كەمەڭگەر تۇلعاعا ارنالعان كەش

ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى ۇلتتىق ادەبيەتىمىز بەن مەملەكەت ىسىندە وشپەس ءىز قالدىرعان قارىمدى قالامگەر ءابىش كەكىلباەۆتىڭ ءومىرى مەن شىعارماشىلىعىنا ارنالعان «زامانا زاڭعارى» اتتى ادەبي-تا­نىمدىق كەش ۇيىمداستىردى. ەلباسى ن.نازارباەۆتىڭ ءوزى «ابەكەڭ – الەمدىك وركەنيەتتىڭ ورتاق قازىناسىنا ولجا سالعان سۋرەتكەر. كوركەم ويدىڭ, كور­كەم ادەبيەتتىڭ كوسەمسوزگە جول بەرگەن تۇسىندا ول ەل-جۇرتىنا ۇلگى بەرەتىن ۇردىسكە قول ارتىپ, ۋاقىت مىنبەرىنە كوتەرىلدى», دەپ ءباتۋالى ءسوزىن ارناپ, باعالاعان ءبىرتۋار ۇلىنىڭ حالقىمەن بىرگە ەكەنىن, شىعارمالارى ەل ەرتە­ڭىنە قىزمەت ەتىپ, ونىڭ ەكىنشى عۇمىرىن جال­عاستىرا بەرەتىنىن وسى كەش اي­عاقتاي ءتۇستى. كەشتى ۋنيۆەرسيتەت پرورەكتورى, بيولوگيا عىلىمدارىنىڭ دوكتورى سايرا ايپەيىسوۆا كىرىسپە ءسوز سويلەپ اشىپ, كۇنى كەشە عانا ومىردەن وزعان قازاقستاننىڭ حالىق جازۋشىسى, قر مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك ەرى, كورنەكتى مەملەكەت جانە قوعام قايراتكەرى ءابىش كەكىلباەۆتىڭ اسىل بەينەسى حالقىمەن ماڭگى بىرگە جاسايتىنىن جەتكىزدى. وبلىستىق ىشكى ساياسات باسقارماسىنىڭ باسشىسى ەربول نۇرعاليەۆ زامانا زاڭعارىنىڭ قالامىنان تۋعان, حالقىنىڭ اسىل قازىناسىنا اينالعان كەسەك تۋىندىلارىنىڭ قازاق ادەبيەتى عانا ەمەس, الەم ادەبيەتىندە شوقتىعى بيىك شىعارمالار ەكەنىن اتاپ ايتتى. ۋنيۆەرسيتەت جانىنداعى عىلىمي-زەرتتەۋ ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى الپىسباي مۇساەۆ «ءابىش كەكىلباەۆ­تىڭ ءومىرى مەن شىعارماشىلىعى» دەگەن تاقىرىپتا بايانداما جاسا­دى. وسى جوعارى وقۋ ورنىنىڭ «ءبىلىم مەن تاربيەنىڭ الەۋمەتتىك جانە دۇنيەتانىمدىق ماسەلەلەرىن زەرتتەۋ» ورتالىعىنىڭ جەتەكشىسى, في­لوسوفيا عىلىمدارىنىڭ دوكتورى, پروفەسسور امانگەلدى ايتالى ءابىش كەكىلباەۆتىڭ ساياساتكەرلىگى مەن قوعام قايراتكەرلىگى حاقىندا اسەرلى اڭگىمە ءوربىتتى. ارداگەر جۋرناليست يدوش اسقار قازاقتىڭ كەمەڭگەر ۇلىمەن قازاق ۋنيۆەرسيتەتىندە وكشەلەس وقى­عانىن ايتا كەلىپ, سول ستۋدەنتتىك كەزدىڭ وزىندە-اق ونىڭ بولاشاعىنان ءۇمىت كۇتتىرەتىندەي شىعارماشىلىق قادامىنا كۋا بولعانىن جەتكىزدى. ول وسى ۋنيۆەرسيتەتتەگى «ۇركەر» شى­­عارماشىلىق ۇيىرمەسىنە قازاق ادەبيەتىنىڭ جۇلدىزى بيىك جامپوزى ءابىش كەكىلباەۆتىڭ اتىن بەرۋ تۋرالى ۇسىنىسىن ءبىلدىردى. كەش بارىسىندا ۋنيۆەرسيتەت كىتاپحاناسى ءابىش كەكىلباەۆتىڭ شىعارماشىلىعىنا ارنالعان كىتاپ كورمەسىن ۇيىمداستىرىپ, ستۋ­دەنت­تەردىڭ كۇشىمەن كونتسەرتتىك باع­دارلاما ۇسىندى. زامانا زاڭعارىنا ارنالىپ شىعارىلعان جاڭا اندەر شىرقالدى, كوڭىل تولقىتارلىق ولەڭ­دەر وقىلدى, ابىز تۇلعانى ارداقتاپ ەسكە الدى. ساتىبالدى ءساۋىرباي, «ەگەمەن قازاقستان». اقتوبە وبلىسى.