مەملەكەت باسشىسى اكادەميك كەنجەعالي ساعاديەۆتى قابىلدادى

استانا. 22 قاڭتار. ەلباسى اكادەميك كەنجەعالي ساعاديەۆتى قابىلدادى. بۇل تۋرالى akorda.kz حابارلادى. كەزدەسۋ بارىسىندا وتاندىق عىلىمدى دامىتۋدىڭ ماڭىزدى ماسەلەلەرى مەن قازاقستاننىڭ ەكونوميكالىق ساياساتىنىڭ نەگىزگى باعىتتارى تالقىلاندى. مەملەكەت باسشىسى الەمدىك ەكونوميكا مەن گەوساياساتتاعى قازىرگى احۋالعا وراي ەلىمىزدىڭ عىلىمي جۇرتشىلىعى پىكىر ءبىلدىرىپ, ءوز شەشىمدەرىن ۇسىنۋعا ءتيىس ەكەنىن ايتتى. «بۇگىندە بىردە-ءبىر ساراپشى جاعدايدىڭ ءارى قاراي قالاي داميتىنىن جانە قالىپتاسقان احۋالدان شىعۋدىڭ جولدارىن بولجاي المايدى. ەۋروپاداعى, اقش-تاعى, قىتايداعى احۋالعا قاتىستى جەكەلەگەن پىكىرلەر بار, بىراق ەشكىم تۇتاستاي پايىم جاساي الماي وتىر. بۇعان قوسا, بىرقاتار ەل اراسىنداعى سانكتسيالىق تەكەتىرەس الەمدىك ساۋدا جۇيەسىنە وڭ اسەر ەتىپ وتىرعان جوق. تەرروريزم قاتەرى دە نازار اۋدارۋدى قاجەت ەتەدى, وعان قارسى تەك بىرلەسكەن ءىس-قيمىل ارقىلى كۇرەسۋگە بولادى. ءبىزدىڭ عىلىمي-ساراپشىلىق ورتادا وسى سىن-قاتەرلەرگە قاتىستى نەگىزدەلگەن پىكىر بولۋعا ءتيىس», – دەدى قازاقستان پرەزيدەنتى. كەنجەعالي ساعاديەۆ ەل عالىمدارى وزدەرىنە جۇكتەلگەن جاۋاپكەرشىلىكتى سەزىنەتىنىن ايتا وتىرىپ, قازىرگىدەي كۇردەلى كەزەڭدە قوعامعا قىزمەت ەتۋ ولار ءۇشىن كاسىبي بورىش ەكەنىن اتاپ ءوتتى. سونداي-اق, اكادەميك قازاقستاندا جۇزەگە اسىرىلىپ جاتقان ۇلت جوسپارى زور تاريحي مۇمكىندىك ەكەنىن, ونىڭ الەۋەتى بارىنشا پايدالانىلۋى تيىستىگىن ايتتى. بۇل ۇدەرىسكە عىلىمنىڭ عانا ەمەس, رەسپۋبليكا جۇرتشىلىعىنىڭ بارشا وكىلدەرى بەلسەنە قاتىسقانى ءجون. تالعات رايىمبەك. دەرەك, سۋرەت: akorda.kz.