اناسىن بالاعاتتاعان ۇل

100 ساعاتقا قوعامدىق جۇمىسقا تارتىلدى ەلىمىزدەگى شاعىن قالانىڭ ءبىرى – قۇلسارىدا تۇراتىن سوق­تالداي جىگىت باسقا ەمەس, ءوزىن 9 اي قۇرساعىندا كو­تەرىپ, ايالاعان اناسىنا ءتىل تيگىزىپتى. ول ۇيىنە اراق ءىشىپ كەلىپ, ماس كۇيىندە اناسىن ەش سەبەپسىز بوقتاپ-بالا­عاتتاپ, سۇيرەلەۋمەن شەكتەل­مەي, بەتىنەن تەۋىپ, سوققى دا جاسا­عان. ارينە, بالاسىنان بوقتىق ءسوز ەستىپ, سوققى جەۋ انا ءۇشىن وڭاي ەمەس قوي. اق جاۋلىقتى انا قورعانۋ ماق­­ساتىندا بەتىن الاقانىمەن جاۋىپ قالعان. وسىدان كەيىن باۋىر ەتى – بالاسىنىڭ ورەسكەل ارەكەتىنەن ابدەن كوڭىلى قالىپ, جۇرەگىنە قاياۋ ءتۇس­كەن انا سوتقا جۇگىنەدى. ويتكەنى, انا­سىنىڭ سوتتا ءمالىم ەتكەنىندەي, با­لاسى كۇن سايىن ۇيىنە اراق ءىشىپ كەلەدى ەكەن. ءسويتىپ, ءوزى ءوسىپ-ونگەن شا­ڭى­راعىنىڭ شىرقىن بۇزىپ, بەرە­كەسىن كەتىرەتىن بالاسىن جازالاۋدى وتىنەدى. راس, سوت وتىرىسىندا كىنالى جىگىت ءوز كىناسىن تولىق مويىندادى. «بالامنىڭ تابانىنا كىرگەن ءشوڭ­گە ماڭدايىما قادالسىن» دەپ, ەسەيسە دە مەيىرىمىن ايامايتىن اناسىنان كەشىرىم سۇرادى. تاراپ­تاردىڭ ۋاجدەرىن تىڭداعان جىلىوي اۋدان­­دىق سوتى كىنالىنى قىل­مىس­­تىق كودەكستىڭ 108-بابىمەن ايىپ­تى دەپ تانىپ, 100 ساعاتقا قو­­­عامدىق جۇمىسقا تارتۋ جونىندە ۇكىم شىعاردى. بۇل وزگە ەسەر­سوق­تارعا ساباق بولسا, قانە! جولداسبەك شوپەعۇل, «ەگەمەن قازاقستان». اتىراۋ وبلىسى.