جاقسى باستاما جالعاسىن تابۋدا

قىسقا مەرزىمدە قارقىندى دامىپ, ەلىمىزدىڭ ماڭدايالدى ءبىلىم وشاعىنا اينالعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە كەيىنگى جىلدارى التى الاشقا ۇلگى بولارلىق جاقسى ءبىر ءداستۇر قالىپتاسىپ كەلە جاتقانى كوڭىلگە قۋانىش ۇيالاتادى. ول قانداي دا ءبىر مەملەكەتتىك مەرەكەنى, ۋنيۆەرسيتەت ىشىندەگى ايتۋلى داتالاردى نەمەسە ۇجىمعا قاتىستى قۋانىشتى تويلاۋدىڭ زاماناۋي جاڭا ۇلگىسى – اسقاق استانانىڭ رۋحاني ورتالىقتارىنا شاقىرىپ, قۋانىشتى كوپشىلىكپەن ءبولىسۋ ارقىلى كوبەيتىپ, رۋحاني ءوسۋ ارقىلى شىن شاتتىققا بولەنۋ ءداستۇرى. بۇل باستامانى العاش كوتەرگەن ءبىلىم ورداسىنىڭ رەكتورى ەرلان سىدىقوۆ ەكەنىن كوپشىلىك جاقسى بىلەدى. وسىنداي شاتتىققا تولى شارانىڭ ءبىرىن ءتورت جىل بۇرىن اتالمىش وقۋ ورنىنىڭ ۇجىمى قاليبەك قۋانىشباەۆ اتىنداعى قازاق تەاترىندا اتاپ وتكەن بولاتىن. سول قۋانىشتى كەشكە ورتاقتاسا كەلگەن وقىتۋشىلار قاۋىمى «مىناۋ ءبىر جاقسى باستاما ەكەن» دەپ شىن ريزاشىلىقپەن سەرپىلىپ قالعانى ءالى ەسىمىزدە. وسىنداي تانىم مەن تاعىلىمى اي­رىقشا مادەني شارا ادامزات تابالدى­رىعىنان جاڭا اتتاعان جىل باسىندا, ناقتى ايتساق, 27 قاڭتاردا ەۋرازيا ۇلت­تىق ۋنيۆەرسيتەتىنىڭ ۇجىمىن تاعى دا ءبىر سەرپىلتتى. ەلىمىز ۇستىمىزدەگى جىلدى قازاقستان رەسپۋبليكاسى تاۋەلسىزدىگىنىڭ شيرەك عاسىرلىق مەرەيتويىنىڭ جىلى دەپ شادىمان كوڭىل كۇيمەن اتاپ ءوتۋدى باستاپ تا كەتتى. وسىناۋ مەملەكەتتىك ءمار­تەبەلى مەرەكە تاۋەلسىزدىكتىڭ ءتول تۋماسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 20 جىلدىق مەرەيتويىمەن تۇسپا-تۇس كەلىپ, بىرلىگى مەن تىرلىگى جا­راس­قان ۇجىمنىڭ سالتاناتىن ەسەلەي تۇسۋدە. وسى يدەيا اياسىندا اتالمىش ۋنيۆەرسيتەت ءتورت جىل بۇرىنعى ءداستۇرىن تورگە شىعاردى. بۇل جولى «استانا وپەرا» تەاترىنا بارىپ, «اباي» قويىلىمىن تاماشالاپ, جان سارايىن اشار اسقاق ونەرمەن قاۋىشىپ, رۋحاني وي ولجالاپ قايتتى. جاقسى باستاما جالعاسىن تاپتى دەگەن, مىنە, وسى. راۋان قايدار, «ەگەمەن قازاقستان».