اۋىلداعى اللانىڭ ءۇيى

الداعى جازدا پايدالانۋعا بەرىلمەك تەكەس اۋىلىندا وسىدان ون­شاقتى جىل بۇرىن بوي كوتەرگەن مەشىت ءۇيىنىڭ قۇرىلىسى قاراجات تاپشىلىعىنان جارىم جولدا توقتاپ قالعان ەدى. ءارى وتكەن, بەرى وتكەننىڭ كوزىنە شىققان سۇيەلدەي مۇشكىل حال كەشىپ تۇرعان سول قا­سيەتتى شاڭىراقتىڭ اينالاسى ءوت­كەن جازدان بەرى دۇبىرگە تولىپ, جوندەۋ جۇمىستارى قاي­تا جاندانا باس­تادى. ارينە, ونى قولعا الىپ وتىرعان باي دا, باعلان دا, جاقسى دا, جايساڭ دا ەمەس. وسى اۋىلدىڭ اۋزىندا اللاسى, كو­كىرەگىندە يمانى بار, بەس ۋا­قىت نامازىن قازا قىل­مايتىن نۇرلان ابىحانوۆ, عابيت بايساقالوۆ, ەرعانات تاۋ­بالديەۆ, الماس ءنۇسىپ­بەكوۆ, ماقسات جان­پەيى­سوۆ سەكىلدى قاراپايىم عانا جىگىتتەرى. قاستەرلى شاڭىراقتىڭ قامقور قولدىڭ قايىرىنا ءزارۋ بولىپ, ءمۇساپىر كۇيگە ءتۇسىپ تۇرعان كورىنىسى اللانىڭ اق جولىندا ءجۇرمىز دەيتىن جىگىتتەردىڭ جان-جۇرەگىن جاي تاپتىرماسا كەرەك. ءوزارا اقىلداسىپ, ساۋاپتى ىسكە مۇرىندىق بولۋعا بەل بايلايدى. مەشىتتىڭ ءىشى-سىرتىن ارالاپ كورىپ, ەندىگى جۇمىسىنا جۇمسالاتىن قاراجات كولەمىن انىقتاپ الادى. سودان كەيىن اۋىل جۇرتىنىڭ باسىن قوسادى. وعان اۋىل باسشىلارى مەن ەلدىڭ جايى دەسە بۇيىرلەرى بۇلكىلدەيتىن اق­ساقال-قاراساقالداردى دا ارالاس­تىرا, ويلارىن ورتاعا سالعاندا, بارلىعى دا ءبىراۋىزدان قولداۋ بىلدىرگەن-ءدى. جاراتقاننىڭ جاق­سىلى­عىنان ءۇمىتتى جاماعات مۇن­دايدا ايانىپ قالسىن با. قۋانا قۇپتادى. ءبىرى قويىن, ءبىرى تايى­ن, ەندى ءبىرى تانا-تورپاعىن اتاپ, قال­تالىسى اقشالارىن ۇسىنىپ, اجەپتاۋىر قاراجاتتىڭ باسى بىرىك­كەن. جينالعان مالدى اقشاعا, اقشانى زاتقا اينالدىرا بىلگەن جىگىتتەر قۇرىلىسقا قاجەتتى ماتە­ريال­داردى ساتىپ الىپ كەلدى دە, ساۋاپتى ىسكە كىرىستى دە كەتتى. ناتيجەسىندە سىرتىنىڭ جاۋىن مەن كۇنگە قاقتالىپ مۇجىلگەن جەرلەرى اقتالىپ-سىلانىپ, قايتا قالپىنا كەلتىرىلدى. توبەسىنىڭ مايىسقان بەلاعاشتارى دا اۋىس­تىرىلىپ, شاتىرى قاڭىلتىرمەن كومكەرىلدى. اسپان تۇستەس كۇمبەزى مەن ازان شاقىراتىن مۇناراسى دا كۇنشىلىك جەردەن كوز تارتاتىن دارەجەگە جەتكىزىلدى. سول سياقتى مەشىت ىشىندەگى 200 ادام ءبىر مەزگىلدە نامازعا تۇراتىن, ايەلدەر ناماز وقيتىن, يمام جۇ­مىس ىستەيتىن بولمەلەر دە ءدىن تالابىنا ساي قالىپ­قا ءتۇسىپ كەلەدى. جاقىندا عانا ورناتىلعان جىلۋ جۇيەسى دە جاڭاشىلدىعىمەن ەرەك­شەلەنەدى. مايدى دا, كومىر­دى دە قاجەتسىنبەيتىن جىلۋ قا­زان­دىعى ەلەكتر قۋاتى ارقىلى جۇمىس ءىس­تەيدى. جىلۋ قازاندىققا قوسىلعان تۇتىكشەلەر ارقىلى ەدەن استىنان جىبەرىلگەن. مەشىت ءىشى وسىلايشا قاقاعان قىستا دا قۇرقىلتايدىڭ ۇياسىنداي قىز-قىز قايناپ تۇرماق. مەشىتتىڭ جوندەۋ جۇمىس­تارىنا ەشكىم سىرتتان مامان ىزدەپ سابىلعان جوق. بارلىق جۇمىستى قۇرىلىستان حابارى بار اۋىل جىگىتتەرى وزدەرى-اق تىندىرۋدا. سون­دىقتان دا مۇن­داعى ءار مينۋت, ءار ساعات ەسەلى ەڭبەككە تولى. ءيا, تەكەستەگى جاڭا مەشىتتىڭ قۇرى­لىسى كۇن وتكەن سايىن قار­قىن الۋدا.  جۇمابەك تالىپ ۇلى. الماتى وبلىسى, رايىمبەك اۋدانى.