اتىراۋدا ءوڭىر ەتنوستارى تۋرالى كىتاپ جارىققا شىقتى

اتىراۋ. 19 قاڭتار. اتىراۋدا وسى ءوڭىردى مەكەن ەتكەن ەتنوستار تۋرالى كىتاپتىڭ تانىستىرىلىمى ءوتتى. بۇل تۋرالى egemen.kz ءتىلشىسى حابارلادى. قازىر اتىراۋ وبلىسىندا 17 ەتنومادەني بىرلەستىك جۇمىس جاسايدى. ولار ءبىر-بىرىمەن تىعىز بايلانىس ورناتىپ, وزدەرى وتكىزەتىن ءتۇرلى شارالارعا بەلسەنە ارالاسادى. ءتىپتى, «يۆەريا» گرۋزين جانە «تاتۋلىك» تاتار-باشقۇرت ەتنومادەني بىرلەستىكتەرى جانىنان قۇرىلعان بي توپتارىندا وزگە ەتنوستىڭ بالالارى دا قابىلدانىپ, ءتۇرلى ۇلتتىق بيلەردى ۇيرەنۋدە. وڭىردەگى قازاقستان حالقى اسسامبلەياسى قۇرامىنداعى ەتنومادەني بىرلەستىكتەر وكىلدەرى اتقارىپ وتىرعان جۇمىستار, ولاردىڭ تاتۋلىعى مەن دوستىعى, ۇكىمەتتىك ەمەس جانە باسقا دا قوعامدىق بىرلەستىكتەرمەن اراداعى قارىم-قاتىناسى جايلى دەرەكتەردى «اتىراۋ ەتنوستارى» دەپ اتالاتىن جاڭا كىتاپتان تابۋعا بولادى. بۇل كىتاپ «التىن كىتاپ» باسپاسىنان 1000 دانا تارالىممەن ءۇش تىلدە – قازاقشا, ورىسشا جانە اعىلشىنشا جارىق كوردى. كىتاپتا «ەتنوسارالىق قاتىناس سالاسىنداعى مەملەكەتتىك ساياساتتىڭ باسىمدىلىق مىندەتتەرى», «ەتنومادەني بىرلەستىكتەر» جانە «اتىراۋ وبلىسىنىڭ قازاقستان حالقى اسسامبلەياسى» دەگەن ءۇش تاراۋ بار. جولداسبەك شوپەعۇل. دەرەك:  egemen.kz. سۋرەت: راحىم قويلىباەۆ.