ىشتەي ۇيىساق قانا ۇتاتىنىمىزدى ءتۇسىندىردى

بۇگىندە ەلىمىزدە پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ كەزەكتەن تىس سايلاۋى ناۋقانى باس­تالدى. وسىعان وراي جەتەكشى پارتيا – «نۇر وتان» پارتياسىنىڭ كەزەكتەن تىس حVII سەزى ءوتتى. وندا ەلباسى نۇرسۇلتان نازارباەۆتىڭ بايانداماسىندا ايتىلعان ماسەلەلەردىڭ بارلىعى دا بۇگىنگى ۋاقىتتىڭ تىنىسىن ءدوپ باسادى. بۇكىل الەمدى ءبىر تارىنىڭ قاۋىزىنا سىيعىزعان قارجى داعدارىسى, الپاۋىت مەملەكەتتەر اراسىنداعى ساياسي جانە ەكونوميكالىق تەكەتىرەستەر سالدارى قازاقستاندى دا اينالىپ كەتە المادى. جاھاندانۋ كەزەڭىندە ەشقانداي مەملەكەت ءبىر كەمەنىڭ ۇستىندەگى جولاۋشىداي الەمنەن تىس تۇرا المايدى. قازاقستان دا مۇنى باستان كەشىپ وتىر. دەگەنمەن, ەلباسى قازاقستان وسى داعدارىستىڭ, جاھاندانۋ ۇدەرىسىنىڭ يىرىمىنە ءتۇسىپ كەتپەۋ ءۇشىن تىعىرىقتان قالاي شىعۋدىڭ جولدارىن تاعى دا قولمەن قويعانداي ەتىپ كورسەتىپ ايتتى. داعدارىسقا قارسى باعدارلاما جۇزەگە اساتىن بولادى. كەڭ كولەمدى جەكەشەلەندىرۋ, بيزنەستى دامىتۋ, نارىقتىق تازا باسەكەنى قالىپتاستىرۋ, ەڭ باستىسى, ۋاقىت تالابىنا ساي ۇنەمدەي ءبىلۋدى ناقتىلادى. «مىڭ ءولىپ, مىڭ تىرىلگەن» اتالارىمىز «قويىپ ىشسەڭ – قوي قالادى, تارتىپ ىشسەڭ – تاي قالادى», «كورپەڭە قاراي كوسىل» دەگەن عوي. بۇل ماسەلە تۋرالى ەلباسىنىڭ ءسوزى جۇرەكتەرگە جەتتى, اركىم ودان ىشتەي ءتۇيىن جاسايدى دەپ ويلايمىن. تىنىشتىعى جوق, بەرەكەسى كەتكەن ەلدەردە نە بولىپ جاتقانىن بۇكىل الەم كورىپ وتىر. سوندىقتان, ادامدار ءۇشىن بەيبىت كۇننەن, ءوز وتانىڭنان, وتىڭنىڭ باسىنان ارتىق نە بار؟ پارتيا سەزىندە ەلباسى باقىتتىڭ, قىزىق ءومىردىڭ بارلىعى دا وتانىمىزدا, تۋعان جەردە ەكەنىن ايتتى. قازاقستاندا جاسالعان جاعدايدىڭ ىقپالىمەن بايىپ الىپ, ەندى نيەتى دالاعا اۋعانداردىڭ ءىسى دۇرىس بولار ما ەدى؟ ەلباسى ايتقانداي, شەتەلدەردە قارجىسى, جىلجىمايتىن مۇلكى بارلار ولاردى جاريالاپ, سول قارجىعا ءوزىن وسىرگەن تۋعان ەلىندە, وتانىندا كاسىپورىندار اشسا, وتان­داستارىنا جۇمىس ورىندارىن ۇسىنسا, بۇل ۇلكەن ادامگەرشىلىكتىڭ ءىسى بولار ەدى. مۇنىڭ ءوزى سىرتقى, قانداي دا بوتەن كۇشتەردىڭ ىقپالىنا الدىرماس, ىشتەي ۇيۋ, بىرىگۋ, كۇشەيۋ بولار ەدى. سولاي بولارىنا سەنەمىز. ويتكەنى, ەكونوميكا دامىسا, الەۋمەتتىك سالا گۇلدەنە باستايدى. ءوزىم وسى سالادا قىزمەت ەتكەندىكتەن, ادامدار تۇرمىسىنىڭ, دەنساۋلىعىنىڭ جاقسارۋى جالپى ەلىمىز دامۋىنا تىكەلەي تاۋەلدى ەكەنىن جاقسى بىلەمىن. «نۇر وتان» پارتياسىنىڭ كەزەكتەن تىس سەزىندە ايتىلعان ماسەلەلەر وتانداستارىمدى جاقسى ىستەرگە ۇمتىلدىرىپ, تاعى دا رۋحاني كۇش بەردى. ءنازيما اسانوۆا, قوستاناي پسيحونەۆرولوگيالىق ينتەرنات ءۇيىنىڭ ديرەكتورى. قوستاناي.