بىرلەسە اتقارعان ءىس جەڭىل

«استانا ەكسپو-2017» ۇك» اق-تىڭ جاڭا كەڭسە عيماراتىندا استانا قالاسى اكىمدىگىمەن بىرلەسكەن جينالىس بولىپ ءوتتى. كۇن ءتارتىبى بويىنشا «استانا ەكسپو-2017» حالىقارالىق كورمەسىن ۇيىمداستىرۋدىڭ دايىندىق ماسەلەلەرى قارالدى. «وتكەن جىلدىڭ كۇزىندە ءبىز ءبىر­لەسكەن ءىس-شارالار جوسپارىنا قول قويعان بولاتىنبىز. سونىڭ نەگىزىندە ينجەنەرلىك جۇيە, جول قۇرىلىسى, ترانسپورتتىق ينفراقۇرىلىم, قالا­داعى قوعامدىق كولىك, ءتۋريزمنىڭ دامۋى, تاعى دا باسقا كوپتەگەن ماسەلەلەر بويىنشا مىندەتتەر بەلگىلەنگەن بولاتىن», – دەدى ۇلتتىق كومپانيا باسشىسى ا.ەسىموۆ. بىرلەسكەن ءىس-قيمىل جوسپارى اياسىندا تاراپتار 2017 جىلى وتەتىن كورمەگە دايىندىق جانە ونى وتكىزۋ بويىنشا وزەكتى ماسەلەلەردى جۇمىس بابىندا تالقىلاپ, شەشىپ وتىرادى. ودان ءارى ءوز سوزىندە ا.ەسىموۆ ۇلتتىق كومپانيا اتقارعان نەگىزگى جۇمىستار­عا توقتالىپ, ءىس-شارالاردىڭ كەستەگە ءساي­كەس جۇرگىزىلىپ جاتقانىن, بارلىق باعىتتار بويىنشا جۇمىستاردىڭ كۇ­شەيتىلگەنىن جانە مەملەكەت باسشىسى بەرگەن تاپسىرمالاردىڭ ءبارى ورىندالىپ جاتقانىن اتاپ ءوتتى. بۇگىنگى تاڭدا 74 مەملەكەت پەن 14 حالىقارالىق ۇيىم ەكسپو-2017 كورمەسىنە قاتىساتىندارىن رەسمي تۇردە راستادى. سونىمەن بىرگە, «استانا ەكسپو-2017» ۇك» اق باس­قار­ما ءتور­­اعاسى كورمەنىڭ اشىلۋى كەزىندە قاتىسۋشى مەملەكەتتەردىڭ سانى 100-گە جەتەتىنىنە نىق سەنىم ءبىلدىردى. كەلەسى كەزەكتە استانا قالاسى اكىمى­­نىڭ ورىنباسارى ءنۇرالى اليەۆ قالانى اتالمىش ماڭىزدى شاراعا دايىنداۋ جونىندە تولىعىراق ايتىپ بەردى. ونىڭ ايتۋىنشا, ەكسپو وتكەن كەزدە باستى سالماق كولىك باسقارۋ جۇيەسىنە تۇسەدى. استانا اكىمدىگى كور­مە­گە دايىندىق اياسىندا قالانىڭ كولىك-لوگيستيكالىق ينفراقۇرىلىمىن قامتاماسىز ەتۋ بويىنشا ۇلكەن جۇمىس اتقارۋدا. اتاپ ايتقاندا, بىرىڭعاي ديسپەتچەرلىك قىزمەت پەن كولىكتىك باقىلاۋ قىزمەتى قۇرىلدى, قازاقستاندا العاش رەت كولىك اعىنىن باسقارۋ ورتا­لىعى ەنگىزىلىپ, ناقتى قىزمەت اتقارىپ جاتىر. تۇراق كەڭىستىگىن باسقارۋ جۇيەسىن كەشەندى جۇرگىزۋ ماسەلەسى قارالۋدا ينتەللەكتۋالدى كولىك جۇيەسىن (ITS) ەنگىزۋ جۇمىستارى قولعا الىندى. ءنۇرالى اليەۆتىڭ سوزىنە قاراعاندا, وسى ماسەلەنى كەشەندى تۇردە شەشۋ ەلوردانىڭ كولىك-لوگيستيكالىق جە­لىسىن حالىقارالىق ستاندارتتارعا ءساي­كەس قۇرۋعا مۇمكىندىك بەرەدى. قا­لا اكىمىنىڭ ورىنباسارى ءوز سوزىندە قۇقىقتىق ءتارتىپتى قامتاماسىز ەتۋ, دەنساۋلىق ساقتاۋ, كورمە قوناقتارىن ورنالاستىرۋ مەن تاماقتاندىرۋدى ۇيىمداستىرۋ, ءىس-شارالار كۇنتىزبەسى, ۆولونتەرلار جۇمىسىن ۇيىمداستىرۋ جانە باسقا ماڭىزدى شارالاردى اتاپ كورسەتتى. قالا اكىمدىگى قىزمەت كورسەتۋ سالا­­سىندا ساپانى ارتتىرۋ بويىنشا جۇمىستارعا ايرىقشا باسىمدىق بەرىپ كەلەدى. بۇگىنگى تاڭدا ۇلتتىق كومپانيا­مەن بىرلەسكەن «ەكسپو ۇسى­نادى» اتتى استانا قالاسىنىڭ سەرىكتەستىك باعدارلاماسى جۇزەگە اسىرىلۋدا. «قازىرگى كەزدە سەرىكتەستىك باعدارلاماعا قاتىسۋعا 50-دەن استام ءوتىنىم كەلىپ ءتۇستى», – دەدى ن.اليەۆ. ونىڭ ايتۋىنشا, باعدارلاماعا قوناقۇيلەر, قوعامدىق تاماقتانۋ وبەكتىلەرى, كولىك قىزمەتتەرىن ۇسىناتىن كومپانيالار مەن تۋرفيرمالار قاتىسادى. كەڭەس بارىسىندا ەلوردا اكىمى بىرلەسىپ جۇمىس ىستەۋدىڭ جانە بارلىق باعىتتار بويىنشا ءوزارا ارەكەت ەتۋدىڭ ماڭىزدىلىعىن اتاپ ءوتتى. «قالا ءۇشىن ەكسپو حالىقارالىق كورمەسى ماڭىزدى ەمتيحان بولىپ تابىلادى, ونىڭ ۇستىنە بۇل ەلوردامىزدىڭ تىنىس-تىرشىلىگىنىڭ بارلىق سالاسىنىڭ دامۋىنا قوسىمشا سەرپىن بەرەدى. كورمەگە دە, استاناعا دا قىزىعۋشىلىقتىڭ ۇدايى ارتىپ وتىرعانى بايقالادى. بۇگىن­دە بارلىق قالالىق قۇرىلىمدار­دىڭ باستى مىندەتى – قالانى ەكسپو-2017 كورمەسىنە دايىنداۋ» – دەدى ءسوزى­نىڭ قورى­تىندىسىندا ادىلبەك جاقسى­بەكوۆ. «استانادا كوپتەگەن ماڭىزدى حا­لىقارالىق شارالار وتكىزىلدى, بىراق ولار 2-3 كۇنگە عانا جالعاساتىن. ەكسپو كورمەسى 93 كۇن بويى وتە­دى جانە بۇل قالانىڭ بارلىق ينفرا­قۇرىلىمىنا سالماق تۇسىرمەك, ءبارى­مىز دە بۇعان دايىن بولۋىمىز كەرەك», – دەدى وتىرىس قورىتىندىسىندا احمەتجان ەسىموۆ. جىلقىباي جاعىپار ۇلى, «ەگەمەن قازاقستان». استانا.