قۇرىلىس قالىپتى جۇرۋدە

جاڭاوزەندى دامىتۋ ماسەلەسى كۇن تارتىبىنە قويىلعالى بەرى, قالانىڭ سىرت كەلبەتى قالىپقا كەلىپ قالدى. ال جۇمىسپەن قامتۋ, تۇرعىن ءۇي سەكىلدى ىشكى ماسەلەلەردىڭ ورىندالۋى جونىندە «نۇر وتان» پارتياسى وكىلدەرى باياندادى. «قالانىڭ تىنىس-تىرشىلىگىن قاداعالاپ, ءتيىستى ماسەلەلەرگە اتسالىسىپ, ارالاسىپ وتىرامىز» دەگەن پارتيا وكىلدەرىنىڭ ايتۋىنشا, وتكەن جىلى قالادا جالپى اۋدانى 92 مىڭ شارشى مەتردەن اساتىن تۇرعىن ۇيلەر پايدالانۋعا بەرىلگەن. بيىل قالانى كوركەيتۋگە بولىنەتىن 14,2 ملرد تەڭگەنى يگەرۋ بارىسىندا ورتالىق قازاندىق كىشى جىلۋ ەنەرگيا ورتالىعىنا اۋىستىرىلىپ, قايتا جاڭعىرتىلماق. سونداي-اق, 50 ورىندى مەديتسينالىق ەمدەۋ ورتالىعى سالىنادى. تۇرعىنداردىڭ ارىز-شاعىمى مەن تالاپ-تىلەگىن تىڭداۋ ءۇشىن «نۇر وتان» پارتياسى قالا ىشىنە 20-دان استام جاشىك ورناتىپتى, وعان 60-تان استام شا­عىم جينالعان. تۇرعىندار تاراپىنان كوپ كوتەرىلەتىن ماسەلە – باسپانا, جەر تەلىمى جانە اۋىز سۋعا قاتىستى ەكەن. 140 مىڭنان استام حالقى بار جاڭا­وزەندە اۋىز سۋ تاپشى. قازىرگى تاڭدا قالا حالقى قۇبىر ارقىلى كەلەتىن تۇيەسۋ, ساۋىسقان جەراستى سۋلارى مەن ۆولگا وزەنىنىڭ سۋىن پايدالانۋدا. بۇل كوزدەردەن سۋ كەلمەي قالعان جاعدايدا تۇرعىنداردى سۋمەن قامتاماسىز ەتۋ ءۇشىن سۋ جينايتىن سىيىمدىلىعى ءارتۇرلى كولەمدەگى 6 رەزەرۆۋار بار, مامانداردىڭ ايتۋىنشا, بۇل جيىنتىق سۋ تەك ءۇش كۇنگە عانا جەتەدى دەپ ەسەپتەلگەن. سۋ جيناۋ قورى 50 مىڭ ادامعا لايىقتالعاندىقتان قازىرگى قالا حالقى سانىنىڭ ءوسۋى اۋىز سۋ ماسەلەسىن كۇن تارتىبىنە شىعارىپ وتىر. سوندىقتان, جاڭاوزەندە قازىرگى تاڭدا فرانتسيالىق «دەگرەمون» كومپانياسىنىڭ قوندىر­عىلارى ورناتىلاتىن جاڭا سۋ تۇشىتۋ زاۋىتى قۇرىلىسى جۇرۋدە. 2014 جىلى باستالعان قۇرىلىستا 50 ادام جۇمىس جاساۋدا, بيىلعى جىلدىڭ سوڭىنا تامان پايدالانۋعا بەرىلەدى دەپ سانالاتىن جوبا قۇرىلىسىنا 2 ملرد. 101 مىڭ تەڭگەنى قۇراپ, قازىرگى تاڭدا قاراجاتتىڭ 1 ملرد.-ى يگەرىلگەن. ارقاي­سىسى 10 مىڭ تەكشە مەتر سىيىم­دىلىقتاعى 4 رەزەرۆۋارى بار, تاۋلىگىنە 30 مىڭ تەكشە مەتر اۋزى سۋىن تۇشىتىپ, قولدانىستاعى اۋىز سۋ كولەمىن ەكى ەسەگە دەيىن ارتتىراتىن زاۋىت ىسكە قوسىلعان سوڭ 30 جۇمىس ورنى اشىلادى. – بۇل جوبانىڭ الەۋمەتتىك ماڭىزى زور, ياعني بۇل ارقىلى جاڭاوزەندەگى اۋىز سۋ ماسەلەسى شەشىمىن تاباتىن بولادى. ءبىز مەملەكەتتەن قارجى ءبولىنىپ, قولعا الىنعان جوبالاردى قاداعالاپ وتىرامىز. زاۋىت قۇرىلىسىنا بولىنگەن قارجىنىڭ 70 پايىزى رەسپۋبليكالىق بيۋدجەتتەن, 30 پايىزى جەرگىلىكتى بيۋدجەتتەن ءبولىندى, قازىرگى تاڭدا زاۋىت قۇرىلىسىنىڭ قارقىنىن باسەڭدەتپەۋى باقىلاۋدا تۇر. جاڭاوزەندە جىل باسىندا 3 مىڭنان استام جۇمىسسىز ادام بولعان ەدى, ولاردى الەۋمەتتىك قولداۋعا 345,7 ملن. تەڭگە جۇمسالماق. جالپى, كەشەندى دامۋ باعدارلاماسى اياسىندا 46 جوبا قارالعان. ولاردىڭ ۋاقتىلى قولدانىسقا بەرىلۋى پارتيانىڭ قاتاڭ نازارىندا بولادى, –دەيدى «نۇر وتان» پارتياسى جاڭاوزەن قالالىق فيليالى پارتيالىق باقىلاۋ كوميسسياسىنىڭ توراعاسى ءى.كەڭەسوۆ. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.