نيۋ-يوركتە 200 مىڭ زەينەتكەر مەملەكەتتىك باسپانا كەزەگىندە تۇر

استانا. 28 قاڭتار. نيۋ-يوركتە 200 مىڭ زەينەتكەر مەملەكەتتىك باسپاناعا كەزەكتە تۇر. اقش تۇرعىن-ءۇيدى دامىتۋ جانە قۇرىلىس دەپارتامەنتىنىڭ تاپسىرماسىمەن جۇرگىزىلگەن زەرتتەۋ قورىتىندىسى نيۋ-يورك قالاسىندا قولجەتىمدى باسپانا ماسەلەسى وزەكتى ەكەنىن كورسەتكەن. بۇل تۋرالى newsru.com سايتىنا سىلتەمە جاساعان egemen.kz ءتىلشىسى حابارلادى. Daily News باسىلىمىنىڭ حابارلاۋىنشا, جەڭىلدىكپەن ساتىلاتىن نەمەسە جالعا بەرىلەتىن مەملەكەت قارجىلاندىراتىن پاتەرلەر كەزەگىندە قازىردىڭ وزىندە 200 مىڭ جاسى كەلگەن قالا تۇرعىنى تۇر. زەينەت جاسىنداعى قاريالار بۇل پاتەرلەردى ورتاشا ەسەپپەن جەتى جىلداي كۇتەدى. تابىسى وتە تومەن نەمەسە ورتاشا تابىستى كەي قاريالاردىڭ, سونداي-اق, مۇگەدەكتەردىڭ كەزەكتە تۇرعانىنا 10 جىلدىڭ ءجۇزى بولعان. زەرتتەۋدى جۇرگىزگەن LiveOn NY كومپانياسىنىڭ وكىلى بوببي سەكمەن: «الەۋمەتتىك جاعدايى ناشار قارتتار ءۇشىن قولجەتىمدى باسپانا قاجەتتىلىگى «وتە جوعارى» دەسەك, وسىنىڭ ءوزى ماسەلەنى تولىق باعالاماعانىمىز بولار ەدى», – دەيدى. كومپانيا وكىلى بۇل جاعدايدى ءوز كەزەگىن ۇزاق ۋاقىت كۇتە المايتىن قارتتاردىڭ كوپتىگى كۇردەلەندىرىپ تۇرعانىن ايتادى. ايتا كەتەيىك, 2014 جىلى نيۋ-يورك قالاسىنىڭ باسشىلىعى قالاداعى قولجەتىمدى باسپانانىڭ دامۋ نارىعى جوسپارىن جاريالاعان بولاتىن. جوسپاردا 80 مىڭ جاڭا تۇرعىن ءۇي قۇرىلىسى جۇرگىزىلىپ, بارلىق بەس بيۋرو بويىنشا 120 مىڭ پاتەردى قايتا قالپىنا كەلتىرۋ كوزدەلگەن. جوبا بويىنشا تابىسى از جانە ورتاشا قالا تۇرعىندارىنىڭ بارلىعىن ون جىل كولەمىندە باسپانامەن قامتاماسىز ەتۋى بولجالعان. ال, جوبانى جۇزەگە اسىرۋعا 40 ميلليارد اقش دوللارى جۇمسالادى دەپ جوسپارلانىپ وتىر. ەلامان قوڭىر. دەرەك: newsru.com. سۋرەت: news.tut.by.