سولتۇستىك قازاقستانعا 400 وتباسى قونىس اۋدارادى

پەتروپاۆل. 19 قاڭتار. بيىل وڭتۇستىك قازاقستان وبلىسىنان قىزىلجار وڭىرىنە 400-گە جۋىق وتباسى قونىس اۋدارادى دەپ كۇتىلۋدە. بۇل تۋرالى وبلىس اكىمىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بۇگىنگى كۇنى كوشىپ كەلۋگە نيەت بىلدىرگەن وتباسىلاردىڭ جارتىسىنا جۋىعى «جۇمىسپەن قامتۋ 2020 جول كارتاسى» باعدارلاماسى اياسىندا جۇمىسپەن, باسپانامەن قامتىلماق. ال قالعاندارى ءۇشىن جۇمىسپەن قامتۋ جانە الەۋمەتتىك باعدارلامالار باسقارماسى تاراپىنان ءتيىستى قۇجاتتار راسىمدەلىپ, جۇمىستار قاراستىرىلۋدا. بىلتىر ورنىققان وتانداستارىمىزدىڭ دەنى قۇرىلىس, ءبىلىم بەرۋ, اۋىل شارۋاشىلىعى مەن مەديتسينا سالالارىندا ەڭبەك ەتەدى. ەسكە سالساق, وتكەن جىلدىڭ ماۋسىم ايىندا وڭتۇستىكتە سولتۇستىك قازاقستان وبلىسىنىڭ دەلەگاتسياسى بولىپ, جۇمىسقا قابىلەتتى ازاماتتاردى تۇراقتى ەڭبەك ەتۋگە شاقىرىپ, ناقتى الەۋمەتتىك كومەكتەر كورسەتىلەتىنە, ونىڭ ىشىندە, جۇمىس بەرۋشىلەردىڭ ەسەبىنەن 53 تۇرعىن ءۇي, 3 پاتەر, جاتاقحانا بەرىلەتىنىنە سەندىرگەن ەدى. ىلە-شالا وڭتۇستىك ءوڭىردىڭ دەلگاتسياسى وسىندا كەلىپ, 13 اۋداننىڭ ەڭبەك نارىعىنىڭ جاعدايىمەن تانىسىپ قايتقان بولاتىن. قازىر وڭتۇستىك جاقتان كەلگەن جارتى مىڭعا جۋىق جاستار ءتۇرلى وقۋ ورىندارىندا ءدارىس الادى. ءومىر ەسقالي. دەرەك: egemen.kz. سۋرەت: photogoroda.com.