جامبىل وبلىسىندا 62,3 مىڭ گەكتار جەر پايدالانۋسىز جاتىر

تاراز. 29 قاڭتار. جامبىل وبلىسى -- جەر رەسۋرستارىنان كەندە ەمەس. وبلىس رەسپۋبليكا اۋماعىنىڭ 5,3 پايىزىن نەمەسە 14 ميلليون 426 مىڭ گەكتاردان استام اۋماقتى الىپ جاتىر. بۇل تۋرالى egemen.kz ءتىلشىسى حابارلادى. بۇل حالىق سانىنا شاققاندا وبلىستىڭ ءاربىر تۇرعىنىنا 13,5 گەكتاردان اينالادى. ءوڭىر اۋماعىنىڭ 72 پايىزى تاۋارلى اۋىل شارۋاشىلىعى ءوندىرىسىن جۇرگىزۋگە قولايلى جەرلەر بولىپ تابىلادى. جامبىل وبلىستىق جەر قاتىناستارى باسقارماسىنىڭ باسشىسى ءىلياس تورتاەۆتىڭ ايتۋىنا قاراعاندا, 2014 جىلمەن سالىستىرعاندا وتكەن جىلى ەگىستىك جەرلەردىڭ يگەرىلۋ كولەمى 7 مىڭ گەكتارعا ۇلعايعان. الايدا, وبلىس اۋداندارىندا 62,3 مىڭ گەكتار ەگىستىك جەر پايدالانۋسىز قالعان. مونيتورينگ قورىتىندىسى ەگىستىك جەرلەردى پايدالانۋ كورسەتكىشى مويىنقۇم, سارىسۋ, تالاس اۋداندارىندا 71-84 پايىزدان اسپاي وتىرعاندىعىن كورسەتكەن. ەگىن شارۋاشىلىعى جاقسى دامىعان اۋداندار ىشىندە جەردىڭ ەڭ تومەنگى يگەرىلۋ كورسەتكىشى شۋ اۋدانىندا قالىپتاسىپ وتىر. اتالمىش اۋداندا وتكەن جىلى 32 مىڭ گەكتاردان استام ەگىستىك جەر پايدالانۋسىز قالعان. باسقارما باسشىسى بۇل كورسەتكىشتەر جەردى پايدالانۋ مەن قورعاۋدى باقىلاۋ دەڭگەيىنىڭ تالاپتارىنا ساي ەمەستىگىن الدىعا تارتادى. جەر قورىن تۇگەندەۋ جۇمىستارى دا ۇزدىكسىز جۇرگىزىلىپ كەلەدى. بۇگىنگى تاڭعا انىقتالعان جەردىڭ 547 مىڭ گەكتارى ياعني 93 پايىزى قايتارىلعان. دەسەك تە, الدىڭعى جىلى جۇرگىزىلگەن تۇگەندەۋ بارىسىندا ءمالىم بولعان 43 مىڭ گەكتار اۋىل شارۋاشىلىعى جەرى مەملەكەت يەلىگىنە قايتارىلماي وتىر. اتاپ ايتار بولساق, قورداي اۋدانىندا – 3, شۋ اۋدانىندا 40 مىڭ گەكتار جەر مەملەكەت يەلىگىنە ءوتۋى كەرەك. ورالحان ءداۋىت. دەرەك, سۋرەت: egemen.kz