇلدەگەرلەرى ءوسىپ شىقتى. قوس­تاناي ەلىمىزدىڭ سولتۇستىك اۋدان­دارىنىڭ ءبىرى بولعاندىقتان, قىسقى سپورت تۇرلەرى بىزدە كەڭ قانات جايعان. سونىڭ ىشىندە شاڭعى سپورتىنان اتاقتى يۆان گارانيندى, ولگا سەلەزنەۆانى, ەۆگەني بوندورەنكونى, اتاقتى جاتتىقتىرۋشى يۆان ۆەپرەۆتى ماقتانىش ەتەمىز. بۇگىنگى جارىس تا وڭىرىمىزدە شاڭعى سپورتىنىڭ دامي تۇسكەنىن پاش ەتەدى, – دەدى وبلىستىق دەنەشىنىقتىرۋ جانە سپورت باسقارماسى باسشىسىنىڭ ورىنباسارى ەۆگەني ۆيليامس. مۇنان كەيىن سورەگە تۇرعان ءۇش جۇزدەن استام شاڭعىشىلار تورەشى بۇيرىعىنان كەيىن جۇيتكي جونەلدى. ولاردىڭ اراسىندا قالاداعى با­لالار مەن جاسوسپىرىمدەر سپورت مەكتەپتەرىنىڭ سپورتشىلارى, كوللەدجدەر مەن مەكتەپتەر وقۋ­شىلارى, اۋەسقوي شاڭعىشىلار بار ەدى. سونىمەن قاتار, قالالىق جارىسقا تاران اۋدانى مەن رۋد­نىي قالاسى شاڭعىشىلارى دا قوناق رەتىندە قاتىستى. ايتۋلى مەرەكەگە ارنالعان شاڭعىشىلار جارىسىنىڭ ءوزى سپورت مەرەكەسىنە اينالدى. وپپا قاردا ۇلكەن دە, كىشى دە شاڭعى تەپتى. قىس قىزىعى تاۋسىلمايتىنداي, تازا اۋادا قالالىقتار سەرپىلىپ قالدى. دەگەنمەن, جارىستىڭ اتى – جارىس. بۇل جولى ەرلەر كومانداسىندا الەكساندر برەيندباح – ءبىرىنشى, الەكساندر پارحومەنكو – ەكىنشى, رۋدنىيلىق ۆيكتور ماتيەۆ – ءۇشىنشى ورىنعا تابان تىرەدى. ال ايەلدەر اراسىندا ءبىرىنشى بولىپ زارينا بۋكۋتوۆا, ەكىنشى – تاراندىق ۆالەنتينا كازانتسەۆا, ءۇشىنشى – ليزا سەلەزنەۆا كەلدى. وزا شاپقاندارعا سەرتيفيكات, ماقتاۋ قاعازدارى تاپسىرىلدى. ءنازيرا جارىمبەتوۆا «ەگەمەن قازاقستان». قوستاناي.