اقش وفيتسەرى جەزوكشەلەر قىزمەتى ءۇشىن قۇپيا مالىمەتتەردى ساۋدالاعان

استانا. 31 قاڭتار. اقش اسكەري-تەڭىز فلوتىنىڭ وفيتسەرى سىيلىق پەن جەڭىل ءجۇرىستى قىزداردىڭ قىزمەتى ءۇشىن قۇپيا مالىمەتتەردى ساۋدالاپ كەلگەن. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. اقش ادىلەت مينيسترلىگىنىڭ حابارلاۋىنشا, كومماندەر اسكەري دارەجەسىندەگى تەڭىز فلوتىنىڭ جاۋىنگەرى پەنتاگوننىڭ جالدامالى قىزمەتكەرىنە قۇپيا اقپاراتتاردى اقشا, سىيلىقتار مەن جەڭىل ءجۇرىستى قىزداردىڭ قىزمەتىنە ايىرباستاپ وتىرعان. مايكل ۆانناك حەم ميزەۆيچ ەسىمدى وفيتسەر ءوزىنىڭ پاراقورلىققا بايلانىستى ەكى قىلمىستىق ءىس بويىنشا كىنالى ەكەنىن مويىنداعان. «كومماندەر مايكل ۆانناك حەم ميزەۆيچ شەتەلدىك جالدامالى قىزمەتكەرگە قۇپيا اقپاراتتار بەرىپ وتىرعان. ەگەر بۇل مالىمەتتەر وزگە بىرەۋدىڭ قولىنا تۇسسە, ۇلتتىق قاۋىپسىزدىكتىڭ تاس-تالقانىن شىعارار ەدى», – دەپ حابارلادى اقش باس پروكۋرورىنىڭ ورىنباسارى لەسلي كالدۋەلل. باس پروكۋراتۋرا وكىلىنىڭ سوزىنە قاراعاندا, وسى ءىس-ارەكەتى ارقىلى كۇدىكتى امەريكالىق اسكەريلەردىڭ باسىن ۇلكەن قاۋىپ-قاتەرگە تىككەن. ال كۇدىكتى جاۋىنگەر كىناسىن مويىنداعان. ول 2011-دەن 2013 جىلعا دەيىن GDMA دەپ اتالاتىن سينگاپۋرلىك كومپانياعا قۇپيا اقپاراتتاردى ۇسىنىپ, كەلىسىمشارت جاساسۋ كەزىندە وسى كومپانيانىڭ مۇددەسىن قورعاپ كەلگەن. اقپاراتپەن الماسقانى ءۇشىن كومپانيا باستىعى لەونارد گلەنن فرەنسيس وفيتسەر مەن ونىڭ وتباسىنا سالتاناتتى قوناق ۇيلەردە دامالىس, سونداي-اق, مايكل ۆانناك حەم ميزەۆيچكە جەزوكشەلەردىڭ قىزمەتىن سىيعا تارتىپ وتىرعان. بۇل ءىس بويىنشا ميزەۆيچتىڭ توعىز سىبايلاسى دا جاۋاپقا تارتىلۋدا. ولاردىڭ قاتارىندا اقش اسكەري تەڭىز فلوتىنىڭ ءتورت وفيتسەرى, ونىڭ ىشىندە, فلوتتىڭ كريمينالدىق تەرگەۋ قىزمەتى – اقش تەڭىز پوليتسياسىنىڭ قىزمەتكەرلەرى دە بار. توعىز كۇدىكتىنىڭ سەگىزى ءوز كىنالارىن تولىق مويىنداعان بولسا, بىرەۋى 27 ايعا تۇرمەگە جابىلدى. ەلامان قوڭىر. دەرەك, سۋرەت: ريا «نوۆوستي».