باستى ماقسات – بارشانىڭ مۇددەسى

مەملەكەت باسشىسى نۇرسۇلتان نازارباەۆتىڭ حالىققا ۇندەۋى ەلىمىزدىڭ باتىستاعى قاقپاسىن مەكەندەيتىن ەل-جۇرت پەن كوپەتنوستى تۇرعىندار اراسىندا ءتيىستى قولداۋ مەن تەرەڭ تۇسىنىستىك تاۋىپ وتىر. سولاردىڭ قالىڭ ءبىر توبىن ۇكىمەتتىك ەمەس ۇيىمدار مەن قوعامدىق بىرلەستىكتەردىڭ وكىلدەرى قۇرايدى. ورال قالالىق ارداگەرلەر كەڭەسىنىڭ توراعاسى ك.نىعمەتپەن قىسقاشا اڭگىمە وسى تاقىرىپ توڭىرەگىندە توقايلاستى. – كەنجەباي ءالجان ۇلى, مەم­لەكەت باسشىسىنىڭ جار­لى­عى مەن ۇندەۋىنەن كوڭىلگە قان­داي وي ءتۇيدىڭىز؟ – بۇگىنگى تاڭدا جوعارى دەڭگەيدەگى بيلىك تارماقتارى مەن جەرگىلىكتى جەردەگى اتقارۋشى بيلىك پەن سايلانبالى ورگان وكىلدەرىنىڭ ءبىر-بىرىمەن ءوزارا بايلانىستا جۇمىس ىستەۋى وتە ماڭىزدى. ءارى مۇنداي قادامنىڭ ءوزى ەل مەن حالىقتىڭ مۇددەلەرى مەن مۇڭ-مۇقتاجدارى ءۇشىن جەرگىلىكتى جانە مەملەكەتتىك دەڭگەيدە وڭتايلى شەشىمدەر قابىلداۋعا سەپتىگىن تيگىزەدى. ەڭ باستىسى – بۇعان ءتيىستى كونستيتۋتسيالىق جانە زاڭدىلىق نەگىزدەر جاسالىپ وتىر. ءتىپتى, وسىنداي زاڭدىلىق تەتىكتەر ارقىلى كەز كەلگەن ىقتيمال اراڭداتۋلارعا دا تويتارىس بەرۋگە بولاتىنىن كەشەگى حالىققا ۇندەۋىندە مەملەكەت باسشىسى دا اتاپ وتكەن ەكەن. رەسپۋبليكا پرەزيدەنتىنىڭ حالىققا ۇندەۋىنىڭ ءار جولى سىندارلى ۇسىنىستار مەن وي-پىكىرلەرگە تولى. جاريالانعان جارلىقتا قازاقستاندىقتاردى قازىرگى كۇردەلى داعدارىستىق كەزەڭنىڭ زاردابىن كوپ تارتتىرماي الىپ شىعۋدىڭ تاكتيكاسى مەن تەتىكتەرى جان-جاقتى كورىنىس تاپقان. ۇندەۋ وسىنىسىمەن دە باعالى ءارى قۇندى دەپ بىلەمىن. قازىرگى كۇنى جەكە مۇددەلەردەن گورى ەلدىك مۇددەلەردى العاشقى كەزەككە قويۋدىڭ ءمانى زور. بۇل ءۇشىن ەلدىڭ ءار ازاماتىنىڭ پاتريوتتىق سەزىمى تەرەڭ بولعانى ءجون. بۇل ارادا ارقايسىمىز مەملەكەت بىزگە نە بەردى دەگەننەن گورى, ءبىز مەملەكەتكە نە بەردىك دەگەن ماسەلەنى دە تەرەڭ تۇيسىنگەنىمىز ءجون سەكىلدى كورىنەدى. ءدال وسىنداي ويلاۋ جۇيەسىنىڭ ءساتى مەن كەزى كەلگەنى دە كامىل. مىنە, جەكە ءوز باسىما قاتىستى العاندا ۇندەۋدەن تۇيگەن تاعى ءبىر تاعىلىم وسىنداي. تۇپتەپ كەلگەندە, پرەزيدەنت ۇندەۋى مەن جارلىعىنىڭ باستى ماقساتى ەل مۇددەسىنە باعىتتالعان. –الداعى ناۋرىز ايىندا سايلاناتىن پارلامەنت جانە جەرگىلىكتى ءماسليحاتتار دەپۋتاتتارى كورپۋسىنىڭ كەلبەتى قانداي بولعانىن قالار ەدىڭىز؟ – ەلباسىنىڭ جارلىعى مەن ۇندەۋى ەلىمىزگە دامۋدىڭ ادام ايتقىسىز شىڭدارىن باعىندىرۋعا مۇمكىندىك بەرەدى. بەيبىتشىلىك, تۇراقتىلىق جانە كەلىسىم تاۋەلسىز قازاقستان تابىستارىنىڭ الەم تانىعان نىشاندارىنا اينالدى. بۇگىندە, الەمدىك ەكونوميكالىق داعدارىس جاعدايىندا, قازاقستان حالقى ماڭگىلىك ەل يدەياسىمەن رۋحتانىپ وتىر. سونداي-اق, ەلدىڭ بارلىق رەسۋرستارىن ءوسىمنىڭ جاڭا كوكجيەكتەرىن باعىندىرۋ ءۇشىن جۇمىلدىرۋعا شاقىرادى. ءبىز, ورال قالالىق ارداگەرلەر كەڭەسى الداعى ناۋرىز ايىندا سايلاناتىن پارلامەنت ءماجىلىسى مەن ماسليحاتتارعا ەل دامۋىنىڭ جاڭا, جاۋاپتى كەزەڭىندە جوعارى سەنىم بىلدىرەمىز. ەلىمىزدىڭ جاڭا دەپۋتاتتىق كورپۋسى بارلىق ساياسي پارتيالاردىڭ ءوزارا ءىس-قيمىلىنىڭ ءتيىمدى تەتىگى بولۋى, ءبىزدىڭ ىلگەرىلەۋىمىزدىڭ ىرگەتاسى رەتىندە بەيبىتشىلىك پەن كەلىسىمدى نىعايتۋدى قامتاماسىز ەتۋى ءتيىس. بۇل ماسەلەدە ىسكە باسشىلىق ەلباسىنىڭ كەشەگى كۇنى جاريالانعان جارلىعى مەن حالىققا ۇندەۋى بولىپ تابىلادى. بارشامىز الەمدىك ەكونوميكالاردا ورىن العان جاھاندىق داعدارىستى كورىپ وتىرمىز. بارلىق ەلدەردىڭ ەكونوميكالارى قيىن كەزەڭنەن ءوتىپ جاتىر. وسىعان ءبىزدىڭ ەلىمىزدىڭ لايىقتى جاۋابى رەتىندە بەس ينستيتۋتتىق رەفورمانى جۇزەگە اسىرۋ بويىنشا «100 ناقتى قادام» – ۇلت جوسپارى بولىپ وتىر. وسى جاعدايدا جاڭادان سايلاناتىن دەپۋتاتتار ەل مۇددەسى ءۇشىن جانقيارلىقپەن جۇمىس ىستەۋى ءۇشىن جاڭا سەنىم مانداتىن الۋى كەرەك. ەلباسى ۇندەۋىنىڭ باستى قۇڭدىلىعىن مەن وسىلاي تۇسىنەمىن. ۇلت جوسپارىنا سايكەس قىزمەت اتقارىپ ونى ويداعىداي جۇزەگە اسىرۋ ءۇشىن دەپۋتاتتار جاڭا سەنىم مانداتىن الۋى كەرەك ەلباسى جارلىعىنىڭ باستى ءبىر ءمانى, ءارى باستى ءبىر قۇندىلىعى دا وسىندا دەپ وي تۇيۋگە بولادى. – اڭگىمەڭىزگە راحمەت. اڭگىمەلەسكەن تەمىر قۇسايىن, «ەگەمەن قازاقستان». باتىس قازاقستان وبلىسى.