باس ءمۇفتي بالانى دالاعا تاستاۋ تۋرالى پىكىرىن ءبىلدىردى
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى قوعامنىڭ تالقىلاۋىنا تۇسكەن مەكتەپ وقۋشىلارىنىڭ ەرتە جۇكتىلىككە تاپ بولۋى, جاڭا تۋعان ءسابيدى تىرىدەي دالاعا تاستاۋ وقيعالارىنا وراي ويلارىن ورتاعا سالدى, دەپ حابارلادى قمدب-نىڭ ءباسپاسوز قىزمەتى.
«اكە اكەلىك مىندەتىن اتقارىپ, بالاعا رۋحاني تاربيە بەرمەسە, انا انالىق پارىزىن ورىنداپ, مەيىرىمىن توكپەسە, بالا اتا-انانىڭ قامقورلىعىن سەزىنبەسە, ءۇلكەندەرگە قۇرمەت كورسەتىپ, باتاسىن الۋدى ۇيرەنبەسە, وندا سول وتباسىنىڭ ويرانى شىقپايدى دەپ كىم ايتا الادى؟ كەيبىر قارىنداستارىمىز, قىزدارىمىز بولماشى تۇرمىستىق سىناققا سابىر ەتە الماي, باۋىر ەتى بالاسىن تىرىدەي دالاعا تاستاپ, بولمىسىمىزعا جات مىنەز تانىتىپ جاتقانى جانىمىزعا باتادى», – دەيدى قمدب توراعاسى.
باس ءمۇفتيدىڭ ايتۋىنشا, قىزدارىمىزدىڭ ورتا مەكتەپتى دە بىتىرمەي جاتىپ, ەرتە جۇكتىلىككە تاپ بولاتىن جاعداي قازىرگى قوعامدا ۇلكەن ماسەلەگە اينالدى دەۋگە بولادى.
«جاستارىمىز اسىعىس شەشىم قابىلداۋعا بەيىل تۇرادى. نەگە؟ مۇنىڭ سەبەپ-سالدارىن ايتقاندا, قايتادان سول تاربيەنى, يماندىلىقتى, ىزگىلىك پەن سەنىمدى تاعى ءسوز ەتەمىز. شىعىس دانالىعىندا: «بوس اربانىڭ سىلدىرى كوپ», – دەگەن ءسوز بار. تامىرى تەرەڭ تارتپاعان تالدىڭ دا جەل شايقاسا قۇلاۋعا شاق قالاتىنى سەكىلدى, تۇلا بويى يمانعا تولماعان ادامنىڭ عۇمىرى بايانسىز بولادى. قالاداعى كەيبىر اتا-انالارىمىز ۋاقىتىنىڭ كوپ ءبولىگىن جۇمىستا وتكىزەدى. بىلايشا ايتقاندا, ءوز ءۇيىمىزدىڭ «پاتەرشىسىنە» اينالدىق. ارينە, اقشا كىمگە قاجەت ەمەس. بارىنە كەرەك. الايدا, ۇيدەگى بالانىڭ ءتاربيەسى ودان دا ماڭىزدى ەكەنىن ابدەن ەسكەرۋگە ءتيىسپىز», – دەگەن كەڭەسىن جەتكىزدى.
«وتكەن جولى اقپارات قۇرالدارىنان ءسابيىن كولىكتە بوسانىپ, دالاعا تىرىدەي لاقتىرىپ جىبەرگەن قارىنداسىمىز تۋرالى قايعىلى حاباردى مەن دە ەستىدىم. دەنەم تىتىركەنىپ, ۇزاق مازاسىز كۇي كەشتىم. ارينە, وكىنىشتى جاعداي. قىزدى قىرىق ۇيدەن تىيا بىلگەن حالىقپىز عوي. باياعىدا بويجەتكەن قىزدار وتباسىن قۇرۋ تۋرالى اناسىمەن, جەڭگەسىمەن سىرلاساتىن. قازىر بۇل ءۇردىس ازايىپ بارادى. وكىنىشكە قاراي, ۇل-قىزدارىمىزدىڭ تاربيەسى ەكىنشى كەزەكتە قالىپ قويدى. بالاسىن تىرىدەي ولىمگە قيعان سول قارىنداسىمىزعا قاراجات, كيىم, باسپانا, تاعى باسقا نارسە جەتپەي جاتىر دەپ ايتا الماس ەدىك. جاستارىمىزعا جەتپەي جاتقانى رۋحاني ازىق, يمان, تاربيە. ءويتكەنى, يسلام – ەكى دۇنيە باقىتىنىڭ كىلتى», – دەيدى ەرجان قاجى مالعاجى ۇلى.
