بەلگيادا بوسقىندارعا باسسەينگە كەلۋگە تىيىم سالىندى

استانا. 26 قاڭتار. بەلگيانىڭ كوكسەيدە قالاسىنىڭ مەرى مارك ۆاندەن بۋششە الداعى ءبىر ايدا بوسقىن ەر ادامدارعا قوعامدىق باسسەيندەرگە كەلۋگە تىيىم سالدى. وعان كەلۋشى ايەلدەردىڭ شاعىمى سەبەپ بولىپ وتىر. بۇل تۋرالى lenta.ru اقپارات پورتالىنا سىلتەمە جاساعان egemen.kz ءتىلشىسى حابارلادى. شاھار باسشىسىنىڭ ايتۋىنشا, جەرگىلىكتى قىز-كەلىنشەكتەر شومىلۋ كەزىندە بوسقىن ەرلەردىڭ وزدەرىنە سۇقتانا قارايتىنىن جەتكىزىپ, شاعىمدانعان. ءتىپتى, كەيبىر بوسقىندار ايەلدەر سۋدا ءجۇزىپ جۇرگەن كەزدە سول كورىنىستىڭ اياسىندا سەلفيگە تۇسەدى ەكەن. «مۇنداي كەلەڭسىزدىكتەر كۇن سايىن ارتىپ كەلەدى. بۇرىن-سوڭدى بىزدە وسىنداي شاعىمدار بولعان ەمەس. باستاپقىدا ەشقانداي شارا قولدانعان جوقپىز. الايدا, يراكتان شىققان بوسقىننىڭ باسسەيننەن شىعىپ كەلە جاتقان 11 جاسار قىزعا تاپ بەرۋى كوپشىلىكتىڭ جاعاسىن ۇستاتتى. ءدال وسى وقيعادان كەيىن ارەكەت ەتۋگە ءماجبۇر بولدىق. بوسقىندارعا ءوزىمىزدىڭ ءومىر ءسۇرۋ قاعيدالارىمىزدى ۇيرەتەتىن كەز كەلدى», – دەگەن ۆاندەن بۋششە بۇل تىيىمنىڭ ايەل بوسقىندار مەن بالالارعا قاتىسى جوق ەكەنىن ايتتى. دەگەنمەن, مەردىڭ بۇل شەشىمى بريۋسسەل تاراپىنان سىنعا ۇشىرادى. بەلگيانىڭ بوسقىندار ماسەلەسى جونىندەگى مەملەكەتتىك حاتشىسى تەو فرانكەن ءبىر ادامنىڭ ارەكەتى ءۇشىن بارلىق بوسقىندى جازالاۋعا بولمايتىنىن مالىمدەدى. ايتا كەتەيىك, ەۋروپادا بوسقىندار ماسەلەسى گەرمانيانىڭ كەلن قالاسىندا جاڭا جىل الدىندا بولعان وقيعادان كەيىن قايتا ۋشىعىپ كەتتى. اتاپ ايتقاندا, كەلندە افريكا جانە اراب ەلدەرىنەن شىققان مىڭداعان بوسقىن ەر ادامدار ايەلدەر مەن قىزدارعا تاپ بەرىپ, ولاردىڭ سومكەلەرى مەن تەلەفوندارىن تارتىپ العان. ءتىپتى كەيبىرى زورلىق-زومبىلىق ارەكەتتەرگە دە جول بەرگەن. وسىعان بايلانىستى كەلن پوليتسياسى 766 قىلمىستىق ءىس قوزعادى. ونىڭ ىشىندە زورلىققا قاتىستىلارى دا بار ەكەنىن اتاپ وتكەن ءجون. ەلامان قوڭىر. دەرەك: lenta.ru. سۋرەت: spmi.ru.