مىزعىماس بىرلىك, تىنىمسىز ەڭبەك

كەشە استانادا «اۋىل» حالىقتىق-دەموكراتيالىق پاتريوتتىق پارتياسىنىڭ كەزەكتەن تىس ءحىى سەزى ءوتتى. جيىندا ەلىمىزدىڭ بارلىق وڭىرلەرىنەن كەلگەن دەلەگاتتار ەلباسى نۇرسۇلتان نازارباەۆتىڭ جارلىعىنا سايكەس, كەزەكتەن تىس پارلامەنت ءماجىلىسىنىڭ سايلاۋىنا قاتىسۋ تۋرالى پارتيا شەشىمىن ماقۇلدادى. سونداي-اق, سەزدە پارلامەنت ماجىلىسىنە ۇمىتكەرلەردىڭ پارتيالىق ءتىزىمى بەكىتىلدى ءارى ۇيىمنىڭ سايلاۋالدى باعدارلاماسى قابىلداندى. سەزدە ءبىرىنشى كەزەكتە ءسوز العان اۋىل» حالىقتىق-دەموكراتيالىق پات­ريوتتىق پارتياسىنىڭ توراعاسى ءالي بەكتاەۆ ۇيىمنىڭ قازىرگى تاڭداعى باعىتى مەن اتقارىپ وتىرعان قىزمەتى جونىندە توقتالا كەلىپ, الداعى سايلاۋ ناۋقانىنىڭ ماڭىزدىلىعىنا ەكپىن بەردى. بۇگىنگى باسقوسۋدىڭ ورنى ايرىقشا! «اۋىل» حالىقتىق-دەموكراتيالىق پات­ريوتتىق پارتياسى قوعامىمىزدىڭ ءور­كەندەۋىنە ءوزىنىڭ ۇلەسىن قوسا ءجۇرىپ, كەمەلدەنگەن ساياسي ۇيىمعا اينالدى. ەل پرەزيدەنتى نۇرسۇلتان نازارباەۆ حالىققا «ماڭگىلىك ەل» ۇلتتىق يدەياسىن جاريا ەتتى. «اۋىل» پارتياسىنىڭ دا باستى ماقساتى – قازاقستاننىڭ تاۋەلسىزدىگىن بەكەمدەي ءتۇسىپ, «ماڭگىلىك ەلدى» نىعايتىپ, بەكىتۋ! قازىرگى زاماننىڭ جاھاندىق سىن-قاتەرلەرى حالقىمىزدىڭ رۋحاني-ادام­گەر­شىلىك قۇندىلىقتارىن ساقتاپ قالۋ ءۇشىن ۋاقتىلى ءارى ناقتى ارەكەت ەتۋىمىزدى تالاپ ەتەدى. ءبىزدىڭ پارتيا وسى ماسەلەمەن كەشەندى تۇردە شۇعىلداناتىن بولادى, دەدى ءا.بەكتاەۆ. ودان ءارى سپيكەر ەلىمىزدىڭ اۋىل شا­رۋاشىلىعى سالاسىنىڭ مول مۇمكىندىكتەرى جونىندە كەڭىنەن اڭگىمەلەپ ءوتتى. ءبىز اۋىل حالقىنىڭ وزەكتى ماسەلەلەرىن باستى نازاردا ۇستاۋىمىز كەرەك. وزدەرىڭىز بىلەسىزدەر, اۋىل جانە اگروونەركاسىپ كەشەنى ەلىمىزدىڭ دامۋى جولىندا ەرەكشە ورىن الادى. ەلىمىزدىڭ 8,0 ميلليون تۇرعىنى, ياعني حالقىمىزدىڭ 45 پايىزى اۋىلداردا تۇرادى. اگرارلىق ءوندىرىس قازاقستان حالىق شارۋاشىلىعىنىڭ ءىرى جانە ءداستۇرلى سالاسى بولىپ تابىلادى. سوڭعى جىلدارى اۋىل مەن اۋىل­شا­رۋاشىلىق سالاسىن قولداۋعا مەملەكەت تاراپىنان ناقتى قادامدار جاسالدى. دە­گەنمەن, اتالعان سالادا شەشىمىن كۇتكەن تۇيتكىلدەر بارشىلىق. ماسەلەن, وتاندىق تاۋار وندىرۋشىلەر ونىمدەرىنىڭ باسىم بولىگى جەكە قوسالقى شارۋاشىلىقتاردىڭ ۇلەسىندە. الايدا, ولارعا ورتالىق جانە جەرگىلىكتى اتقارۋشى ورىندار تاراپىنان جەتكىلىكتى دەڭگەيدە كوڭىل بولىنبەۋدە. ستاتيستيكالىق مالىمەتتەرگە قارا­عاندا, ەلىمىز بويىنشا مال شارۋاشىلىعى سالاسىنا تيەسىلى جالپى ءونىمىنىڭ 72 پايىزىن جەكە قوسالقى شارۋاشىلىقتار وندىرەدى. بۇگىندە اۋىل تۇرعىندارىنىڭ جەكە قورالارىندا ءىرى قارا مالدىڭ 65 پايىزى, قوي مەن ەشكىنىڭ 61 پايىزى, جىل­قىنىڭ 54 پايىزى شوعىرلانعان. ءبىز وسىناۋ مۇمكىندىكتى جالپى ەل يگىلىگى ءۇشىن ۇتىمدى پايدالانۋىمىز كەرەك, دەدى پارتيا توراعاسى. سونىمەن قاتار, ءا.بەكتاەۆ سەز­گە قاتىسۋشى دەلەگاتتاردىڭ نازارىن اۋىل­شا­رۋاشىلىق جەرلەرىن ماقساتتى جانە وڭتايلى پايدالانۋعا باقىلاۋدى كۇشەيتۋ قاجەتتىگىنە اۋداردى. «اۋىل» پارتياسى اۋىلشارۋاشىلىق جەرلەرىنە قاتىستى ماسەلەلەرگە كوز جۇمىپ قارامايدى. 180 ميلليون گەكتار اۋىلشارۋاشىلىق جەر­لەرىنىڭ 30 پايىزى ءتۇرلى ەروزياعا ۇشى­راعان. بۇل القاپتاردىڭ جاعدايى ءبىزدى ويلان­دىرۋى ءتيىس. اۋىلشارۋاشىلىق جەر­لەرىنە قازىرگى زاماناۋي تەحنولوگيالار­دى قولدانۋدىڭ جەتكىلىكسىزدىگى دە ۇلكەن ماسەلە. سونداي-اق, استىق ەگىلەتىن جەرلەر­دىڭ 40 پايىزىنا ارنايى دايىندالعان ساپالى تۇقىم سەبىل­مەيدى, دەدى ول. سونداي-اق, پارتيا توراعاسى اگرارلىق عىلىم سالاسىنىڭ ءمۇم­كىن­دىكتەرىن ءوز ءسوزىنىڭ ارقاۋى ەتتى. «اۋىل شارۋاشىلىعى سالاسىنا قاتىستى 200-گە جۋىق عىلىم دوكتورى مەن 500-دەن استام عىلىم كانديداتىنىڭ الەۋەتىن تولىق پايدالانا الماي وتىرمىز. قازاقستاندا عىلىمي ينستيتۋتتاردىڭ سانى ءبىلىم بەرۋ ورتالىقتارىنان كوپ. الايدا, يننوۆاتسيالىق جۇيەنى جەتىلدىرۋ ءوز دەڭگەيىندە ەمەس. وسى ورايدا بارلىق اۋدان ورتالىقتارىنان مامانداردىڭ ءبىلىمى مەن ماشىعىن جەتىلدىرەتىن ورىندار اشۋ قاجەت. ءبىز عىلىم مەن اۋىل شارۋاشىلىعىن تىعىز بايلانىستىرا وتىرىپ جۇمىس ىستەۋىمىز كەرەك, دەدى سپيكەر. سونىمەن قاتار, پارتيا توراعاسى مەملەكەت تاراپىنان اۋىل شارۋاشىلىعى سالاسىنا جاسالىپ جاتقان قولداۋلار جونىندە ايتا كەلىپ, اۋىلدى كەشەندى دامىتۋعا باعىتتالعان – اۋىلداعى الەۋمەتتىك جانە ينجەنەرلىك ينفراقۇرىلىمدى دامىتۋعا قابىلەتتى «اۋىل ينفراقۇرىلىمى» اتتى مەملەكەتتىك باعدارلامانى دايىنداۋ قاجەتتىگىن جەتكىزدى جانە باسقا دا وزەكتى ماسە­لەلەردى اتاپ كورسەتتى. جيىن بارىسىندا پارتيا توراعاسى ءالي بەكتاەۆ بىرقاتار الەۋمەتتىك ماسەلەلەردى دە ءسوز ەتتى. ول ءسوزىنىڭ سوڭىن: «الدىمىزدا بيىك بەلەستەر بار. ولاردان القىنباي اسۋ – ءوز قولىمىزدا. مىزعىماس بىرلىك پەن تىنىمسىز ەڭبەك, جاسامپازدىق پەن جاڭاشىلدىق, رۋحاني بيىكتىك – ءبىزدىڭ ەڭ باستى قۇرالىمىز. پارتيامىز پارمەندى, ەلدىگىمىز ماڭگىلىك بولسىن!» – دەپ تۇيىندەدى. بۇدان كەيىن بىرقاتار ازامات مىنبەگە كوتەرىلىپ, پارتيانىڭ الدى­نا قويىپ وتىرعان ماقسات-مىندەتى, باعى­تى تۇرعىسىندا ءسوز قوزعاي كەلىپ, ءوز ارىپتەستەرىن الداعى سايلاۋعا بەلسەندى قاتىسۋعا شاقىردى. سونىمەن, سەزد سوڭىندا قاتى­سۋ­شىلارى «اۋىل» حدپپ-نىڭ «اۋىل ءداستۇرىن جاڭعىرتامىز» اتتى سايلاۋالدى باعدارلاماسىن ءبىراۋىزدان قابىلدادى جانە زاڭناما تالاپتارىنا ساي 19 ادامنان تۇراتىن ۇمىتكەرلەردىڭ پارتيالىق ءتىزىمىن بەكىتتى. جولدىباي بازار, «ەگەمەن قازاقستان». سۋرەتتى تۇسىرگەن ەرلان وماروۆ.