جاڭاوزەندە ماڭعىستاۋ وبلىسىنداعى ەڭ ءىرى مەشىت سالىنۋدا

اقتاۋ. 9 اقپان. ماڭعىستاۋ وبلىسىنداعى ەڭ ءىرى مەشىت جاڭاوزەن قالاسىندا سالىنۋدا. بۇل تۋرالى Skifnews.kz سايتىنا سىلتەمە جاساعان egemen.kz ءتىلشىسى حابارلادى. وسىدان 3 جىل بۇرىن باستالعان مەشىتتىڭ قۇرىلىسىنا ماڭعىستاۋلىقتار باستاما كوتەرىپ, قۇرىلىس جۇمىستارىنا جۇمسالىپ جاتقان قاراجاتتى جەرگىلىكتى تۇرعىندار وزدەرى جيناپ بەرگەن. حالىقتان جينالعان اقشانى ماقساتتى تۇردە جۇمساۋ ءۇشىن «ىنتىماق» قورى قۇرىلعان بولاتىن. العاشىندا قورعا جەرگىلىكتى تۇرعىندارمەن بىرگە, «قازمۇنايگاز» جۇمىسشىلارىنىڭ ساداقاسىنان تۇسكەن 79 ميلليون تەڭگە جينالعان. اتالمىش كولەمدەگى قارجى مەشىتتىڭ تەك ءبىرىنشى قاباتىن سالۋعا عانا جەتكەن. سونان سوڭ, مەشىت قۇرىلىسى 2 جىلعا توقتاپ, 2015 جىلدىڭ قازان ايىندا قورعا تۇسكەن 5,6 ميلليون تەڭگە قارجى نەگىزىندە جالعاسىن تاۋىپ, وسى اقشاعا مەشىت اۋلاسىنان اسحانا سالىنىپ, كوگالداندىرۋ جۇمىستارى جۇرگىزىلدى. قازىرگى تاڭدا دەمەۋشىلەردىڭ كومەگىمەن نەكە بولمەسى مەن بالالاردى وقىتۋعا ارنالعان ءدارىسحانالار, قىزمەتتىك بولمەلەر جانە نامازحانا ورنالاسقان عيبادات ءۇيىنىڭ ەكىنشى قاباتى سالىنىپ ءبىتتى. «بۇل ماڭعىستاۋ وبلىسىنداعى ەڭ ۇلكەن مەشىت بولادى. ەگەر اقتاۋداعى ورتالىق مەشىتكە 1000 ادام سىياتىن بولسا, مۇندا ءبىر مەزگىلدە 1500 ادام نامازعا جىعىلا الادى. قازىرگى تاڭدا مەشىت قۇرىلىسنا ءوز ەرىكتەرىمەن كەلىپ 25 ادام ەڭبەك ەتۋدە. ايت نامازىنا دەيىن قۇرىلىس جۇمىستارىن تولىق اياقتاۋدى جوسپارلاپ وتىرمىز», – دەيدى قۇرىلىستىڭ باسى-قاسىندا جۇرگەن كاسىپكەر ق.قىزانباەۆ. مەشىتتى تولىقتاي سالىپ ءبىتىرۋ ءۇشىن تاعى 200 ميلليون تەڭگەدەي قاراجات قاجەت. گۇلايىم شىنتەمىرقىزى. دەرەك: skifnews.kz. سۋرەت: inform.kz.