كەزەكتەن تىس سايلاۋ – كەڭ مۇمكىندىك باستاۋى

كەشە ورتالىق سايلاۋ كوميسسياسىنىڭ وتىرىسى بولىپ, سايلاۋ بارىسىندا باي­قاۋ­شىلىق قىزمەت اتقاراتىن شەت مەملە­كەتتەردىڭ, حالىقارالىق ۇيىمدار­دىڭ, شەتەلدىك بۇقارالىق اقپارات قۇرال­دارى­نىڭ وكىلدەرىنە رۇقسات بەرۋ جايى كۇن ءتار­تىبىنە قويىلدى. وتىرىستى اشقان وسك توراعاسى قۋاندىق تۇرعانقۇلوۆ كۇن تارتىبىنە ەكى ماسەلە شىعا­رى­لىپ وتىرعانىن ايتىپ, العاشقى كەزەكتە ءسوزدى وسك مۇشەسى تاتيانا وحلوپكوۆاعا ۇسىندى. ت.وحلوپكوۆا الداعى پار­لا­مەنت ءماجىلىسى مەن بارلىق دەڭ­گەيدەگى ءماسليحاتتار دەپۋتات­تارىنىڭ كەزەكتەن تىس وتەتىن سايلاۋلارىندا شەت مەملەكەتتەردىڭ, حالىقارالىق ۇيىمداردىڭ باي­قاۋشىلارى, شەتەلدىك بۇقارالىق اقپارات قۇرالدارىنىڭ وكىل­دەرى قىزمەتىنىڭ كەيبىر ماسە­لە­لەرى تۋرالى قاۋلى جوباسىن وسك مۇشەلەرىنىڭ نازارىنا ۇسىندى. ول بويىنشا شەت مەم­لە­كەتتەردىڭ, حالىقارالىق ۇيىمداردىڭ بايقاۋشىسى مەن شەتەلدىك باق وكىلىنە جەكە باسىن كۋالاندىراتىن قۇجاتى بار ءبىر اۋدارماشى ىلەسىپ جۇرە الادى. سونىمەن قاتار, شەتەلدىك باق وكىلىنىڭ ەلىمىزدىڭ سىرتقى ىستەر مينيسترلىگىنەن الىنعان اككرەديتتەلگەنى تۋرالى كۋالىگى بولۋى ءتيىس. ۇسىنىلعان قاۋلى ءماتىنى ءبىراۋىزدان ماقۇلداندى, ول بويىنشا شەتەلدىك بايقاۋشى ءۇشىن ساۋالداما ءماتىنى بەكىتىلىپ, ولاردى اككرەديتتەۋ مەرزىمى بولىپ, 2016 جىلدىڭ 14 ناۋرىزى بەلگىلەندى. ەكىنشى ماسەلە – شىعىپ قالعان سايلاۋ كوميسسيالارىنىڭ مۇشەلەرىنىڭ ورنىنا جاڭا مۇشەلەردى تاعايىنداۋ بويىنشا وسك مۇشەسى باقىت مەلدەشوۆ ءسوز الىپ, «سايلاۋ تۋرالى» زاڭنىڭ 19-بابىنىڭ 6-تارماعىنىڭ ەكىنشى بولىگىنە جانە 8-تارماعىنا سايكەس, ورتسايلاۋكوم سايلاۋ زاڭناماسىندا بەلگىلەگەن ءتارتىپ­پەن سايلانعانعا دەيىن شىعىپ قالعانداردىڭ ورنىنا جامبىل وبلىستىق سايلاۋ كوميسسياسىنىڭ مۇشەسى ەتىپ ج.ساريەۆتى, قىزىلوردا وبلىستىق سايلاۋ كوميسسياسىنىڭ مۇشەسى ەتىپ ر.چاگايدى, وڭتۇستىك قازاقستان وبلىستىق سايلاۋ كوميسسياسىنىڭ مۇشەسى ەتىپ و.ساعىمبەكوۆانى تاعايىنداۋدى ۇسىندى. ۇسىنىس بويىنشا دا­ۋىس بەرىلىپ, اتالعان ازاماتتار شى­عىپ قالعانداردىڭ ورنىنا تاعاي­ىن­دالدى. انار تولەۋحانقىزى, «ەگەمەن قازاقستان».