الماتىدا رەجيسسەر وراز ابىشەۆ اتىنداعى ستيپەنديا تاپسىرىلدى

الماتى. 29 قاڭتار. الماتىداعى «تۇران» ۋنيۆەرسيتەتىندە «كينو جانە تەلەۆيزيا اكادەمياسى» فاكۋلتەتىنىڭ تاڭداۋلى ستۋدەنتتەرىنە وراز ابىشەۆ اتىنداعى ارنايى ستيپەنديانى سالتاناتتى تۇردە تابىستادى. بۇل تۋرالى egemen.kz ءتىلشىسى حابارلادى. مادەني شارا قازاقستان دەرەكتى كينو ونەرىنىڭ نەگىزىن قالاۋشى رەجيسسەر, قازاق سسر-ءنىڭ حالىق ءارتىسى, قازاق سسر مەملەكەتتىك سىيلىعىنىڭ يەگەرى وراز ابىشەۆتىڭ 100 جىلدىق مەرەيتويى قارساڭىنا وراي ۇيىمداستىرىلدى. قازاقستاندا كينو سالاسىندا بەلگىلى ءبىر رەجيسسەردىڭ اتىنداعى ارنايى ستيپەنديا تاعايىنداۋ ءراسىمى بۇرىن-سوڭدى بولماعان. «رەجيسسۋرا» ماماندىعىنىڭ تاڭداۋلى ستۋدەنتتەرىنە تاعايىندالعان ارنايى ستيپەنديانى كونستانتين سۋروۆ, سەرىك سارسەنباەۆ, ءلايلا سىزدىقوۆا يەمدەندى. ستيپەنديا يەگەرلەرىن ماراپاتتاۋ ءراسىمى وراز ابىشەۆتىڭ شىعارماشىلىعى مەن عۇمىرنامالىق جولىنا ارنالىپ تۇسىرىلگەن رەجيسسەر جاڭابەك جەتىرۋوۆتىڭ «ورالۋ» اتتى دەرەكتى ءفيلمىنىڭ ارنايى كورسەتىلىمىمەن اشىلدى. كەش بارىسىندا «تۇران» ۋنيۆەرسيتەتىنىڭ رەكتورى راحمان الشانوۆ, وراز ابىشەۆتىڭ ۇلى, قانات ابىشەۆ, رەجيسسەردىڭ قىزى گۇلجاحان ابىشەۆا, ۇيىمداستىرۋ كوميتەتىنىڭ ورىنباسارى گۇلبازار مەديەۆا ءسوز الىپ, ارنايى ستيپەنديا يەگەرلەرىن قۇتتىقتادى. وراز ابىشەۆتىڭ ونەردەگى ءىزباسارلارى, قازاقستان كينەماتوگرافيستەر وداعىنىڭ توراعاسى سلامبەك تاۋەكەل مەن «باستاۋ» حالىقارالىق ستۋدەنتتىك جانە دەبيۋتتىك فيلمدەر كينوفەستيۆالىنىڭ ديرەكتورى سەرگەي ازيموۆ ستۋدەنتتەرگە تانىمدىق تۇرعىدان ۇلگى بولارلىقتاي ەستەلىكتەرىمەن ءبولىستى. ايناش ەسالي. دەرەك, سۋرەت: egemen.kz.