مەركى اۋدانى ۇلكەن جوبالاردى قولعا الۋدا

تاراز. 2 اقپان. ەلىمىزدى يندۋستريالىق-يننوۆاتسيالىق دامىتۋدىڭ 2015-2019 جىلدارعا ارنالعان مەملەكەتتىك باعدارلاماسى اياسىندا «مەركى ەت» جشس-ءى وڭىرلىك يندۋستريالاندىرۋ كارتاسىنا ەنگىزىلدى. بۇل بويىنشا 2016-2017 جىلدارى رىسقۇلوۆ اۋىلىنداعى «مەركى ەت» جشس-نە قاراستى بۇرىنعى ەت كومبيناتىن قايتا جاڭعىرتىپ, ەت كونسەرۆىسى (تۋشەنكا) ونىمدەرىن جانە شۇجىق ونىمدەرىن شىعارۋ جوسپارلانىپ وتىر. قۋاتتىلىعى جىلىنا 250 توننا شۇجىق جانە 262 مىڭ كونسەرۆى (تۋشەنكا) بانكاسىن شىعارۋعا جەتەدى. جوبا قۇنى 620 ملن. تەڭگە. بۇگىنگى كۇنى قايتا جاڭعىرتۋ جۇمىستارى تولىعىمەن اياقتالدى. ىسكە قوسۋ مەرزىمى 2016 جىلدىڭ ەكىنشى توقسانى دەپ جوسپارلانۋدا.  جوبا ىسكە قوسىلعان كەزدە 25 ازامات جۇمىسپەن قامتىلادى دەپ جوسپارلانۋدا. وعان قوسىمشا 2015 جىلى شيكىزاتتى دايىنداۋ ماقساتىندا ءبىر مەزگىلدە 3000 باس ءىرى قارا مالىن بورداقىلايتىن بورداقىلاۋ الاڭىن ىسكە قوسۋ جوسپارلانۋدا. جىلىنا شامامەن 4 مىڭ 500 باس ءىرى قارا مالىن بورداقىلاپ, 1100 توننا ەت وندىرەدى. سونىمەن قاتار, 2016 جىلدىڭ ەكىنشى جارتى جىلدىعىندا «ورتالىق ازيا قانت بىرلەستىگى» جشس-ءنىڭ مەركى فيليالىنىڭ شىرىن تازالاۋ تسەحىن قايتا جاڭعىرتۋ جوباسىن اتالعان كارتاعا ەنگىزۋ جۇمىستارى جۇرگىزىلۋدە. جوبا قۇنى شامامەن 849 ملن. تەڭگە. ورالحان ءداۋىت. دەرەك, سۋرەت: egemen.kz