سولتۇستىك قازاقستان وبلىسىنىڭ اكىمى كوميتەت توراعاسىمەن كەزدەستى

پەتروپاۆل. 1 اقپان. قىزىلجار وڭىرىنە ىسساپارمەن كەلگەن قازاقستان رەسپۋبليكاسىنىڭ ىشكى ىستەر مينيسترلىگىنىڭ توتەنشە جاعدايلار كوميتەتىنىڭ توراعاسى ۆلاديمير بەككەر ايماق باسشىسى ەرىك سۇلتانوۆپەن كەزدەستى. كەزدەسۋ بارىسىندا ازاماتتىق قورعاۋ سالاسىنا قاتىستى مىندەتتەر تالقىلاندى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. كوميتەت توراعاسى جەدەل-قۇتقارۋ جاساعىنىڭ قىزمەتىمەن, ۆەدومستۆوعا قاراستى مەكەمەلەردىڭ ماتەريالدىق-تەحنيكالىق بازاسىمەن, تەحنيكالىق جاعدايىمەن تانىستى. ءىسساپار باعدارلاماسىنا سايكەس قالالىق مادەنيەت ءۇيىنىڭ اكت زالىندا وبلىس اكىمىنىڭ ورىنباسارى مۇحتار مانكەەۆتىڭ قاتىسۋىمەن دەپارتامەنتتىڭ جۇمىس قورىتىندىلارى شىعارىلىپ, الداعى مىندەتتەرى بەلگىلەندى. اۋماقتىق ورگاننىڭ جانە ۆەدومستۆوعا قاراستى مەكەمەلەردىڭ قىزمەتكەرلەرى الدىندا دەپارتامەنت باسشىسى پاۆەل فيليپپوۆ, سونداي-اق, قۇرىلىمدىق بولىمشەلەر جەتەكشىلەرى ەسەپ بەردى. وبلىستا جاعداي باقىلاۋعا الىنعان. وسىعان بايلانىستى كورسەتكىش بويىنشا, ءورت جاعدايى 5 پايىزعا, ءتىلسىز جاۋدان قازا تاپقاندار 17 پايىزعا, ال زارداپ شەككەندەر 24 پايىزعا ازايعان. اپاتتىق-قۇتقارۋ قىزمەتتەرى ورتتەرگە, اپاتتىق-قۇتقارۋ جۇمىستارىنا جانە وزگە دە قاۋىرت جۇمىستارعا قارسى 2 مىڭعا جۋىق  شارالار ۇيىمداستىرعان. 167 ادام قۇتقارىلىپ, 265  ادامعا العاشقى مەديتسينالىق كومەك كورسەتىلگەن. سونداي-اق, 800 ميلليون تەڭگەنىڭ  ماتەريالدىق قۇندىلىقتارى ساقتالىنعان. ءومىر ەسقالي. دەرەك, سۋرەت: سولتۇستىك قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.