كەنيادا ەجەلگى جاۋىنگەرلىكتىڭ ءىزى تابىلدى

استانا. 22 قاڭتار. ارحەولوگتار كەنياداعى تۋركان وزەنىنىڭ جاعالاۋىنان ەجەلگى جاۋىنگەردىڭ ءىزىن تاپتى. ولاردىڭ پايىمداۋىنشا, انىقتالعان ءىز شامامەن 10 مىڭ جىل بۇرىنعى ادامزاتتىڭ العاش سوعىس ءتاسىلىن مەڭگەرىپ, جاۋىنگەر اتانۋى بولسا كەرەك. بۇل تۋرالى ria.ru-عا سىلتەمە جاساعان egemen.kz حابارلادى. كەنيا عالىمدارى: «ەجەلگى ادامدار توپ-توپقا, تايپا-تايپاعا ءبولىنىپ سايىن دالا توسىندە سوعىسقان نەمەسە اڭشىلىق ارقىلى جىرتقىشتاردان قورعانعان. تابىلعان ساردارلار سوعىسىنىڭ ءىزى ادامزات تاريحىنداعى ەڭ كونە ءداۋىردىڭ بەلگىسى. وسى ارقىلى ءبىز سول كەزەڭدەگى جاۋىنگەردىڭ قانداي بولعانىن انىقتايمىز», – دەيدى. سونداي-اق, ارحەولوگتاردىڭ بۇل جاڭالىعى كونە كەزەڭدەگى ادامداردىڭ ەلى مەن جەرىن جاۋىنان قورعاۋ ماقساتىنداعى سوعىسى بولۋى مۇمكىن نەمەسە جورىقتار ۇيىمداستىرعان جاۋىنگەرلەردىڭ ءىزى دەگەندى مەڭزەيدى. ايتا كەتەيىك, 2012 جىلى عالىمدار وسى ولكەدەن ەجەلگى ادامداردىڭ جاپپاي جەرلەنگەن مۇردەلەرىن انىقتاعان. وندا 8 ەر ادامنىڭ, 8 ايەلدىڭ, 6 ءبۇلدىرشىننىڭ جانە 5 ەرەسەك بالانىڭ دەنەلەرى تەرەڭ شۇڭقىرعا كومىلگەن. مۇنى ارحەولوگتار وتباسىلىق قاستاندىقتىڭ قۇربانى دەپ بولجام جاسادى. جالپى, عالىمدار الداعى ۋاقىتتا تابىلعان ىزدەر ارقىلى باعزى زامانداعى ادامزاتتىڭ جاۋىنگەرلىكتى قانشالىقتى مەڭگەرگەنى مەن ولاردىڭ ءومىر ءسۇرۋ باعىتىن انىقتاماق. تالعات رايىمبەك. دەرەك, سۋرەت: ria.ru.