جۇرتتىڭ ءوزى سەنەتىن ادامداردى تاڭداۋعا مۇمكىندىكتەرى بار

كەشە الماتى قالاسىنداعى ورتالىق كوممۋنيكاتسيالار قىزمەتى الاڭىندا 20 ناۋرىزدا وتەتىن پارلامەنت ءماجىلىسى جانە بارلىق دەڭگەيدەگى ءماسليحاتتار دەپۋتاتتارىن سايلاۋ ناۋقانى تۋرالى جيىن ءوتتى. وعان «زاڭگەرلەر ءادىل سايلاۋ ءۇشىن» رەسپۋبليكالىق قوعامدىق بىرلەستىگىنىڭ توراعاسى ءومىرالى قوپاباەۆ قاتىستى. ءىس-شارادا بىرلەستىك توراعاسى مەملەكەت باسشىسىنىڭ كەزەكتەن تىس پارلامەنت سايلاۋىن وتكىزۋ تۋرالى شەشىمى حالىققا ەلدىڭ قازىرگىدەي جاڭعىرۋ كەزەڭىندە ءوز تاعدىرلارىن سەنىپ تاپسىراتىن جانداردى تاڭداۋعا مۇمكىندىك بەرەتىنىن ايتتى. «زاڭگەرلەر ءادىل سايلاۋ ءۇشىن» رەسپۋبليكالىق قوعامدىق بىرلەستىگى 10 جىلدان بەرى جۇمىس ىستەپ كەلەدى. ءبىز سايلاۋ ۇدەرىسىن ءادىل باقىلاۋمەن قامتاماسىز ەتەمىز, قوعامدىق مونيتورينگ جۇرگىزىپ, ءتارتىپ بۇزۋشىلىقتاردى ساراپتايمىز. سونداي-اق, سايلاۋ ۇدەرىسىنىڭ سۋبەكتىلەرى مەن مەملەكەتتىك ورگاندارعا كەڭەس بەرەمىز. بىرلەستىگىمىز 2005 جىلى ادىلەت ورگاندارىندا مەملەكەتتىك تىركەۋ راسىمىنەن ءوتتى. سودان بەرى ول باقىلاۋشى رەتىندە بارلىق پرەزيدەنت جانە پارلامەنت سايلاۋىنا بەلسەنە قاتىسىپ كەلەدى», – دەدى ءو.قوپاباەۆ. ونىڭ سوزىنە قاراعاندا, باقىلاۋ ناتيجەسى بويىنشا ۇسىنىلعان بىرلەستىكتىڭ قورىتىندىلارى مەن شەشىمدەرى تەك زاڭدىق ساراپتاما قۇرالدارىنا نەگىزدەلگەندىكتەن ءادىل ءارى شىنايى بولعان. سونىمەن قاتار, ساراپشى ءوز سوزىندە: «ءماجىلىس پەن بارلىق دەڭگەيدەگى ءماسليحاتتاردىڭ الداعى سايلاۋى جەرگىلىكتى جەرلەردەگى جاعدايلاردى تەز ارادا تالداپ, ازاماتتار مەن بيلىك اراسىنداعى بايلانىستى تەرەڭدەتە تۇسۋگە مۇمكىندىك بەرەدى. ءدال قازىر حا­لىق­تا ەلدىڭ جاڭارۋى كەزىندە باستالعان جۇمىستاردى ودان ءارى ىسكە اسىرۋدى سەنىپ تاپسىراتىن ادامداردى تاڭداۋ مۇمكىندىگى تۋدى. بۇل وتە ماڭىزدى نارسە», – دەدى. ءسوز سوڭىندا, ول بىرلەستىكتىڭ پارلامەنت ءماجىلىسىنىڭ التىنشى شاقىرىلىمى مەن جەرگىلىكتى وكىلەتتى ورگاندار دەپۋتاتتارىنىڭ كەزەكتەن تىس سايلاۋىندا باقىلاۋ جۇرگىزۋگە دايىن ەكەنىن جەتكىزدى. قانات ەسكەندىر, «ەگەمەن قازاقستان».