ەنەرگەتيكتەر ەلەكتر قۋاتىن ارتىعىمەن وندىرۋدە

اقسۋداعى ەۋرازيالىق توپ (ERG) قۇرامىنا كىرەتىن «ەۋرا­زيا­لىق ەنەرگەتيكالىق كورپوراتسيا» اق-تا ەلەكتر ستانساسىنىڭ وسى جىلدىڭ قاڭتار ايىنا جوس­پارلانعان ەلەكتر قۋاتىن ءوندىرۋ مولشەرى 1 ملرد. 422,7 ميلليون كۆت/س قۇرادى. بۇل جوسپارلانعان كورسەتكىشتەن 32,7 ميلليون كۆت/س ارتىق ورىندالىپتى. ەلەكتر قۋاتىن ارتىق شىعارۋ ستانسا ءونىمىن تۇتىنۋشىلار اراسىنداعى سۇرانىستىڭ وسۋىنە بايلانىستى. ەلىمىزدىڭ الىپ كاسىپورىندارى – ERG قۇرامىنا كىرەتىن «قازحروم» تۇك» اق, «قازاقستان ەلەكتروليز زاۋىتى», سوكولوۆ-سارىباي كەن وندىرىستىك بىرلەستىگى ستانسانىڭ باستى تۇتىنۋشىلارى. – سوڭعى ەكى ايدىڭ ىشىندە ستانساداعى ەنەرگوبلوكتار توق­تاۋ­سىز جۇمىس جاسادى. قاڭتاردا ستانسا بەلگىلەنگەن قۋاتىن 1912 مۆت-عا دەيىن پايدالاندى. بۇل كور­سەت­كىشكە قول جەتكىزۋگە ستانسا جاب­دىقتارىنىڭ جۇيەلى جاڭارتى­لۋى ءوز سەپتىگىن تيگىزدى, – دەيدى ستانسانىڭ وندىرىستىك-تەحنيكا­لىق ءبولىمىنىڭ باسشىسى سەرگەي مانۋيلوۆيچ. ءبولىم باسشىسى ايتقانداي-اق, اقسۋ ەلەكتر ستانساسىندا 2001 جىلدان بەرى ەسكىرگەن جاب­دىق­تاردى جاڭارتۋ جانە قايتا قۇرۋ باعدارلاماسى جۇزەگە اسىرىلۋدا. قازىرگى كۇنى ستانسانىڭ 8 ەنەرگيا بلوگىنىڭ 5 كەشەندى تۇردە جاڭارۋ مەن جاڭعىرتىلۋ جۇيەلەرى ارقىلى تولىقتاي جەتىلدىرۋدەن ءوتتى. بۇگىنگى كۇنى №5 ەنەرگيا بلو­گىندا قۇنى شامامەن 277 ميل­ليون دوللار تۇراتىن قايتا قۇرۋ جۇمىستارى جۇرگىزىلۋدە. 1996 جىلدان باستاپ «ەەك» اق جاب­دىقتاردىڭ كۇردەلىلىگى ءارتۇر­لى جوندەۋ جانە قايتا قۇرۋ جۇ­مىستارىنا 190 ملرد. تەڭگە جۇم­ساپتى. جالپى, ستانسادا بەل­گى­لەن­گەن قۋات كولەمى 245 مۆت قۇرايدى. ال كاسىپورىنعا قاراستى «شىعىس» كەنىشىندە دە ەڭبەك ونىمدىلىگىن ارتتىراتىن جاڭا تەحنيكالار جۇمىس جاساۋدا. جۋىردا كەنىشتىڭ تەحنيكالىق پاركى مپل-150م1ۋ جاڭا سىنامالى وڭدەۋ ماشيناسىمەن تولىقتى. بۇل مەحانيزم كومىردى ۇساقتاپ, ونىڭ سىناماسىن دايىنداۋ ءۇشىن زەرتحانادا ساپاسىن انىقتاۋعا ارنالعان. تەحنيكانىڭ ونىمدىلىگى – ساعاتىنا 2,2 توننا. سىنامالى وڭدەۋ ماشيناسى قاتتى وتىن ماتەريالدارىن ۇساقتاعاننان كەيىن زەرتحاناعا جىبەرىلەدى. جاڭا مپل-150م1ۋ ماشيناسى ۇنتاقتاعىش بالعادان, ءشومىشتى-شىنجىرلى كونۆەيەردەن تۇرادى. بارلىق بولشەكتەرى ءبىر جەردە جيناستىرىلعان. ماشينانى «ديك» كومپانياسى جاساعان, جاڭا تەحنيكانىڭ قۇنى 5 ميلليون تەڭگەنى قۇرايدى. ول ارنايى دايارلانعان ۇلكەن ءارى جارىق بولمەدە ورناتىلعان. – زامان تالابىنا ساي جابدىق ءبىزدىڭ كومىردى ۇساقتاۋ كەزىندەگى ۋاقىتىمىزدى ۇنەمدەي تۇسەدى. ەڭبەك ونىمدىلىگى ارتادى. ەسكى جاب­دىقپەن سالىستىرعاندا, كومىر­دى ۇساقتاۋ كەزىندەگى شاڭ-توزاڭ­نىڭ پايدا بولۋى جاڭا جابدىق­تىڭ ارقاسىندا ازايدى, – دەيدى «شىعىس» كەنىشىنىڭ باس گەولو­گى بەكتاس سماقوۆ. بۇل كۇندەرى «ەۋرازيالىق ەنەر­گەتيكالىق كورپوراتسيا» اق تۇراقتى تۇردە ءوندىرىس تيىمدىلىگىن ارتتىرۋدا. باستى ماقساتى – ەڭبەك قاۋىپ­سىزدىگىن قامتاماسىز ەتە وتىرىپ, ارقاشاندا العا ۇمتىلۋ. كاسىپ­ورىنعا ەلىمىزدە وندىرىلەتىن ەلەك­تر ەنەرگياسىنىڭ 17 پايىزى جانە كومىردىڭ 20 پايىزى تيەسىلى. كاسىپ­ورىندا 6 181 ادام ەڭبەك ەتۋدە. فاريدا بىقاي, «ەگەمەن قازاقستان». پاۆلودار وبلىسى, اقسۋ قالاسى.