«جاستار – وتانعا!» جوباسىنىڭ جاڭا ماۋسىمى باستالدى

كەشە «نۇر وتان» پارتياسىنىڭ ءباسپاسوز ورتالىعىندا «جاستار – وتانعا!» جوباسىنىڭ 2015 جىلى اتقارىلعان جۇمىستارىنىڭ قورىتىندىسىنا ارنالعان بريفينگ ءوتتى. شاراعا «جاس وتان» جاستار قاناتى حاتشىلىعىنىڭ باسشىسى ايان ساكوشەۆ, «قازاقستان جاستار كونگرەسىنىڭ» اتقارۋشى ديرەكتورى ايدىن ءسابيتوۆ جانە «جاسىل ەل» جاستار ەڭبەك جاساقتارى رەسپۋبليكالىق شتابىنىڭ باسشىسى راحات حاميدۋلين قاتىسىپ, باق وكىلدەرىنە «جاس وتان» جاستار قاناتىنىڭ وسى جوبا اياسىندا وتكەن جىلعى جۇمىس قورىتىندىلارى جانە الداعى جوسپارلارى جايىندا ايتىپ بەردى. «جاس وتان» جاستار قاناتى حاتشىلىعىنىڭ باسشىسى ا.ساكوشەۆتىڭ ايتۋىنشا, بىلتىر اتالعان جوبا نەگىزىندە بىرقاتار جاستار ۇيىمىمەن 2016 جىلعا ارنالعان بىرلەسكەن جوسپارعا قول قويىلعان. بۇل جاستاردىڭ قوعامدىق ومىرگە بەلسەنە ارالاسۋىنا مۇمكىندىك بەرمەك. – جوبا اياسىندا 2015 جىلى «كەڭەس ورتالىعى» كونسالتينگ ورتالىقتارىندا 27 مىڭنان استام ادامعا جۇمىس, باسپانا جانە ەلىمىزدە جۇزەگە اسىرىلىپ جاتقان باعدارلامالارعا قاتىستى كەڭەستەر بەرىلدى. اتالعان ورتالىقتاردىڭ ماقساتى اۋىلدىق جاستاردى اقپاراتتاندىرۋعا, زاڭ ماسەلەلەرى بويىنشا جەكە كونسۋلتاتيۆتى جانە پسيحولوگيالىق كومەك كورسەتۋگە باعىتتالعان. جالپى, وتكەن جىلى «جاستار – وتانعا!» ايماقتىق جاستار ساياسي لاگەرىنە 560 ادام قاتىستى. بيىل سونداي لاگەر وبلىستىق, رەسپۋبليكالىق دەڭگەيدە ۇيىمداستىرىلادى. وعان قوسا رەسپۋبليكالىق دەڭگەيدەگى لاگەرگە 300-گە جۋىق ادام تارتىلماق, – دەدى ا.ساكوشەۆ. سونداي-اق, جاستار قاناتى حاتشىلىعى باسشىسىنىڭ سوزىنە قاراعاندا, وتكەن جىلى «ەرىكتىلەر مەكتەبى» شەڭبەرىندە ەلىمىزدە 600-دەن استام ۇلى وتان سوعىسى, تىل ارداگەرلەرىنە جانە كومەككە مۇقتاج ەگدە ادامدارعا كومەك كورسەتىلگەن. ايتا كەتەيىك, «جاستار – وتانعا!» جوباسى 2009 جىلدان بەرى جۇزەگە اسىرىلىپ كەلەدى. جوبانىڭ ماقساتى – جاستار اراسىندا جاڭا قازاقستاندىق ءپاتريوتيزمدى قالىپتاستىرۋ, رۋحاني-ادامگەرشىلىك قۇندىلىقتاردى ءتۇسىندىرۋ جانە ۇلىقتاۋ بولىپ تابىلادى. جوبا «قازاقستان – 2050» ستراتەگياسى, سونىمەن قاتار, «نۇرلى جول – بولاشاققا باس­تار جول» ەلباسى جولداۋىن جۇزەگە اسىرۋ شەڭبەرىندە ازىرلەنگەن بولاتىن. ونىڭ اياسىندا «كەڭەس ورتالىعى» كونسالتينگ ورتالىقتارى, «جاستار – وتانعا!» جاستار سايا­سي لاگەرى, «ەرىكتىلەر مەكتەبى», «قازاقستانىم تازا مەكەنىم», «اسكەردەگى ءبىر كۇن» سىندى بىرقاتار يگى ءىس-شارا ۇيىمداستىرىلادى. ەلامان قوڭىر, «ەگەمەن قازاقستان».