سولتۇستىك قازاقستاندا «اسىل مۇرا» ورتالىعىنىڭ ورنى بولەك

پەتروپاۆل. 9 اقپان. وبلىستىق تاريحي-ولكەتانۋ مۇراجايى جانىنداعى «اسىل مۇرا» عىلىمي-زەرتتەۋ ورتالىعىنىڭ 15 جىلدىعى ايتۋلى وقيعا رەتىندە اتاپ ءوتىلدى. بۇل تۋرالى وبلىستىق مادەنيەت باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. شارا ءسابيت مۇقانوۆ اتىنداعى عىلىمي-امبەباپ كىتاپحانادا ۇيىمداستىرىلىپ, وعان وبلىس اكىمىنىڭ ورىنباسارى انارحان دۇيسەنوۆا قاتىستى. عىلىمي-زەرتتەۋ ورتالىعىنىڭ جەتەكشىسى تاڭات سۇگىرباەۆ ۇيىمنىڭ قۇرىلۋ, قالىپتاسۋ كەزەڭدەرى جايلى كەڭىنەن بايانداپ بەردى. اتالعان ۋاقىت ىشىندە 69 كىتاپ پەن 200-دەن استام ماقالا جاريالانىپتى. جارىق كورگەن زەرتتەۋلەردىڭ باسىم بولىگى وشكەن تاريحىمىزدى تۇگەندەپ, ۇلتتىق مادەنيەتىمىز بەن ءتول ادەبيەتىمىزدى قايتا جاڭعىرتۋ سەكىلدى سۇبەلى تاقىرىپتارعا ارنالعان. بۇگىندە ورتالىق تاريحقا, مادەنيەتكە جانە ءسوز ونەرىنە قىزىققان قاۋىمعا مول اقپارات بەرەتىن عىلىمي جانە تاريحي شاڭىراقتىڭ ءبىرى سانالادى. كاسىبي ادالدىق, ساۋاتتىلىق سەكىلدى زور جاۋاپكەرشىلىكتى ارقالاعان جەرگىلىكتى ولكەتانۋشىلار جۇرتشىلىققا ەسىمدەرى تانىلماي كەلگەن ۇلى تۇلعالاردىڭ ومىرلەرىنىڭ بەيمالىم قىرلارىن زەرتتەپ, زەردەلەۋدە اتقارعان ەڭبەكتەرى وراسان. انارحان قاليقىزى وبلىس اكىمى ەرىك سۇلتانوۆتىڭ اتىنان ورتالىق جەتەكشىسى تاڭات سۇگىرباەۆقا «العىس حات» پەن سىيلىق تابىس ەتتى. ءسابيت مۇقانوۆ اتىنداعى وبلىستىق قازاق سازدى-دراما تەاترىنىڭ ارتىستەرى «قوجابەرگەن مەن سابالاقتىڭ كەزدەسۋى» قويىلىمىنان ءۇزىندى ۇسىندى. ءومىر ەسقالي. دەرەك, سۋرەت: egemen.kz.