«اۋىل» پارتياسى: تىزىمدەگىلەر تولىق تىركەلدى

وتكەن سەنبىدە, ياعني 6 اقپان كۇنى وتكەن ورتالىق سايلاۋ كوميسسياسىنىڭ وتىرىسىندا «اۋىل» حالىقتىق-دەموكراتيالىق پاتريوتتىق پارتياسى (حدپپ) اتىنان ءماجىلىس سايلاۋىنا قاتىسۋعا نيەتتى بارلىق 19 ۇمىتكەردىڭ تولىق تىركەلگەنى انىقتالىپ, ولارعا ءتيىستى كۋالىكتەر تابىس ەتىلدى. «سىزدەردىڭ نازارلارىڭىزعا قا­زاق­­ستان­نىڭ «اۋىل» حالىقتىق-دەمو­كرا­تيالىق پات­ريوتتىق پارتياسىنىڭ پار­تيالىق ءتىزىمىن­دەگى ۇمىتكەرلەردى ءتىر­كەۋ تۋرالى قاۋ­لى جوباسىن ۇسىنىپ وتىر­مىن. قاۋلى بويىنشا «اۋىل» حالىق­تىق-دەموكرا­تيا­لىق پاتريوتتىق پارتيا­سىنىڭ پارتيا­لىق ءتىزىمى تىركە­لەدى. ءتىزىم بويىنشا ءتىر­كەلگەن پارلا­مەنت ءماجىلىسىنىڭ دەپۋ­تات­تىعىنا كان­ديداتتارعا كۋالىك بەرىل­سىن. ولاردىڭ سانى – 19», – دەدى قاۋلى جوباسىن تانىستىرعان وسك حاتشىسى با­قىت مەل­دەشوۆ. ونىڭ ايتۋىنشا, پارتيالىق تىزىمگە ەنگىزىلگەن ازاماتتاردىڭ قازاقستان رەسپۋب­ليكاسىنىڭ «سايلاۋ تۋرالى» زاڭىنا سايكەستىگى ەلىمىزدىڭ ىشكى ىستەر مينيسترلىگى مەن باس پروكۋراتۋراسى ارقىلى تەكسەرىلگەن. اتالعان ۆەدومستۆولار بەرگەن اقپاراتتارعا سايكەس, پارتيالىق تىزىمدەگى ازاماتتاردىڭ بارلىعىنىڭ دا زاڭعا سايكەستىگى انىق­تالعان. كانديداتتاردىڭ جانە ولاردىڭ جۇبايلارىنىڭ تابىسى جانە مۇلكى تۋرالى دەكلاراتسيالارى سالىق ورگاندارىنىڭ انىقتامالارىمەن راستالعان. وسىدان كەيىن ورتالىق سايلاۋ كوميس­سيا­سىنىڭ مۇشەلەرى اتالعان قاۋلىنى ءبىراۋ­ىزدان قابىلدادى. بۇدان سوڭ «اۋىل» حالىقتىق-دەمو­كراتيالىق پاتريوتتىق پارتياسىنان ءماجىلىس دەپۋتاتتىعىنا كان­ديداتتاردىڭ ارنايى كۋالىگى بەرىلدى. «ءاربىر ساياسي پارتيا ءۇشىن سايلاۋ الدىندا ورتالىق سايلاۋ كوميسسياسىنا پار­تيالىق ءتىزىمىن تىركەۋدەن وتكىزۋ ماڭىزدى بەلەس دەپ ەسەپتەيمىز. سەبەبى, نەگىزگى جۇ­مىس­تاردىڭ بارلىعى دا وسىدان كەيىن باستال­­ادى. سايلاۋعا دايىندىق, سايلاۋ باعدار­لاماسىن ناسيحاتتاۋ جۇمىستارىنىڭ باس­تالۋى وسى تىركەلۋگە بايلانىستى بول­عاندىقتان, مۇنى اسىعا كۇتكەن ەدىك. كاندي­دات­تارىمىزدىڭ بارلىق قاجەتتى قۇجات­تارىن تولىق تاپسىرعانبىز. وتكەن سەزدە بەكىتىلگەن پارتيالىق ءتىزىمىمىز تولىعىمەن تىركەلدى», – دەدى وسك وتىرىسىنان كەيىن باق وكىلدەرىنە سۇحبات بەرگەن «اۋىل» حدپپ-نىڭ توراعاسى ءالي بەكتاەۆ. سونىمەن قاتار, ول الداعى سايلاۋ زاڭ اياسىندا ءادىل وتەتىندىگىنە سەنەتىندىكتەرىن جەتكىزە كەلىپ, تىركەۋدەن وتكەن ۇمىتكەر­لەردىڭ قۇرامىنا قىسقاشا سيپاتتاما بەردى. «ءبىزدىڭ 19 ۇمىتكەرىمىزدىڭ بارلىعى دا جوعارى ءبىلىمدى. ونىڭ ىشىندە 11 ازامات اۋىل شارۋاشىلىعى ماماندىعى بو­يىنشا ءبىلىم العان. بەسەۋى زاڭگەر جانە ەكونوميست. ولاردىڭ بارلىعىنىڭ دا ومىرلىك تاجىريبەلەرى مول. ارامىزدا ءبىر مەملەكەتتىك سىيلىقتىڭ لاۋرەاتى, بەس عىلىم دوكتورى, ءۇش عىلىم كانديداتى بار», – دەدى پارتيا توراعاسى. ايتا كەتەيىك, پارتيالىق تىزىمدەر بو­يىنشا سايلاناتىن پارلامەنت ءماجىلىسى دەپۋتاتتارىنىڭ سايلاۋىن ازىرلەۋ مەن وتكىزۋ جونىندەگى نەگىزگى ءىس-شارالاردىڭ ورتالىق سايلاۋ كوميسسياسىنىڭ بەكىتكەن كۇنتىزبەلىك جوسپارىنا سايكەس, پارتيالىق تىزىمدەردى تىركەۋ 19 اقپاندا اياقتالادى. جولدىباي بازار, «ەگەمەن قازاقستان».