شەگەلەنگەن شەجىرە

جاقىندا ۇلتتىق مۋزەيدە «تاريحي فوتوسۋرەتتەر» بايقاۋىنىڭ جەڭىمپازدارىن ماراپاتتاۋ ءراسىمى ءوتتى. نازارباەۆ ۋنيۆەرسيتەتتىڭ اكىمشىلىك قىزمەتكەرى, اۋەسقوي فوتوگراف قانات نۇرتازينگە – «قازاق حاندىعىنىڭ 550 جىلدىعى», پەتروپاۆل قالا­سىنداعى «سولتۇستىك قازاق­ستان» باسپاحاناسىنىڭ ءفوتوتىلشىسى ۆاديم مۋداريسوۆكە – « ۇلى جەڭىستىڭ 70 جىلدىعى», «ءوڭتۇس­تىكفيلم» مەملەكەتتىك مەكەمەسى ديرەكتورىنىڭ ورىنباسارى, كاسىپقوي فوتوگراف ماقسات شا­عىر­باەۆقا «كونستيتۋتسيانىڭ 20 جىلدىعى» جانە «قازاقستان حالقى اسسامبلەياسىنىڭ 20 جىلدىعى» اتالىمدارى بويىنشا جۇلدەلەر تابىستالدى. ەسكە سالا كەتەيىك, وتكەن جىل­دىڭ اقپان ايىنان باستاۋ العان فوتوسۋرەتشىلەر بايقاۋى وسى ارالىقتا 300-دەن استام تۋىندىنى ساراپقا سالا كەلىپ, قازاقستاننىڭ وتكەن تاريحى مەن ۇلى دالا كوشىن كوركەم بەينەدە باياندايتىن ونەردىڭ سيرەك ءتۇرى ارقىلى تاعىلىمدى جوبانى العا وزدىردى. ۇزدىك ۇشتىكتىڭ 21 قاڭتار مەن 21 اقپان ارالىعىنداعى فوتوشەجىرەسى قازاق تاريحىنىڭ اسا ماڭىزدى وقيعالارىنا قوعام نازارىن ايرىقشا اۋدارۋىمەن تۇشىمدى. باستى ماقسات – ول ارقىلى جاس ۇرپاقتىڭ بويىنا تۋعان ەلدىڭ بولاشاعى مەن ءتول تاريحىنا دەگەن قۇرمەت سەزىمىن قالىپتاستىرۋ بولىپ تابىلادى. جوبانىڭ ەرەكشەلىگى, بايقاۋعا تانىمال 27 فوتوگراف ءوز جۇمىسىن ۇسىنعان بولاتىن. بايگەنىڭ تاعى ءبىر قى­رى, وعان كاسىبي جانە اۋەسقوي فو­توگرافتاردىڭ قاتىسۋىنا بىردەي مۇمكىندىكتەر تۋعىزىلدى. ءبىرىنشى تۋردا تۋىندىلاردىڭ ەرەجەگە ساي كەلۋى مەن كاسىبي تۇرعىدان ورىندالۋ جاعى ەسەپكە الىنسا, ەكىنشى تۋردا سۋرەتتەر تاقىرىپتى جوعارى دەڭگەيدە كورسەتە الۋىمەن باعالاندى. سونداي-اق, جوبا شارتى بويىنشا ءار سۋرەتشى ايتۋلى مەرەكەلەردىڭ رۋحىن اسقاقتاتۋدا ايشىقتى ىزدەر قالدىرىپ, ءتورت نوميناتسيانى قاتار قامتۋلارى ءتيىس ەدى. وكىنىشكە قاراي, بۇل تالاپ ۇدەسىنەن قاتىسۋشىلاردىڭ ەشقايسىسى كورىنە المادى. سول سەبەپتى جەكەلەگەن تاقىرىپتار بويىنشا نوميناتسيالار بەل­گىلەندى. – وتكەن جىل ايتۋلى مەرە­كەلەرىمەن ەستە قالدى. وسىعان وراي ءبىز رەسپۋبليكالىق فو­تو­بايقاۋ جاريالاعان بولاتىنبىز. بايقاۋ تار اۋقىمدا, بەلگىلى ءبىر تاقىرىپپەن شەكتەلىپ قالعان جوق, مۇندا قازاقستاننىڭ تىنىس-تىرشىلىگى مەن كوكجيەگى جان-جاقتى قامتىلىپ, قاس-قا­عىم ساتتەگى وقيعالار فوتو­تاريحقا اينالدى, – دەدى بايقاۋ جەڭىمپازدارىن ماراپاتتاۋ راسىمىندە ۇلتتىق مۋزەيدىڭ دي­رەكتورى دارحان مىڭباي. ۇلتتىق مۋزەيدىڭ ەلىمىزدىڭ تاريحي, مادەني ومىرىندەگى جاڭالىقتاردى ناسيحاتتاۋداعى مۇنداي ءىس-شا­رالارى الداعى ۋاقىتتا دا جال­عاسا بەرەتىنىن ءتىل­­گە تيەك ەتكەن باسشى: «ارينە, بۇل مۇنداعى يگى باستامالاردىڭ سوڭى ەمەس, جانە دە وسى تاقىلەت­تەس فوتوبايگە ودان ارمەن قا­راي جال­عاسىن تابادى دەگەن سەنىم­دەمىز. شارا بارىسىندا ءبىر بايقاعا­نىمىز, بىزگە ءالى دە بولسا فوتوونەر سالاسىن دامىتۋدى, فوتوونەرگە دەگەن قىزىعۋشىلىقتى ارتتىرۋدى قولعا الۋ قاجەت. ويتكەنى, ەلىمىزدە كاسىبي فوتوگرافتار جەتكىلىكتى. ولار بۇگىندە قازاق­ستاندى شەتەلدىكتەرگە جاڭا قىرىنان تانىتۋ الەۋەتىنە يە. ءبىز تاريحى تەرەڭ, سيقىرى مول ونەر يەلەرىنە قولداۋ كورسەتە بەرۋىمىز كەرەك. سەبەبى, شەبەرلەر شەجىرەمىزدى شەگەلەپ تاڭبالاۋدا, تاريحىمىزدى تاپجىلماي بەدەرلەۋدە كول-كوسىر ءىس تىندىرىپ وتىر», – دەدى.